អាមេរិក និងសម្ព័ន្ធមិត្ត ៣ ប្រទេសទៀត ធ្វើសមយុទ្ធរួមគ្នានៅសមុទ្រចិន​ខាងត្បូង

កងកម្លាំងជប៉ុន សហរដ្ឋអាមេរិក ហ្វីលីពីន និងអូស្ត្រាលីបានធ្វើសមយុទ្ធដែនសមុទ្ររួមគ្នាជាលើកដំបូងនៅសមុទ្រចិនខាងត្បូង ចំពេលមានភាពតើនតឹងជាមួយចិន ។ នេះបើយោងតាមការចេញផ្សាយរបស់សារព័ត៌មាន AP នៅថ្ងៃទី​៨ ខែ​ មេសានេះ ។

យោងតាមយោធាហ្វីលីពីន បានហៅសមយុទ្ធនេះថាជា សកម្មភាពសហប្រតិបត្តិការដែនសមុទ្រពហុភាគីលើកដំបូង ដែលបានធ្វើឡើងកាលពីថ្ងៃអាទិត្យក្នុងដែនទឹកនៅតំបន់សេដ្ឋកិច្ចផ្តាច់មុខរបស់ប្រទេសនេះ ។ សមយុទ្ធនេះមានការចួលរួមពីយន្តហោះ នាវាហ្វីលីពីន និងនាវាពិឃាតរបស់កងកម្លាំងការពារដែនសមុទ្រជប៉ុន Akebono ក៏ដូចជានាវាចម្បាំងរបស់សហរដ្ឋអាមេរិក និងអូស្ត្រាលីផងដែរ ។

ទន្ទឹមនោះ សមយុទ្ធនេះក៏បានធ្វើការហ្វឹកហ្វឺនលើផ្នែកទំនាក់ទំនង ក៏ដូចជាសមយុទ្ធផ្សេងទៀតផងដែរដើម្បីបង្កើនសមត្ថភាពធ្វើការរួមគ្នាប្រកបដោយប្រសិទ្ធភាពនៅក្នុងការពង្រឹងសមត្ថភាពការពារដែនសមុទ្ររបស់កងកម្លាំងប្រទេសទាំងបួន ។

ស្របពេលជាមួយគ្នានេះ ប្រមុខ​ការពារជាតិ​នៃ​ប្រទេស​ទាំង​បួន​ក៏បាន​ចេញ​សេចក្តី​ថ្លែងការណ៍​រួម​មួយ ​មុន​ការ​ធ្វើ​សមយុទ្ធដែរ ដោយនិយាយថា ប្រទេសទាំងបួនរក្សាសិទ្ធិសេរីភាពក្នុងការធ្វើនាវាចរណ៍ និងការហោះហើរ ហើយគោរពសិទ្ធិដែនសមុទ្រក្រោមច្បាប់អន្តរជាតិ ដែលបានចែងនៅក្នុងអនុសញ្ញាអង្គការសហប្រជាជាតិស្តីពីច្បាប់សមុទ្រ ។

ចំណែកក្រុមអ្នកវិភាគមួយចំនួនបែរជាលើកឡើងយ៉ាងដូច្នេះវិញថា សមយុទ្ធរួមនេះមានបំណងរារាំងសកម្មភាពរបស់ចិនក្នុងដែនទឹកដែលមានជម្លោះ ខណៈកាលពីខែមុន សមាជិកឆ្មាំសមុទ្រចិនបានបាញ់ទឹកទៅកាន់កប៉ាល់ផ្គត់ផ្គង់ហ្វីលីពីន ២ លើកដែលបណ្ដាលឲ្យសមាជិកនាវិកមួយចំនួនរងរបួស ៕

អត្ថបទ ៖​ ប៊ុន សុភាព