ព័ត៌មានអន្ដរជាតិ
អាមេរិក និងប្រទេសលោកខាងលិច ៥ ទៀតឲ្យ អ៊ីស្រាអែល គោរពច្បាប់មនុស្សធម៌អន្តរជាតិ និងការពារជនស៊ីវិល
មេដឹកនាំសហរដ្ឋអាមេរិក និងបណ្ដាប្រទេសលោកខាងលិចចំនួន ៥ ផ្សេងទៀតបានអះអាងឡើងវិញនូវការគាំទ្ររបស់ពួកគេចំពោះអ៊ីស្រាអែល ចំពេលមានការប្រយុទ្ធគ្នាជាមួយក្រុមហាម៉ាស់ ប៉ុន្តែមេដឹកនាំទាំងនោះក៏បានជំរុញឲ្យអ៊ីស្រាអែលគោរពច្បាប់មនុស្សធម៌អន្តរជាតិ និងការពារជនស៊ីវិលផងដែរ ។
សេតវិមានបានប្រកាសកាលពីថ្ងៃចន្ទថា ប្រធានាធិបតីសហរដ្ឋអាមេរិកលោក Joe Biden បានជជែកតាមទូរស័ព្ទជាមួយមេដឹកនាំនៃចក្រភពអង់គ្លេស បារាំង អាល្លឺម៉ង់ អ៊ីតាលី និងកាណាដា ហើយមេដឹកនាំទាំងនោះសុទ្ធតែរំឭកពីការគាំទ្ររបស់ពួកគេចំពោះអ៊ីស្រាអែល និងសិទ្ធិការពារខ្លួនប្រឆាំងអំពើភេរវកម្ម ។
ស្របពេលជាមួយគ្នានេះ មេដឹកនាំទាំងអស់ក៏បានអំពាវនាវឲ្យអ៊ីស្រាអែលកាត់បន្ថយផលប៉ះពាល់តិចបំផុតទៅដល់ប្រជាជននៅតំបន់ហ្គាហ្សាស្ទ្រីបផងដែរ ខណៈរដ្ឋាភិបាលរបស់លោកនាយករដ្ឋមន្ត្រី Benjamin Netanyahu កំពុងបង្កើនការវាយប្រហារតាមអាកាសសំដៅលើមូលដ្ឋានរឹងមាំរបស់ក្រុមហាម៉ាស់ ។
ទន្ទឹមនោះ បណ្ដាមេដឹកនាំទាំង ៦ ក៏បានស្វាគមន៍ចំពោះក្បួនរថយន្តសង្គ្រោះមនុស្សធម៌ចំនួន ២០ គ្រឿងដំបូងចូលទៅកាន់តំបន់ហ្គាហ្សា ហើយបានប្តេជ្ញាបន្តការសម្របសម្រួលជាមួយដៃគូក្នុងតំបន់ ដើម្បីធានាឲ្យបាននូវការផ្គត់ផ្គង់អាហារ ទឹក ការថែទាំវេជ្ជសាស្រ្ត និងជំនួយផ្សេងទៀតដើម្បីបំពេញតម្រូវការមនុស្សធម៌ប្រកបដោយស្ថិរភាព ។
ជាចុងក្រោយ មេដឹកនាំទាំងអស់ក៏បានអំពាវនាវឲ្យមានការដោះលែងចំណាប់ខ្មាំងទាំងអស់ជាបន្ទាន់ និងប្តេជ្ញាសម្របសម្រួលយ៉ាងជិតស្និទ្ធដើម្បីគាំទ្រប្រជាជនរបស់ពួកគេ ជាពិសេសអ្នកដែលមានបំណងចាកចេញពីតំបន់ហ្គាហ្សា ៕
