អាមេរិក ថា ក្រុមនាវាផ្ទុកយន្តហោះជួយ អ៊ីស្រាអែល ជិតទៅដល់សមុទ្រ​មេឌីទែរ៉ាណេភាគខាងកើតហើយ

មន្ត្រីជាន់ខ្ពស់មួយរូបរបស់ក្រសួងការពារជាតិសហរដ្ឋអាមេរិកបាននិយាយកាលពីថ្ងៃចន្ទថា ក្រុមនាវាផ្ទុកយន្តហោះអាមេរិក Gerald R. Ford ដែលត្រូវបានដាក់ពង្រាយទៅកាន់សមុទ្រមេឌីទែរ៉ាណេភាគខាងកើត ដើម្បីឆ្លើយតបទៅនឹងការវាយប្រហាររបស់ក្រុមហាម៉ាស់លើប្រទេសអ៊ីស្រាអែល នឹងទៅដល់តំបន់ប្រយុទ្ធក្នុងពេលឆាប់ៗនេះហើយ ។

មន្ត្រី​រូប​នេះ​បាន​និយាយ ​ក្នុង​អំឡុង​ពេល​សន្និសីទ​មួយ​ថា “ខ្ញុំមិនចង់និយាយអ្វីច្រើននោះទេ គ្រាន់តែខ្ញុំចង់បញ្ជាក់ថា ក្រុមនាវាផ្ទុកយន្តហោះអាមេរិកចម្បាំង Gerald R. Ford ជិតទៅដល់សមុទ្រមេឌីទែរ៉ាណេភាគខាងកើតហើយ ដើម្បីជួយទៅដល់ប្រទេសអ៊ីស្រាអែល” ។

ក្រុមនាវាផ្ទុកយន្តហោះចម្បាំងរួមមាន នាវាផ្ទុកយន្តហោះចម្បាំងរបស់កងទ័ពជើងទឹកអាមេរិក Gerald R. Ford, នាវាចម្បាំង Normandy និងនាវាពិឃាត Thomas Hudner, Ramage, Carney និងនាវាពិឃាត Roosevelt ជាដើម ហើយសហរដ្ឋអាមេរិកក៏កំពុងបង្កើនកម្លាំងទ័ពអាកាសដោយបញ្ជូនយន្តហោះ F-35, F-15, F-16, និងកងយន្តហោះចម្បាំង A-10 ផងដែរ ។

ពាក់ព័ន្ធនឹងបញ្ហានេះដែរ រដ្ឋមន្ត្រីការពារជាតិអាមេរិក លោក Lloyd Austin បានប្រកាសកាលពីថ្ងៃអាទិត្យហើយថា សហរដ្ឋអាមេរិកកំពុងដាក់ពង្រាយក្រុមនាវាផ្ទុកយន្តហោះចម្បាំង Gerald R. Ford ទៅកាន់សមុទ្រមេឌីទែរ៉ាណេភាគខាងកើត ដើម្បីជំរុញកិច្ចខិតខំប្រឹងប្រែងទប់ស្កាត់ជម្លោះ ក៏ដូចជាដើម្បីឆ្លើយតបទៅនឹងការវាយប្រហាររបស់ក្រុមហាម៉ាស់មកលើអ៊ីស្រាអែល ។

គួរបញ្ជាក់ថា រហូតមកដល់ពេលនេះការវាយប្រហារគ្នាទៅវិញទៅមករវាងក្រុមហាម៉ាស់ប៉ាឡេស្ទីន និងអ៊ីស្រាអែលដែលផ្ទុះឡើងនៅព្រឹកព្រលឹមថ្ងៃសៅរ៍ ទី៧ ខែតុលា បានសម្លាប់មនុស្សជាង ១,៥០០ នាក់ និងរបួសជាង ២,០០០នាក់ ហើយក្នុងចំណោមអ្នកស្លាប់ទាំងនោះ ក៏មានពលរដ្ឋអាមេរិកចំនួន ១១ នាក់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក បញ្ជូនកងនាវាចម្បាំងទៅកៀក អ៊ីស្រាអែល