បាតុករ ចេញតវ៉ា ដោយស្តីបន្ទោសបក្សភឿថៃ និងភូមិចៃថៃ ដែលទៅចងសម្ព័ន្ធជាមួយយោធា

បាតុករមួយក្រុម ដែលភាគច្រើនជិះកង់ និងម៉ូតូ បានប្រមូលផ្តុំគ្នានៅមុខទីស្នាក់ការគណបក្សភឿថៃ និងភូមិចៃថៃ កាលពីល្ងាចថ្ងៃអាទិត្យទី១៣ខែសីហា ដើម្បីថ្កោលទោសចំពោះ ការបង្កើតរដ្ឋាភិបាលបន្ទាប់ ជាមួយគណបក្សដែលមានទំនាក់ទំនងជាមួយយោធា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាពលរដ្ឋ​ដែល​ប្រើប្រាស់​យានជំនិះ​ប្រមាណ៥០​គ្រឿង ​បាន​មក​ប្រមូល​ផ្តុំ​គ្នា​ដំបូង​នៅ​ស្ថានីយ BTS Mo Chit លើ​ផ្លូវ Phahon Yothin នាម៉ោង១រសៀល។ មេដឹកនាំ​បាតុកម្ម​ បាន​រិះគន់​បក្ស​ទាំង​ពីរ ​ចំពោះការ​សហការ​ជាមួយ​បក្ស​នយោបាយ ​ដែលជាប់ពាក់ព័ន្ធ​រដ្ឋប្រហារ​ខែ​ឧសភាឆ្នាំ​២០១៤។

ក្រោយមក ពួកគេបានចេញដំណើរទៅទីស្នាក់ការគណបក្ស ភូមិចៃថៃ ហើយក្រុម​អ្នក​តវ៉ា​បានទៅ​ដល់​ការិយាល័យ​កណ្តាល​នៅ​ម៉ោង​ប្រហែល​ ៣​ រសៀល ប៉ុន្តែទីស្នាក់ការត្រូវបិទទ្វារ និងយាមកាមដោយប៉ូលិស។

ទន្ទឹមនោះ ក្រោយចេញពីទីស្នាក់ការរបស់បក្សភូមិចៃថៃ ក្រុមបាតុករក៏បានបន្តដំណើរឆ្ពោះទៅទីស្នាក់ការបក្សភឿថៃ តាមផ្លូវ Phetchaburi នៅម៉ោងប្រហែល ៤ និង ៤៥ នាទីរសៀល ខណៈកន្លែងនោះក៏ត្រូវបានបិទផងដែរ ។

នៅទីនោះ ពួកគេបានបោះចោល និងបំផ្លាញវត្ថុអនុស្សាវរីយ៍របស់បក្សភឿថៃ រួមមានស្ទីគ័រ ពែង ប្រតិទិន និងអាវ។ ពួកគេក៏ទាមទារឲ្យគណបក្សភឿថៃ ស្តារឡើងវិញនូវភាពជាដៃគូចម្រុះរបស់ខ្លួនជាមួយនឹងគណបក្សចលនាឆ្ពោះទៅមុខដែលឈ្នះការបោះឆ្នោតផងដែរ។

គួរបញ្ជាក់ថា គណបក្សភឿថៃ ជាប់ចំណាត់ថ្នាក់លេខ២ក្នុងការបោះឆ្នោតសកលកាលពីថ្ងៃទី១៤ ខែឧសភា ជាមួយនឹងអាសនៈសភាចំនួន១៤១ ហើយគណបក្សភូមិចៃថៃ ជាប់ចំណាត់ថ្នាក់លេខ៣ ដោយមាន៧១អាសនៈ។

បក្សទាំងពីរ បានប្រកាសពីកិច្ចខិតខំប្រឹងប្រែងរួមគ្នា ដើម្បីបង្កើតរដ្ឋាភិបាលបន្ទាប់ ក្រោយពេលគណបក្សភឿថៃ បានដកខ្លួនចេញពីសម្ព័ន្ធភាពចម្រុះជាមួយបក្សចលនាឆ្ពោះទៅមុខ ដែលបានឈ្នះអាសនៈសភាចំនួន១៥១៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ បក្សភឿថៃ នឹងបញ្ចូលបក្សលោក ប្រាយុទ្ធ និងលោក ប្រាវីដ ចូលក្នុងក្រុម ចម្រុះដើម្បីបង្កើតរដ្ឋាភិបាលថ្មី