ប្រធានសភាតំណាងរាស្រ្តថ្មីរបស់អាមេរិក គឺជាអ្នកប្រឆាំងអ៊ុយក្រែន

លោក Mike Johnson មកពីគណបក្សសាធារណរដ្ឋ ដែលជាអ្នកប្រឆាំងអ៊ុយក្រែន និងជាអ្នកគាំទ្រដ៏មុតមាំរបស់អតីតប្រធានាធិបតីអាមេរិក ដូណាល់ ត្រាំ ត្រូវបានបោះឆ្នោតជ្រើសរើស ជាប្រធានសភាតំណាងរាស្រ្តសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាជិកសភាគណបក្សសាធារណរដ្ឋសរុប២២០នាក់ បានបង្ហាញការគាំទ្រលោក Johnson ក្នុងអំឡុងពេលបោះឆ្នោតកាលពីរសៀលថ្ងៃពុធ (ពេលវេលានៅអាមេរិក)។

ទោះបីជាយ៉ាងណាក៏ដោយ គ្មានអ្នកប្រជាធិបតេយ្យណាម្នាក់ គាំទ្របេក្ខភាពរបស់គាត់ទេ។

រដ្ឋសភាអាមេរិក មិនមានប្រធានឡើយចាប់តាំងពីថ្ងៃទី៣ខែតុលាមក នៅពេលក្រុមអ្នកសាធារណរដ្ឋដឹកនាំដោយលោក Matt Gaetz នៃរដ្ឋ Florida បានបណ្តេញអតីតប្រធានរដ្ឋសភា Kevin McCarthy ដោយលើកឡើង ពីកិច្ចព្រមព្រៀងសម្ងាត់របស់គាត់ ជាមួយសេតវិមានដើម្បីអនុម័តជំនួយបន្ថែមទៀតទៅឲ្យប្រទេសអ៊ុយក្រែន។

ចាប់តាំងពីពេលនោះមក គណបក្ស​សាធារណរដ្ឋ​ដែល​មាន​សំឡេង​ភាគច្រើន ​នៅក្នុង​សភា​បាន​តស៊ូ​ដើម្បី​តែងតាំង​អ្នក​ជំនួសលោក McCarthy។ ការតែងតាំងលោក Jim Jordan មកពីរដ្ឋ Ohio និងលោក Tom Emmer មកពីរដ្ឋ Minnesota ក៏ត្រូវបរាជ័យផងដែរ។

លោក Johnson ជាបុគ្គលម្នាក់ ដែលទទួលបានការរិះគន់ពីសំណាក់អ្នកគាំទ្រអ៊ុយក្រែននៅក្នុងគណបក្សអាមេរិកទាំងពីរ ដោយសារតែគាត់តែងតែរិះគន់ដល់ការផ្តល់ជំនួយរបស់ទីក្រុងវ៉ាស៊ីនតោន ទៅឲ្យទីក្រុងកៀវ ក្នុងសង្គ្រាមជាមួយរុស្ស៊ី។

លោកនិយាយថា “យើងមិនគួរជះលុយ ៤០ពាន់លានដុល្លារបន្ថែមទៀតទៅបរទេសទេ ទាំងដែលព្រំដែនរបស់យើងកំពុងស្ថិតក្នុងភាពវឹកវរ។ ម្តាយជាជនជាតិអាមេរិក កំពុងតស៊ូរកទឹកដោះគោឲ្យកូន, តម្លៃហ្គាសឈានដល់កម្រិតខ្ពស់បំផុត ហើយគ្រួសារអាមេរិក កំពុងតស៊ូរកដំណោះស្រាយជាមួយជីវភាពរស់នៅ”។

គណបក្សប្រជាធិបតេយ្យក៏បានរិះគន់លោក Johnson ផងដែរ ពីព្រោះគាត់ប្រឆាំងនឹងការបញ្ជាក់លទ្ធផលបោះឆ្នោតឆ្នាំ២០២០ ដែលកាលនោះ លោក ចូ បៃដិន ទទួលបានសំឡេងគាំទ្រច្រើនបំផុតមិនធ្លាប់មានក្នុងប្រវត្តិសាស្ត្រអាមេរិក៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Kevin McCarthy ក្លាយជាប្រធានរដ្ឋសភាអាមេរិកទី១ ក្នុងប្រវត្តិសាស្ត្រ២៣៤ឆ្នាំ ដែលត្រូវបោះឆ្នោតទម្លាក់តំណែង