លើកដំបូង! ក្រុមហ៊ូធី វាយប្រហារកប៉ាល់ពាណិជ្ជកម្ម បណ្តាលឲ្យមាននាវិកស្លាប់

តាមការចុះផ្សាយរបស់ Fox News, យោធាអាមេរិកអះអាងថា នាវិក៣នាក់ត្រូវបាត់បង់ជីវិត ក្នុងការវាយប្រហាររបស់ក្រុមហ៊ូធី លើកប៉ាលពាណិជ្ជកម្ម True Confidence ក្នុងឈូងសមុទ្រ Aden នៃប្រទេសយេម៉ែន កាលពីថ្ងៃពុធទី៦ខែមីនា ហើយនេះគឺជាលើកដំបូងហើយ ដែលការវាយប្រហាររបស់ក្រុមហ៊ូធី ឈានដល់បណ្តាលឲ្យនាវិកស្លាប់ ចាប់តាំងពីខ្លួនធ្វើសកម្មភាពប្រឆាំងកប៉ាល់ពាណិជ្ជកម្ម ក្នុងដែនទឹកអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កប៉ាល់ True Confidence គឺជាកម្មសិទ្ធិរបស់ក្រុមហ៊ុន True Confidence Shipping SA ដែល ចុះបញ្ជីដាក់អាសយដ្ឋាននៅក្នុងប្រទេសលីបេរីយ៉ា និងដំណើរការដោយក្រុមហ៊ុន Third January Maritime Ltd នៅក្នុងប្រទេសក្រិក។

ក្រោយត្រូវមីស៊ីលបាញ់ កប៉ាល់ True Confidence ដោតទង់ Barbados ត្រូវបានគេបោះបង់ចោល ហើយរសាត់អណ្តែតតែលតោលទាំងមានភ្លើងកំពុងឆេះ។

អ្នកនាំពាក្យក្រុមហ៊ូធីលោក Yahya Saree បានបញ្ជាក់ពីហេតុការណ៍នេះ ដោយនិយាយថា កប៉ាល់ True Confidence ពិតជាត្រូវវាយប្រហារមែន ព្រោះតែនាវិក មិនអើពើនឹងសារព្រមានរបស់កងកម្លាំងជើងទឹកយេម៉ែន។

ស្របពេលជាមួយគ្នានោះដែរ ទីបញ្ជាការកណ្តាលរបស់សហរដ្ឋអាមេរិក (Centcom) ដែលគ្រប់គ្រងប្រតិបត្តិការនៅមជ្ឈិមបូព៌ា បាននិយាយថា ក្រៅពីនាវិក៣នាក់ដែលស្លាប់ ក៏មាននាវិក៤នាក់ទៀតរងរបួសផងដែរ ក្នុងនោះមាន៣នាក់ត្រូវរបួសធ្ងន់។

តាមការបញ្ជាក់ កប៉ាល់នេះ មាននាវិកសរុប២០នាក់ ក្នុងនោះមានជនជាតិឥណ្ឌាម្នាក់ វៀតណាម៤នាក់ និងជនជាតិហ្វីលីពីនចំនួន១៥នាក់ ហើយមានឆ្មាំប្រដាប់អាវុធ៣នាក់ ដោយ២នាក់ជាជនជាតិស្រីលង្កា និងម្នាក់ជាជនជាតិនេប៉ាល់។

សូមរម្លឹកបន្តិច ក្រុមហ៊ូធី ដែលតាំងខ្លួនជារដ្ឋាភិបាលនៃប្រទេសយេម៉ែន បានចាប់ផ្តើមកំណត់គោលដៅលើកប៉ាល់មានទំនាក់ទំនងជាមួយអ៊ីស្រាអែលកាលពីចុងខែតុលា ដើម្បីតវ៉ាចំពោះប្រតិបត្តិការយោធាប្រឆាំងនឹងប៉ាឡេស្ទីននៅតំបន់ហ្គាហ្សា។ ពួកគេ បានតម្រង់មុខព្រួញជាពិសេសលើនាវាអាមេរិកនិងអង់គ្លេសនៅក្នុងខែមករា បន្ទាប់ពីប្រទេសទាំងពីរនេះ បើកការវាយប្រហារតាមផ្លូវអាកាស និងមីស៊ីលប្រឆាំងយេម៉ែន៕

អត្ថបទ៖ សុខ សុវណ្ណ

ចុចអាន៖ ក្រុមហ៊ូធី ដាក់លក្ខខណ្ឌ ឈប់វាយប្រហារកប៉ាល់ពាណិជ្ជកម្ម នៅសមុទ្រក្រហម