អ្នកការទូតកំពូលរបស់ចិន នឹងពិភាក្សារឿងកោះតៃវ៉ាន់ជាមួយទីប្រឹក្សាសន្តិសុខជាតិអាមេរិក

ទីក្រុងប៉េកាំងបាននិយាយនៅថ្ងៃសុក្រ ទី២៦ ខែមករា នេះថា អ្នកការទូតកំពូលរបស់ចិនលោក Wang Yi នឹងពិភាក្សារឿងកោះតៃវ៉ាន់ជាមួយទីប្រឹក្សាសន្តិសុខជាតិអាមេរិក លោក Jake Sullivan ក្នុងអំឡុងកិច្ចពិភាក្សានៅប្រទេសថៃក្នុងសប្តាហ៍នេះ ។ ការពិភាក្សា នេះក៏ត្រូវបានគេចាត់ទុកថា ជាការស្វែងរកកំណែលម្អទំនាក់ទំនងបន្ទាប់ពីប្រទេសមហាអំណាចទាំងពីរមានភាពតានតឹងជាច្រើនឆ្នាំកន្លងមក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យើងបានដឹងរួចមកហើយថា ទីក្រុងប៉េកាំង និងទីក្រុងវ៉ាស៊ីនតោន បានប៉ះទង្គិចគ្នាក្នុងរយ:ពេលប៉ុន្មានឆ្នាំចុងក្រោយនេះ លើបញ្ហាបច្ចេកវិទ្យា និងពាណិជ្ជកម្ម ក៏ដូចជាជុំវិញបញ្ហាដែនកោះ និងការប្រកួតប្រជែងទាមទារសមុទ្រចិនខាងត្បូង ជាដើម ។ ហើយដើម្បីកែប្រែធ្វើឱ្យទំនាក់ទំនងត្រឡប់ទៅប្រសើរឡើងវិញ លោកប្រធានាធិបតី Joe Biden បានជួបសមភាគីចិនលោក Xi Jinping ក្នុងទីក្រុង San Francisco កាលពីខែវិច្ឆិកា ។

អ្នកនាំពាក្យក្រសួងការបរទេសចិន លោក Wang Wenbin បានប្រាប់សន្និសីទកាសែត នៅថ្ងៃសុក្រ នេះថា អ្នកការទូតកំពូលរបស់ចិនលោក Wang Yi នឹងបញ្ជាក់ពីជំហររបស់ប្រទេសចិនលើទំនាក់ទំនងចិន-អាមេរិក តៃវ៉ាន់ និងបញ្ហាផ្សេងទៀត ហើយនឹងផ្លាស់ប្តូរទស្សនៈជាមួយសហរដ្ឋអាមេរិកលើបញ្ហាអន្តរជាតិ និងតំបន់ដែលធ្លាប់តែមានការព្រួយបារម្ភជាមួយគ្នា” ។

ជាមួយគ្នានេះដែរ សេតវិមានបាននិយាយថា កិច្ចប្រជុំដែលធ្វើឡើងនៅក្រុងបាងកក សម្រាប់សហរដ្ឋអាមេរិក ធ្វើឡើងនៅថ្ងៃសុក្រ សៅរ៍ និងអាចរហូតដល់ថ្ងៃច័ន្ទ ។ ហើយជំនួបជាមួយភាគី ចិនលើកនេះ គឺបន្តការប្តេជ្ញាចិត្តរបស់ភាគីទាំងពីរ កាលជំនួបនៅឯកិច្ចប្រជុំកំពូល Woodside ខែវិច្ឆិកា ឆ្នាំ ២០២៣ រវាងប្រធានាធិបតី Joe Biden និងប្រធានាធិបតី Xi Jinping ដើម្បីរក្សាទំនាក់ទំនងជាយុទ្ធសាស្រ្ត និងគ្រប់គ្រងទំនាក់ទំនងប្រកបដោយការទទួលខុសត្រូវ ។

ប្រែសម្រួលដោយ÷ ប៉ោ កុសល

ប្រភព÷ CNA