ប្រទេស ថៃ រយៈពេល ៩ ឆ្នាំក្រោមការកាន់អំណាចរបស់នាយករដ្ឋមន្ត្រីផុត​អាណត្តិ ប្រាយុទ្ធ ចាន់អូចា

ស្របពេលដែលត្រៀមប្រគល់តំណែងទៅនាយករដ្ឋមន្ត្រីថ្មីរបស់ប្រទេសថៃ, លោក ប្រាយុទ្ធ ចាន់អូចា ដែលបច្ចុប្បន្នជានាយករដ្ឋមន្ត្រីផុតអាណត្តិ បានគូសបញ្ជាក់ និងលើកឡើងអំពីការអភិវឌ្ឍន៍របស់ប្រទេស ក្នុងអំឡុងពេលដែលលោកកាន់អំណាចរយៈពេល ៩ ឆ្នាំកន្លងមកនេះ ។

លោក ប្រាយុទ្ធ បាននិយាយនៅក្នុងការបង្ហោះតាមហ្វេសប៊ុកកាលពីពេលថ្មីៗនេះថា “ការរីកចម្រើន ក៏ដូចជាយុទ្ធសាស្ត្រលោតផ្លោះ ក្នុងអំឡុងពេលលោកកាន់តំណែង អាចដើរតួនាទីជាការចាប់ផ្តើមសម្រាប់រដ្ឋាភិបាលបន្ទាប់របស់លោក ស្រេតថា ថាវីស៊ីន ក្នុងនាមជានាយករដ្ឋមន្ត្រីថ្មីរបស់ថៃ” ។

នាយករដ្ឋមន្ត្រីផុតអាណត្តិវ័យ ៦៩ ឆ្នាំរូបនេះបានបញ្ជាក់ទៀតថា “ប្រទេសថៃក្នុងរយៈពេល ៩ ឆ្នាំកន្លងមកនេះបានដើរឆ្ពោះទៅមុខយ៉ាងខ្លាំងក្នុងការអភិវឌ្ឍ ។ ការរីកចម្រើនរបស់ថៃនៅក្នុងវិស័យជាច្រើន គឺអាចប្រៀបធៀបទៅនឹងប្រទេសអភិវឌ្ឍន៍ផ្សេងទៀត ហើយយើងក៏ត្រៀមខ្លួនធ្វើឲ្យប្រទេសថៃក្លាយទៅជាប្រទេសឈានមុខគេមួយរបស់ពិភពលោកនាពេលអនាគតដ៏ខ្លីខាងមុខនេះផងដែរ” ។

ស្របពេលជាមួយគ្នានេះ លោកក៏បានថ្លែងអំណរគុណដល់ប្រជាពលរដ្ឋ មន្ត្រីរាជការ និងប្រជាជនមកពីគ្រប់វិស័យទាំងអស់ចំពោះ “ការលះបង់ និងការអត់ធ្មត់” ក្នុងគ្រាលំបាករបស់ប្រទេស ដើម្បីជួយកសាងកម្លាំងប្រទេសថៃឡើងវិញ ជាពិសេសលោក​មាន​ទំនុក​ចិត្ត​យ៉ាង​ខ្លាំង​ថា ប្រទេស​ថៃ​នឹង​លែង​មាន​ការ​ចាប់​ផ្តើម​ពីបាតដៃទទេ​ទៀត​ហើយ ប្រសិន​បើ​អ្វីៗ​ដែល​យើង​បានកសាង​ឡើងហើយនោះ ​ត្រូវ​បាន​កែ​លម្អ​បន្ថែម​ទៀត ។

ទោះយ៉ាងណា លោក​បាន​ទទួល​ស្គាល់ថា ទន្ទឹមនឹងការរីកចម្រើន ប្រទេសថៃក្នុងរយៈ​ពេល ៩ ​ឆ្នាំ​កន្លង​មក​នេះ ក៏ជួបស្ថានភាពវឹកវរ ក៏ដូចជាវិបត្តិជាច្រើនផងដែរដូចជា ជំងឺរាតត្បាតកូវីដ ១៩ និងជម្លោះប្រដាប់អាវុធ ដែលបានជះឥទ្ធិពលអាក្រក់ទៅលើតម្លៃថាមពល តម្លៃនៃការរស់នៅ និងអតិផរណាជាដើម ប៉ុន្តែលោកក៏សូមអរគុណចំពោះការរួបរួម និងកិច្ចសហប្រតិបត្តិការរួមគ្នា ទើបយើងអាចរួចផុតពីឧបសគ្គទាំងនេះ និងស្ដារប្រទេសបានឡើងវិញ ទោះបីជាស្ថានភាពពិភពលោកនៅតែមានភាពចលាចលក៏ដោយ ។

គួរបញ្ជាក់ថា លោកឧត្តមសេនីយ ប្រាយុទ្ធ ចាន់អូចា បានឡើងកាន់អំណាច បន្ទាប់ពីធ្វើរដ្ឋប្រហារយោធាទម្លាក់រដ្ឋាភិបាលជាប់ឆ្នោតរបស់គណបក្សភឿថៃដឹកនាំដោយលោកស្រី យីងឡាក់ ស៊ីណាវ៉ាត់ត្រា កាលពីខែឧសភា ឆ្នាំ ២០១៤ ។

ក្រោយមកលោក ប្រាយុទ្ធ បានបន្តតំណែងនាយករដ្ឋមន្ត្រីឡើងវិញនៅឆ្នាំ ២០១៩ បន្ទាប់ពីគណបក្សប៉ាឡាង ប្រាឆារ៉ាត់ បានតែងតាំងលោកជាបេក្ខជននាយករដ្ឋមន្ត្រីរបស់ខ្លួន និងបានបង្កើតរដ្ឋាភិបាលចម្រុះ បន្ទាប់ពីការបោះឆ្នោតសកលនៅឆ្នាំនោះ ប៉ុន្តែនៅឆ្នាំ ២០២៣ នេះ លោកបានប្រកាសនឹងចូលនិវត្តន៍ពីឆាកនយោបាយហើយ ក្រោយគណបក្សថៃរួបរួមជាតិដែលបានតែងតាំងលោកជាបេក្ខជននាយករដ្ឋមន្ត្រី រងបរាជ័យយ៉ាងធ្ងន់ធ្ងរក្នុងការបោះឆ្នោតសកលកាលពីថ្ងៃទី១៤ ខែឧសភា ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ បែកធ្លាយបញ្ជីសមាជិកគណៈរដ្ឋមន្ត្រីថ្មីរបស់ ថៃ ប៉ុន្តែមិនមានឈ្មោះកូនស្រី លោក ថាក់ស៊ីន ឡើយ