ព័ត៌មានអន្ដរជាតិ

ជប៉ុនឈប់ប្រារព្ធបុណ្យអាក្រាតកាយបុរស ក្រោយចំនួនប្រជាជនធ្លាក់ចុះខ្លាំងពេក

បានផុស

២ years មុន

នៅ

ថ្ងៃសុក្រ ២៣ កុម្ភៈ ២០២៤

ដោយ

កាលពីថ្ងៃទី ២០ ខែកុម្ភៈ ទីភ្នាក់ងារសារព័ត៌មាន CNN បានរាយការណ៍ថា អ្នករៀបចំពិធីបុណ្យ Naked man festival ឬ Hadaka ដែលជាពិធីបុណ្យដ៏ល្បីល្បាញនៅក្នុងប្រទេសជប៉ុនបានប្រកាសថា ឆ្នាំនេះជាឆ្នាំចុងក្រោយដែលពិធីបុណ្យនឹងត្រូវប្រារព្ធឡើង។ ពួកគេបានលើកហេតុផលថា មិនអាចស្វែងរកយុវជនមកជំនួសមនុស្សចាស់ដែលចូលរួមពិធីបុណ្យបានទៀងទាត់។ វាជាពិធីបុណ្យមួយផ្សេងទៀតដែលត្រូវបានបញ្ឈប់ដោយសារតែសង្គមវ័យចំណាស់ និងចំនួនប្រជាជនធ្លាក់ចុះ។

ពិធីបុណ្យអាក្រាត វាជាពិធីបុណ្យមួយដែលត្រូវបានប្រារព្ធឡើងអស់រយៈពេលជាង ១,០០០ ឆ្នាំមកហើយ វាគឺជាពិធីបុណ្យមួយដែលបុរសវ័យក្មេងជនជាតិជប៉ុនប្រកួតប្រជែងដើម្បីកាន់កាប់នូវគ្រឿងម្យ៉ាងគេហៅថា shinki ។ វាត្រូវបានគេជឿថាអ្នកឈ្នះគឺជាបុរសដែលមានសំណាងបំផុតនៅឆ្នាំនោះ។ ការប្រណាំងតម្រូវឲ្យអ្នកចូលរួមដោះអាវយឺត ហើយរត់កាត់ទឹកក្នុងអាកាសធាតុត្រជាក់ខ្លាំង។

ទោះយ៉ាងណាក៏ដោយ អ្នករៀបចំកម្មវិធីបានសរសេរសារមួយនៅលើគេហទំព័រដោយបញ្ជាក់ថា ការសម្រេចចិត្តនេះត្រូវបានធ្វើឡើងដោយសារតែអ្នករៀបចំមិនអាចរកឃើញយុវជនដែលមានឆន្ទៈចូលរួមក្នុងពិធីបុណ្យនេះ។ គួបផ្សំនឹងអាយុនៃអ្នកចូលរួមបន្តកើនឡើង។

ថ្វីបើពុំសូវមានអ្នកចូលរួមក៏ពិតមែន ប៉ុន្តែយ៉ាងណាក៏ដោយក៏កម្មវិធីនៅតែរកឃើញអ្នកឈ្នះឆ្នាំនេះ គឺលោក Kikuchi Toshiaki អាយុ ៤៩ ឆ្នាំ ដោយរូបលោកបាននិយាយនៅក្នុងបទសម្ភាសន៍មួយថា “វាជារឿងដ៏សោកសៅសម្រាប់ពិធីបុណ្យនេះត្រូវបានបញ្ចប់។ ខ្ញុំបានចូលរួមដោយសង្ឃឹមថា នេះនឹងក្លាយជាពិធីបុណ្យដែលមិនអាចបំភ្លេចបាន”។

យ៉ាងណាមិញ ចំនួនប្រជាជនរបស់ប្រទេសជប៉ុនបានធ្លាក់ចុះជាបន្តបន្ទាប់ចាប់តាំងពីទសវត្សរ៍ឆ្នាំ ១៩៨០ ហើយជាបញ្ហាដែលតែងតែបង្កការឈឺក្បាលសម្រាប់មេដឹកនាំជប៉ុន។ បន្ថែមពីលើចំនួនប្រជាជនថយចុះ ពួកគេប្រឈមមុខនឹងចំនួនប្រជាជនចាស់ជរា និងការថយចុះកម្លាំងការងារ ក្នុងបញ្ហាប្រឈមក្នុងការផ្តល់ប្រាក់សោធននិវត្តន៍ និងការថែទាំសុខភាព ខណៈដែលតម្រូវការពីប្រជាជនវ័យចំណាស់កើនឡើង៕