លោក Netanyahu ចេញមុខបកស្រាយ រឿងដែលថា អ៊ីស្រាអែល​ ចង់គ្រប់គ្រងតំបន់ហ្គាហ្សា

លោកនាយករដ្ឋមន្ត្រី Benjamin Netanyahu និយាយបដិសេធថា អ៊ីស្រាអែល មិនចង់គ្រប់គ្រង ហ្គាហ្សា ឡើយប៉ុន្តែតំបន់នេះ ត្រូវតែជាកន្លែងគ្មានយោធា កម្ចាត់ពួករ៉ាឌីកាល់ និងកសាងឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអត្ថាធិប្បាយរបស់លោក កើតឡើងប៉ុន្មានថ្ងៃ បន្ទាប់ពីនាយករដ្ឋមន្ត្រីរូបនេះលើកឡើងថា អ៊ីស្រាអែល អាចដាក់ការគ្រប់គ្រងសន្តិសុខលើតំបន់ប៉ាឡេស្ទីន សម្រាប់រយៈពេលគ្មានដែនកំណត់ នៅពេលសង្រ្គាមជាមួយក្រុមហាម៉ាស ដល់ទីបញ្ចប់។

ក្នុងបទសម្ភាសន៍ជាមួយសារព័ត៌មាន Fox News ដែលចាក់ផ្សាយកាលពីល្ងាចថ្ងៃព្រហស្បតិ៍ទី៩ខែវិច្ឆិកា លោក Netanyahu និយាយថា កងទ័ពអ៊ីស្រាអែល នឹងបន្តការវាយលុករបស់ខ្លួននៅក្នុងតំបន់ហ្គាហ្សា រហូតដល់ក្រុមហាម៉ាស ត្រូវកម្ចាត់ចោលទាំងស្រុង។ លោកអះអាង​ថា “​គ្មាន​អ្វី​អាច​បញ្ឈប់រឿងនេះ​បាន​ទេ”។

ស្របពេលជាមួយគ្នានោះ លោក Netanyahu ក៏បានបញ្ជាក់ជាថ្មីផងដែរថា អ៊ីស្រាអែល នឹងមិនយល់ព្រមចំពោះបទឈប់បាញ់ឡើយ រហូតទាល់តែ មានការដោះលែងចំណាប់ខ្មាំងនៅហ្គាហ្សាទាំងអស់។

ការបញ្ជាក់របស់លោកក៏កើតឡើងផងដែរ បន្ទាប់ពីសហរដ្ឋអាមេរិក បានសម្តែងក្តីព្រួយបារម្ភចំពោះការកាប់កាប់តំបន់ហ្គាហ្សា។

ក្នុងអំឡុងបទសម្ភាសន៍ជាមួយទូរទស្សន៍ CNN កាលពីថ្ងៃអង្គារទី៧ខែវិច្ឆិកា អ្នកនាំពាក្យក្រុមប្រឹក្សាសន្តិសុខជាតិលោក John Kirby បានជំរុញឲ្យអ៊ីស្រាអែល ពិចារណាឡើងវិញនូវការដាក់ពង្រាយយោធាដ៏យូរអង្វែងនៅហ្គាហ្សា។

ទោះមិនលម្អិត តែលោក Kirby គូសបញ្ជាក់ថា “ប្រធានាធិបតីអាមេរិកនៅតែជឿថា ការកាន់កាប់តំបន់ហ្គាហ្សាជាថ្មីដោយកងកម្លាំងអ៊ីស្រាអែល គឺមិនល្អទេ”៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ អាមេរិក​ ព្រមាន​អ៊ីស្រាអែល​ ប្រឆាំង​ការ​កាន់កាប់​តំបន់ហ្គាហ្សា សាជាថ្មី