សិស្សសាលាឥណ្ឌាអាយុក្រោម ១០ ឆ្នាំ ១៣ នាក់​លិច​ទូក​ស្លាប់

យ៉ាងហោចណាស់មនុស្ស ១៥ នាក់ រួមទាំងកុមារ ១៣ នាក់បានលង់ទឹកស្លាប់ក្នុងហេតុការណ៍លិចទូកកាលពីថ្ងៃព្រហស្បតិ៍នៅភាគខាងលិចប្រទេសឥណ្ឌា ខណៈអាជ្ញាធរនៅតែបន្តដុតដៃដុតជើងស្វែងរកអ្នកបាត់ខ្លួនបន្ថែមទៀតផងដែរ ។ នេះបើយោងតាមកាតចេញផ្សាយរបស់សារពត៌មាន CNA ចុះផ្សាយនៅថ្ងៃទី១៨ ខែមករានេះ ។

ឧបទ្ទវហេតុនេះបានកើតឡើងនៅក្នុងរដ្ឋ Gujarat នៅពេលដែលសិស្សសាលាកំពុងធ្វើដំណើរទៅញុំាអាហារដែលរៀបចំដោយសាលារបស់ពួកគេ ខណៈមនុស្ស​រាប់សិប​នាក់​បាន​ចូលរួម​រុករក​អ្នក​នៅ​រស់រាន​មានជីវិត​យ៉ាង​អន្ទះសា​ជុំវិញ​បឹង Harni ក្នុងទីក្រុង Vadodara​ ។

​

ទូកនេះដឹកសិស្សចំនួន ២៧ នាក់មានកុមារអាយុក្រោម ១០ ឆ្នាំ រួមជាមួយនឹងគ្រូបង្រៀនម្នាក់ បុគ្គលិកមន្ទីរពេទ្យ និងមន្ត្រីស្រុកម្នាក់ផងដែរ ។ ភ្លាមៗនោះគេមិនទាន់ដឹងមូលហេតុច្បាស់លាស់នៅឡើយទេ​ ប៉ុន្តែបើយោងតាមការចេញផ្សាយរបស់សារព័ត៌មាន​​​ South China Morning Post មូលហេតុទំនងជាបណ្ដាលមកពីការដឹកលើសទម្ងន់ ហើយក្រឡាប់លិចតែម្ដង ។

គួរបញ្ជាក់ថា គ្រោះថ្នាក់​លិចទូកបណ្ដាលឲ្យមនុស្ស​ស្លាប់ ​គឺ​ជា​រឿង​ធម្មតាទៅហើយ​នៅលើ​ផ្លូវទឹករបស់ប្រទេស​ឥណ្ឌាដោយកាលពីឆ្នាំមុន មនុស្សយ៉ាងហោចណាស់ ២២ នាក់បានស្លាប់ នៅពេលដែលទូកទេសចរណ៍ ២ ជាន់បានក្រឡាប់នៅក្នុងរដ្ឋ Kerala ភាគខាងត្បូងប្រទេសនេះ ៕

ដោយ ​៖ ប៊ុន សុភាព