ចិន គាំទ្រដល់តួនាទី អាស៊ាន ក្នុងកិច្ចការពិភពលោក

នាយករដ្ឋមន្ត្រីចិនលោក Li Qiang បានគូសបញ្ជាក់កាលពីថ្ងៃអង្គារថា ប្រទេសចិនគាំទ្រជំហរកណ្តាលនៃសមាគមប្រជាជាតិអាស៊ីអាគ្នេយ៍ (អាស៊ាន) ក្នុងកិច្ចសហប្រតិបត្តិការក្នុងតំបន់ ហើយប្រទេសចិនក៏មានឆន្ទៈក្នុងការធ្វើការជាមួយភាគីទាំងអស់ដើម្បីជំរុញឲ្យតំបន់អាស៊ីបូព៌ាក្លាយជាក្បាលម៉ាស៊ីនដ៏សំខាន់សម្រាប់ការអភិវឌ្ឍពិភពលោក ។

លោក Li បានធ្វើការកត់សម្គាល់បែបនេះនៅក្នុងសុន្ទរកថាជាលាយលក្ខណ៍អក្សរ បន្ទាប់ពីការអញ្ជើញមកដល់របស់លោកក្នុងដំណើរទស្សនកិច្ចផ្លូវការនៅទីក្រុងហ្សាការតា ប្រទេសឥណ្ឌូណេស៊ី ក៏ដូចជាក្នុងការចូលរួមកិច្ចប្រជុំមេដឹកនាំ ចិន-អាស៊ាន លើកទី២៦ ។

លោក​បញ្ជាក់​ថា រដ្ឋាភិបាល​ក្រុង​ប៉េកាំង​គាំទ្រ​យ៉ាង​ម៉ឺងម៉ាត់​ដល់​អាស៊ាន​ក្នុង​ការ​ដើរ​តួនាទី​កាន់តែ​ខ្លាំង​ក្នុង​កិច្ចការ​អន្តរជាតិ ។ ប្រទេសចិនត្រៀមខ្លួនជាស្រេចដើម្បីផ្លាស់ប្តូរទស្សនៈជាមួយភាគីទាំងអស់លើបញ្ហាសំខាន់ៗទាក់ទងនឹងកិច្ចសហប្រតិបត្តិការក្នុងតំបន់ ការពង្រឹងឯកភាព ការចែករំលែកឱកាសអភិវឌ្ឍន៍ និងការដោះស្រាយបញ្ហាប្រឈមនានាជាដើម ។

ទន្ទឹមនោះ ក្រៅពីចូលរួមកិច្ចប្រជុំចិន-អាស៊ានលើកទី២៦ ហើយ លោក Li ក៏នឹងចូលរួមកិច្ចប្រជុំកំពូលមេដឹកនាំអាស៊ាន-ចិន ជប៉ុន និងសាធារណរដ្ឋកូរ៉េ លើកទី២៦ និងកិច្ចប្រជុំកំពូលអាស៊ីបូព៌ាលើកទី១៨ ក្នុងអំឡុងពេលដំណើរទស្សនកិច្ចមកកាន់ប្រទេសឥណ្ឌូណេស៊ី ។

គួរបញ្ជាក់ថា នេះជាដំណើរទស្សនកិច្ចលើកដំបូងរបស់លោក Li មកកាន់ប្រទេសអាស៊ី ចាប់តាំងពីលោកបានក្លាយជានាយករដ្ឋមន្ត្រីចិនក្នុងខែមីនា ហើយក៏ស្របពេលជាមួយនឹងខួបលើកទី ១០ នៃការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន និងឥណ្ឌូណេស៊ីផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ China Daily

ចុចអាន ៖ តើមេដឹកនាំប្រទេស អាស៊ាន រូបណាខ្លះនាំយកភរិយាចូលរួមក្នុងកិច្ចប្រជុំ​កំពូលនៅ ឥណ្ឌូណេស៊ី?