អាមេរិក បើកការសងសឹកនៅស៊ីរី ក្រោយមូលដ្ឋានរបស់ខ្លួនក្នុងតំបន់ ត្រូវវាយប្រហារ

ប្រធានាធិបតីអាមេរិកលោកលោក ចូ បៃដិន បានបញ្ជាឲ្យបើកវាយប្រហារតាមអាកាសប្រឆាំងនឹងឃ្លាំងអាវុធនៅក្នុងប្រទេសស៊ីរី ដែលសង្ស័យថាប្រើប្រាស់ដោយកងឆ្មាំបដិវត្តន៍ឥស្លាមអ៊ីរ៉ង់ (IRGC) និងក្រុមពាក់ព័ន្ធ។ នេះគឺជាការឆ្លើយតបភ្លាមៗរបស់ទីក្រុងវ៉ាស៊ីនតោន ចំពោះការវាយប្រហារដោយដ្រូន និងរ៉ុកកែតលើមូលដ្ឋានរបស់ខ្លួននៅក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ទីរបញ្ចកោណនិយាយក្នុងសេចក្តីថ្លែងការណ៍មួយថា យន្តហោះចម្បាំងអាមេរិក F-15 ចំនួន២គ្រឿង បានធ្វើការវាយប្រហារតាមអាកាសកាលពីថ្ងៃពុធទី៨ខែវិច្ឆិកា នៅភាគខាងកើតប្រទេសស៊ីរី។

ទីស្នាក់ការរបស់សហរដ្ឋអាមេរិកនៅក្នុងប្រទេសស៊ីរី និងមូលដ្ឋានយោធាអ៊ីរ៉ាក់ បានទទួលរងការវាយប្រហារយ៉ាងហោចណាស់៣៨ដងចាប់តាំងពីថ្ងៃទី១៧ខែតុលាមក ដែលនេះឆ្លុះបញ្ចាំងពីការកើនឡើងនៃភាពតានតឹងក្នុងតំបន់ ចំពេលមានសង្គ្រាមអ៊ីស្រាអែល-ហាម៉ាស់។

ទាហាន​អាមេរិក​យ៉ាងតិច​៤៥​នាក់ ​ត្រូវ​របួស​ក្នុង​ការ​វាយប្រហារ​ដោយ​ដ្រូន និង​គ្រាប់​រ៉ុកកែត ហើយការវាយប្រហារកាលពីថ្ងៃទី១៨ខែតុលា ទៅលើមូលដ្ឋានទ័ពអាកាស al-Asad ក្នុងប្រទេសអ៊ីរ៉ាក់ ក៏បានបណ្តាលឲ្យអ្នកម៉ៅការអាមេរិកម្នាក់ បាត់បង់ជីវិតផងដែរ។

ទីក្រុងតេហេរ៉ង់ បានព្រមានម្តងហើយម្តងទៀតថា កងកម្លាំងក្នុងតំបន់ជាច្រើន នឹងមិននៅទំនេរឡើយ ហើយថារណសិរ្សថ្មីនឹងកើតមាន ប្រសិនបើទីក្រុងវ៉ាស៊ីនតោន បន្តគាំទ្រអ៊ីស្រាអែលក្នុងការទម្លាក់គ្រាប់បែករបស់ខ្លួនលើតំបន់ហ្គាហ្សា៕

ប្រែសម្រួល៖ Vann Vann

ប្រភព៖​ RT 

ចុចអាន៖ អាមេរិក ព្រមាន អ៊ីស្រាអែល ប្រឆាំង ការ កាន់កាប់ តំបន់ហ្គាហ្សា សាជាថ្មី