ប្រតិបត្តិការផែ​ស្វយ័ត​ភ្នំពេញមានកំណើនខ្ពស់នៅខែមករាដើមឆ្នាំនេះ

​​កំពង់ផែ​ស្វយ័ត​ភ្នំពេញ (PPAP) បានរាយកណ៍អំពីកំណើនប្រតិបតិ្តការអាជីវកម្មរបស់ខ្លួននៅក្នុងខែមករាដើមឆ្នាំនេះ ឆ្លុះបញ្ចាំងអំពីស្ថានភាពកាន់តែប្រសើរឡើងនៃសេដ្ឋកិច្ចសកល តំបន់ និងកម្ពុជា។

របាយការណ៍​មិន​បាន​ធ្វើ​សវនកម្ម ដែល PPAP ផ្ញើ​ទៅ​ផ្សារ​មូលបត្រ​កម្ពុជា​កាល​ពី​ម្សិលមិញ ​ក្នុងខែមករា ឆ្នាំ២០២៥ នេះ ​​​បរិមាណទំនិញ ប្រេងឥន្ធនៈឆ្លងកាត់មានចំនួន ៤៥៦ ៤១៩ តោន កើនឡើងជិត៤៧%ធៀបនឹងរយៈពេលដូចគ្នាកាលពីឆ្នាំមុន ខណៈបរិមានកុងតឺនរ័ឆ្លងកាត់ផែនមានចំនួន ៤៤ ៣៧៩ ធីអ៊ីយូ កើនឡើងជាង៤៨%; បរិមាណនាវាសរុបមានចំនួន ៣០៨គ្រឿង កើនឡើងជាង៣៣។ ជាមួយគ្នានេះដែរ បរិមាណចំនួនអ្នកដំណើរឆ្លងកាត់​សរុប​ចំនួន ៤ ៤៥៣នាក់ កើនឡើងជិត៥% ប៉ុន្តែចំពោះបរិមាណនាវាដឹកអ្នកដំណើរចូលមាន​​​​​​ការថយចុះ១៤% ដោយទទួលបានតែចំនួន៤៣គ្រឿងប៉ុណ្ណោះ។

កាលពីឆ្នាំ២០២៤កន្លងទៅនេះ កំពង់ផែស្វយ័តភ្នំពេញរកចំណូលបានសរុប​ជាង៤១​លានដុល្លារ កើនឡើងជាង២០% ធៀបនឹងឆ្នាំ២០២៣ដែលមានចំណូលសរុបជាង ៣៤លានដុល្លារ។ នេះបើយោងតាមរបាយការណ៍ចំណូលមិនទាន់ធ្វើសវនកម្ម​របស់ខ្លួន៕