ចំណូលផ្សាយពាណិជ្ជកម្មរបស់បណ្ដាញសង្គម X ធ្លាក់ចុះនៅសល់ត្រឹម ២.៥ ពាន់លានដុល្លារប៉ុណ្ណោះក្នុងឆ្នាំនេះ

ចំណូល​របស់បណ្តាញសង្គម X ដែលបានមកពីការផ្សព្វផ្សាយពាណិជ្ជកម្មនៅក្នុងឆ្នាំនេះត្រូវបានសារព័ត៌មាន Bloomberg ព្យាករណ៍ថា នឹងធ្លាក់ចុះមកនៅត្រឹមតែ ២.៥ ពាន់លានដុល្លារប៉ុណ្ណោះ ។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកពាក់ព័ន្ធនឹងការធ្លាក់ចុះចំណូលនេះដែរ គឺដោយសារតែក្រុមហ៊ុនជាច្រើនរួមមាន Comcast និង Walt Disney បានផ្អាកការផ្សាយពាណិជ្ជកម្មរបស់ពួកគេនៅលើបណ្តាញ X ចាប់តាំងពីមហាសេដ្ឋី Elon Musk ក្លាយជាម្ចាស់ជាផ្លូវការ ។

Bloomberg បានរាយការណ៍ទៀតថា ក្រុមហ៊ុនរកប្រាក់ចំណូលបានច្រើនជាង ៦០០ លានដុល្លារក្នុងការផ្សាយពាណិជ្ជកម្មនៅក្នុង ៣ ត្រីមាសដំបូងនៃឆ្នាំ ២០២៣ ហើយរំពឹងថា នឹងមានលទ្ធផលស្រដៀងគ្នានៅត្រីមាសចុងក្រោយនេះ ។

ដោយឡែក សម្រាប់ ៤ ឆមាសចុងក្រោយនេះ ពោលគិតពីឆមាសទី ២ នៃឆ្នាំ ២០២១ ដល់ឆមាសទី ២ នៃឆ្នាំ ២០២២ បណ្ដាញសង្គម X រកចំណូលបានសរុប ៤.៧ ពាន់លានដុល្លារពីការផ្សាយពាណិជ្ជកម្ម ។

ប៉ុន្តែលោក Joe Benarroch ប្រធានផ្នែកប្រតិបត្តិការអាជីវកម្មនៅក្រុមហ៊ុន X បានឆ្លើយតបប្រាប់ទៅសារព័ត៌មាន Reuters ថា របាយការណ៍​របស់​ Bloomberg បង្ហាញពីភាពមិនពេញលេញ​នៃអាជីវកម្មរបស់ក្រុមហ៊ុន X ទាំងមូលនោះឡើយ ។

ទន្ទឹមនោះ ចំណូលនៃការផ្សាយពាណិជ្ជកម្មមានចន្លោះពី ៧០ ទៅ ៧៥ ភាគរយនៃប្រាក់ចំណូលសរុបរបស់បណ្ដាញសង្គម X ហើយតាមរយៈរបាយការណ៍នេះ ទើបនាយកប្រតិបត្តិបានកំណត់គោលដៅប្រាក់ចំណូលចំនួន ៣ ពាន់លានដុល្លារពីការផ្សាយពាណិជ្ជកម្មនៅឆ្នាំ ២០២៣ នេះ ។

គួរបញ្ជាក់ថា ចាប់តាំងពីមហាសេដ្ឋី Elon Musk កាន់កាប់ Twitter បច្ចុប្បន្នមានឈ្មោះ X ក្នុងខែតុលា ឆ្នាំ ២០២២ មក ប្រាក់ចំណូលពីការផ្សាយពាណិជ្ជកម្មប្រចាំខែនៅអាមេរិក បានធ្លាក់ចុះយ៉ាងហោចណាស់ ៥៥ ភាគរយជារៀងរាល់ខែ ៕

ប្រែសម្រួល៖ នាង​ រតនៈ

ប្រភព៖ New York Post