ក្រុមហ៊ុន​ Xiaomi បញ្ចេញរថយន្តអគ្គិសនីដំបូងរបស់ខ្លួន​ ជាមួយមហិច្ចតាខ្ពស់

ក្រុមហ៊ុនផលិតស្មាតហ្វូនរបស់ចិន Xiaomi បានបញ្ចេញគម្រូរថយន្តអគ្គិសនីជាលើកដំបូងរបស់ខ្លួន ហើយបានប្រកាសក្តែងៗថា មានបំណងក្លាយជាក្រុមហ៊ុនផលិតរថយន្តកំពូលទាំងប្រាំរបស់ពិភពលោក ។

រថយន្តប្រភេទ Sedan ដែលមានឈ្មោះហៅថា SU7 គឺជាម៉ូដែលដែលរំពឹងនឹងមានទីផ្សារប្រកួតប្រជែងខ្លាំងជាងប្រភេទផ្សេងៗទៀត ជាពិសេសគឺទីផ្សារប្រកួតប្រជែងជាមួយរថយន្ត Tesla និងរថយន្តអគ្គិសនីរបស់ក្រុមហ៊ុន Porsche ។

ការបញ្ចេញរថយន្តពីសំណាក់ក្រុមហ៊ុន Xiaomi ជាលើកដំបូងនេះ គឺចំពេលទីផ្សាររថយន្តពិភពលោកកំពុងជួបប្រទះការធ្លាក់ចុះ​តម្រូវការ និងការប្រកួតប្រជែងតម្លៃជាមួយក្រុមហ៊ុនផលិតឡានអគ្គិសនីផ្សេងៗទៀត ។

ពាក់ព័ន្ធនឹងបញ្ហានេះដែរ នាយកប្រតិបតិ្ត​ក្រុមហ៊ុន Xiaomi លោក Lei Jun បង្ហាញមហិច្ចតាធំ ដោយចង់ក្លាយជាក្រុមហ៊ុនផលិតរថយន្តកំពូលទាំង ៥ របស់ពិភពលោកនៅក្នុងរយៈពេល ១៥ ទៅ ២០ ឆ្នាំខាងមុខ ខណៈក្រុមហ៊ុនសន្យា​ នឹងវិនិយោគទឹកប្រាក់ ១០ ពាន់លានដុល្លារនៅក្នុងពិភពរថយន្ត​អគ្គិសនីមួយនេះក្នុងរយៈពេល ១ សតវត្សរ៍​ ។

គួរបញ្ជាក់ថា រថយន្តម៉ាក Xiaomi នឹងរួមសហការផលិតជាមួយក្រុមហ៊ុន Beijing Automotive Group Co (BAIC Group) នៅក្នុងទីក្រុងប៉េកាំង ខណៈរោងចក្ររបស់ក្រុមហ៊ុនទាំងពីរមានសមត្ថភាពផលិតរថយន្តប្រចាំឆ្នាំបានរហូតដល់ ២០ ម៉ឺនគ្រឿង ៕

ប្រែសម្រួល៖ នាង រតនៈ

ប្រភព៖ CNA