UN ៖ មនុស្ស ៧៨៣ លាននាក់ប្រឈមភាពអត់ឃ្លានរ៉ាំរ៉ៃ ខណៈពិភព​លោកកំពុងខ្ជះខ្ជយអាហារ

មនុស្ស ៧៨៣ លាននាក់ប្រឈមនឹងភាពអត់ឃ្លានរ៉ាំរ៉ៃ និងកាន់តែធ្ងន់ធ្ងរ ខណៈដែលពិភពលោកបានខ្ជះខ្ជាយអាហារដែលផលិតទូទាំងពិភពលោកប្រហែល ១៩ ភាគរយ ឬស្មើនឹង ១.០៥ ពាន់លានតោន ។ នេះបើយោងតាមរបាយការណ៍ថ្មីរបស់អង្គការសហប្រជាជាតិ និងចេញផ្សាយដោយសារព័ត៌មាន AP នៅថ្ងៃទី២៨ ខែមីនា​នេះ ។

យោងតាមរបាយការណ៍ពីសន្ទស្សន៍កាកសំណល់អាហារនៃកម្មវិធីបរិស្ថានរបស់អង្គការសហប្រជាជាតិដែលបានចេញផ្សាយកាលពីថ្ងៃពុធបានឲ្យដឹងថា គិតពីឆ្នាំ ២០១៩ ដល់ឆ្នាំ ២០២១ អាហារផលិតនៅទូទាំងពិភពលោកត្រូវបានខ្ជះខ្ជាយប្រមាណ ១៧ ភាគរយ ឬ ១.០៣ ពាន់លានតោនត្រូវបានខ្ជះខ្ជាយ ។

ទន្ទឹមនោះ អ្នកស្រាវជ្រាវបានរកឃើញថា មនុស្សម្នាក់ៗខ្ជះខ្ជាយអាហារប្រហែល ៧៩ គីឡូក្រាមក្នុងមួយឆ្នាំ ស្មើនឹងអាហារយ៉ាងហោចណាស់ ១ ពាន់លានអាហារដែលខ្ជះខ្ជាយទូទាំងពិភពលោកជារៀងរាល់ថ្ងៃ ខណៈភាគច្រើននៃកាកសំណល់ ៦០ ភាគរយបានមកពីក្នុងគ្រួសារ, ប្រហែល ២៨ ភាគរយបានមកពីសេវាកម្មម្ហូបអាហារ ឬភោជនីយដ្ឋាន ហើយប្រហែល ១២ ភាគរយបានមកពីអ្នកលក់រាយ ។

ស្របពេលជាមួយគ្នានោះ របាយការណ៍នេះកើតឡើង ចំពេលដែលមនុស្ស ៧៨៣ លាននាក់នៅជុំវិញពិភពលោកប្រឈមនឹងការស្រេកឃ្លានរ៉ាំរ៉ៃ និងកន្លែងជាច្រើនកំពុងប្រឈមនឹងវិបត្តិអាហារកាន់តែធ្ងន់ធ្ងរ ខណៈសង្គ្រាមរបស់អ៊ីស្រាអែល និងក្រុមហាម៉ាស ក៏ដូចជាអំពើហិង្សានៅក្នុងប្រទេសហៃទីបានធ្វើឲ្យមានវិបត្តិស្បៀងអាហារកាន់តែធ្ងន់ធ្ងរឡើងៗ ។

គួរបញ្ជាក់ថា កាកសំណល់អាហារក៏ជាក្ដីកង្វល់របស់ពិភពលោកផងដែរ ដោយសារតែផលប៉ះពាល់បរិស្ថាននៃផលិតកម្មទាំងនោះរួមមានដី និងទឹកដែលសុទ្ធសឹងតែជាតម្រូវការសម្រាប់ដាំដំណាំ ចិញ្ចឹមសត្វ ខណៈការបំភាយឧស្ម័នផ្ទះកញ្ចក់ រួមទាំងឧស្ម័នមេតាន ជាឧស្ម័នដ៏មានឥទ្ធិពលដែលមានប្រហែល ៣០ ភាគរយនៃការឡើងកម្ដៅផែនដី ចាប់តាំងពីសម័យមុនឧស្សាហកម្មមក ៕

អត្ថបទ៖​ប៊ុន សុភាព