គួរបញ្ជាក់ថា ភាពតានតឹងថ្មីដែលបានផ្ទុះឡើងនៅមជ្ឈិមបូព៌ាបានអូសបន្លាយពេលដល់សប្ដាហ៍ទី ២ ហើយ បន្ទាប់ពីក្រុមហាម៉ាស់បានបើកការវាយប្រហារមកលើទឹកដីអ៊ីស្រាអែលចេញពីតំបន់ហ្គាហ្សាស្ទ្រីបកាលពីព្រឹកព្រលឹមថ្ងៃទី៧ ខែតុលា ដោយបានសម្លាប់មនុស្សជាង ១,៤០០ នាក់ ដែលភាគច្រើនជាជនស៊ីវិល ។
ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាស់បាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជាង ៤,៦០០ នាក់ ហើយក្នុងនោះមានក្រុមសកម្មប្រយុទ្ធហាម៉ាស់ជាង ១,៥០០ នាក់នៅក្នុងទឹកដីអ៊ីស្រាអែល ខណៈមនុស្សជាង ១៤,០០០ នាក់បានរងរបួស ៕
ប្រែសម្រួលដោយ ៖ ជីវ័ន្ត
ប្រភព ៖ NHK
ចុចអាន ៖ អាមេរិក បញ្ជាឲ្យបើកដំណើរការប្រព័ន្ធខែលការពារដែនអាកាសនៅទូទាំង តំបន់មជ្ឈិមបូព៌ា
-
ព័ត៌មានជាតិ១ សប្តាហ៍ agoពិធី “រៀបមង្គលការលេង” មួយគូ នៅវត្តបឹងត្រាវ ប្រមូលថវិកាសាងសង់វត្ត អបអរបុណ្យចូលឆ្នាំខ្មែរ
-
ព័ត៌មានជាតិ៦ ថ្ងៃ ago៦ថ្ងៃក្នុងព្រឹត្តិការណ៍ «នគរសង្ក្រាន្ត» មន្ទីរសុខាភិបាលរាជធានីភ្នំពេញ បានពិនិត្យ និងព្យាបាលជូនពលរដ្ឋជាង២ពាន់នាក់
-
ព័ត៌មានអន្ដរជាតិ៣ ថ្ងៃ agoខេត្ត Kochi នៅជប៉ុនផ្តល់ប្រាក់ ១២៥ដុល្លារឲ្យអ្នកនៅលីវ ចំណាយលើការណាត់ចួបបង្កើតស្នេហា
-
ព័ត៌មានអន្ដរជាតិ៤ ថ្ងៃ agoត្រាំ ពន្លះ WSJ ថា ជាសារព័ត៌មានវង្វេងផ្លូវ និងជាកាកសំណល់នយោបាយ
-
ព័ត៌មានអន្ដរជាតិ៣ ថ្ងៃ agoវិមានក្រឹមឡាំង៖ ពូទីន ត្រៀមជួបហ្សេលេនស្គី ទាល់តែមានការចុះហត្ថលេខាលើកិច្ចព្រមព្រៀងសន្តិភាព
-
ព័ត៌មានជាតិ១ សប្តាហ៍ agoបដិសេធមិនឱ្យ សម រង្ស៊ី ចូលរួមការជួបជុំសមាគមខ្មែរនៅប៉ារីស គឺដើម្បីបញ្ចៀសការភ្ជាប់ជាមួយបុគ្គលនេះកំពុងជាប់ទោស
-
សន្តិសុខសង្គម២ ថ្ងៃ agoតុលាការខេត្តកំពត បង្គាប់ឲ្យឃុំខ្លួនមន្ត្រីនគរបាលដែលគប់កែវស្រាលើអ្នកចាប់ទឹកកកដាក់ពន្ធនាគារ
-
ព័ត៌មានជាតិ៥ ថ្ងៃ agoមន្រ្តីបរិស្ថានស្នើពលរដ្ឋកុំបរិភោគត្រីងាប់ និងផ្អាកប្រើប្រាស់ទឹកព្រែកត្រែង នៅស្រុករតនៈមណ្ឌល ខេត្តបាត់ដំបង