ថៃ កាត់បន្ថយថ្លៃស្នាក់នៅ និងទិដ្ឋាការដល់ពលករ កម្ពុជា រួមជាមួយប្រទេស អាស៊ាន ៣ ទៀត

ក្រសួងការងាររបស់ប្រទេសថៃបានចេញបទបញ្ជាកំណត់តម្លៃថ្មីលើទិដ្ឋាការ និងលិខិតអនុញ្ញាតការងារសម្រាប់ការបន្តស្នាក់នៅរបស់ពលករបរទេសមកពីព្រះរាជាណាចក្រកម្ពុជា រួមជាមួយប្រទេសអាស៊ានចំនួន ៣ ទៀតដូចជា ឡាវ មីយ៉ាន់ម៉ា និងវៀតណាម ។

ក្រសួងការងារថៃបានកាត់បន្ថយតម្លៃទិដ្ឋាការរបស់ពលករមកពីប្រទេសអាស៊ីអាគ្នេយ៍ទាំងនេះពី ២,០០០ បាត (៥៥.៥៦ ដុល្លារអាមេរិក) មកនៅត្រឹម ៥០០ បាត (១៣.៧៩ ដុល្លារ) ខណៈតម្លៃសម្រាប់ការស្នើសុំស្នាក់នៅបណ្តោះអាសន្នវិញកាត់បន្ថយពី ១,៩០០ បាត (៥២.៤១ ដុល្លារ) មក ៥០០ បាត (១៣.៧៩ ដុល្លារ) ដូចគ្នា ។

បទបញ្ជានេះនឹងមានសុពលភាពរយៈពេល ៤ ឆ្នាំ ហើយចូលជាធរមាន និងចាប់ផ្តើមអនុវត្តពីថ្ងៃទី១០ ខែវិច្ឆិកា ឆ្នាំ ២០២៣ តទៅ ខណៈបទបញ្ជានេះគឺត្រូវអនុវត្តចំពោះពលករមកពីប្រទេសទាំង ៤ ដែលចូលមកធ្វើការនៅប្រទេសថៃផ្អែកលើកិច្ចសន្យាការងារ ឬអនុស្សរណៈនៃការយោគយល់គ្នា (MOU) ទាក់ទងនឹងការជ្រើសរើសពលករ ។

ទន្ទឹមនោះ វិធានការនេះមានគោលបំណងដើម្បីធានាបានថា ពលករបរទេសទាំងនោះនឹងមានការងារធ្វើស្របច្បាប់ ក៏ដូចជារួមចំណែកដល់សេដ្ឋកិច្ចរបស់ប្រទេស តាមរយៈការដោះស្រាយបញ្ហាពាក់ព័ន្ធនឹងបញ្ហាអន្តោប្រវេសន៍ខុសច្បាប់ និងស្ថិរភាពទីផ្សារការងារផងដែរ ។

ស្របពេលជាមួយគ្នានេះ ក្រសួងបានសង្កត់ធ្ងន់ទៀតថា បទប្បញ្ញត្តិនេះគឺស្របតាមវិធីសាស្រ្តរបស់រដ្ឋាភិបាលក្នុងការគ្រប់គ្រងការងាររបស់ពលករបរទេស ដើម្បីពង្រឹងការប្រកួតប្រជែងរបស់ប្រទេស និងគាំទ្រដល់ការស្តារសេដ្ឋកិច្ចឡើងវិញ បន្ទាប់ពីជំងឺរាតត្បាតកូវីដ ១៩ ខណៈការកាត់បន្ថយថ្លៃឈ្នួល ក៏ជាមធ្យោបាយមួយដើម្បីសម្រាលបន្ទុកហិរញ្ញវត្ថុទាំងកម្មករ និងនិយោជកផងដែរ ។

យោងតាមព័ត៌មានពីនាយកដ្ឋានរដ្ឋបាលការងារបរទេសរបស់ប្រទេសថៃបានឲ្យដឹងថា គិតត្រឹមក្នុងខែកញ្ញា ប្រទេសថៃមានពលករបរទេសសរុបចំនួន ២,៥៩៣,៤៣៩ នាក់ ហើយនៅមានពលករប្រមាណ ១ លាននាក់ទៀតកំពុងញាប់ដៃញាប់ជើងដាក់ពាក្យស្នើសុំការអនុញ្ញាតធ្វើការងារ ៕

ប្រែសម្រួលដោយ ៖ ជីវ័ន្ត

ប្រភព ៖ VN Express

ចុចអាន ៖ លោក សេដ្ឋា អង្វរករឲ្យពលរដ្ឋថៃ នៅអ៊ីស្រាអែល វិលមកស្រុកវិញ ខណៈស្ថានការណ៍ កាន់តែយ៉ាប់យ៉ឺន