ព័ត៌មានអន្ដរជាតិ

ប្រជាជន ថៃ ស្រលាញ់ពេញចិត្តកូនស្រីលោក ថាក់ស៊ីន ធ្វើជានាយករដ្ឋមន្ត្រី

បានផុស

២ years មុន

នៅ

ថ្ងៃចន្ទ ២១ សីហា ២០២៣

ដោយ

រហូតមកដល់ពេលនេះ ស្ថានការណ៍នយោបាយជុំវិញបេក្ខភាពនាយករដ្ឋមន្ត្រីរបស់គណបក្សភឿថៃ មិនទាន់ប្រាកដប្រជានៅឡើយទេ បើទោះជាគណបក្សបានបញ្ជាក់ហើយថា នឹងតែងតាំងលោក Srettha Thavisin ជាបេក្ខភាពនាយករដ្ឋមន្ត្រីក្នុងចំណោមបេក្ខភាពនាយករដ្ឋមន្ត្រីទាំងបីរបស់ខ្លួនក៏ដោយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីមហាសេដ្ឋីអចលនទ្រព្យរូបនេះ គណបក្សភឿថៃក៏នៅមានបេក្ខភាពនាយករដ្ឋមន្ត្រីលេចធ្លោចំនួន ២ រូបទៀតផងដែរ ដែលក្នុងនោះរួមមានកូនស្រីលោក ថាក់ស៊ីន គឺលោកស្រី Paetongtarn Shinawatra និងលោក Chaikasem Nitisir ។

ពាក់ព័ន្ធនឹងតំណែងមួយនេះដែរ វិទ្យាស្ថានជាតិគ្រប់គ្រងការអភិវឌ្ឍន៍ថៃ (Nida) ក៏បានរៀបចំការបោះឆ្នោតស្ទង់មតិតាមទូរស័ព្ទលើជនជាតិថៃនៅទូទាំងប្រទេសមានអាយុយ៉ាងតិច ១៨ ឆ្នាំចំនួន ១,៣១០ នាក់ដែលត្រូវបានអនុវត្តឡើង ចាប់ពីថ្ងៃទី១៥ ដល់ថ្ងៃទី១៧ ខែសីហា ។

យោងតាមការស្ទង់មតិនោះបានបង្ហាញថា ប្រជាជនថៃភាគច្រើនបានបោះឆ្នោតពេញចិត្តឲ្យលោកស្រី Paetongtarn ធ្វើជានាយករដ្ឋមន្ត្រី ច្រើនជាងលោក Srettha ទៅទៀត ពោលកូនស្រីលោក ថាក់ស៊ីន រូបនេះទទួលបានសំឡេងគាំទ្រចំនួន ៣៨.៦៣ ភាគរយ ហើយមហាសេដ្ឋីអចលនទ្រព្យមាន ៣៦.៥៦ ភាគរយ ខណៈលោក Chaikasem ទទួលបានសំឡេងត្រឹម ៨.៤៧ ភាគរយប៉ុណ្ណោះ ។

គួរបញ្ជាក់ថា ប្រធានសភាថៃលោក Wan Muhamad Noor Matha បានកំណត់យកថ្ងៃទី២២ ខែសីហា ជាកាលបរិច្ឆេទនៃសម័យប្រជុំរួមគ្នារវាងសមាជិករដ្ឋសភា និងព្រឹទ្ធសភា ដើម្បីបោះឆ្នោតជ្រើសរើសនាយករដ្ឋមន្ត្រីថ្មី ខណៈគណបក្សភឿថៃ ដែលជាបក្សឈ្នះឆ្នោតលំដាប់ទី ២ នឹងធ្វើជាអ្នកដឹកនាំក្នុងការបង្កើតរដ្ឋាភិបាលថ្មី ៕