ណាតូ កំពុងត្រៀមខ្លួនធ្វើសង្គ្រាមជាមួយ រុស្ស៊ី

អង្គការណាតូ កំពុងធ្វើសមយុទ្ធ Steadfast Defender នៅជាប់ព្រំដែនរុស្ស៊ី តែម្តង ហេតុដូច្នេះហើយ ទើបទីក្រុងមូស្គូ ចេញការព្រមានខ្លាំងៗថា សមយុទ្ធធំបំផុតចាប់តាំងពីសង្គ្រាមត្រជាក់របស់សម្ព័ន្ធភាពមួយនេះ បានបង្ហាញច្បាស់ៗថា ប្លុកដែលដឹកនាំដោយសហរដ្ឋអាមេរិក កំពុងត្រៀមខ្លួនយ៉ាងយកចិត្តទុកដាក់ជាទីបំផុត សម្រាប់ជម្លោះជាមួយទីក្រុងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈការចុះផ្សាយរបស់ RT, អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានលើកឡើងថា ច្បាស់ណាស់​ សេណារីយ៉ូរបស់សមយុទ្ធសង្គ្រាមនេះ គឺលាតត្រដាងឲ្យឃើញនូវសកម្មភាពរបស់សម្ព័ន្ធប្រឆាំងរុស្ស៊ី ជាមួយការប្រើប្រាស់ឧបករណ៍គ្រប់បែបយ៉ាង រួមទាំងអាវុធកូនកាត់ និងអាវុធធម្មតា។ ដូចនេះ យើងអាចនិយាយបានថា ណាតូ កំពុងខ្នះខ្នែងរៀបចំខ្លួន សម្រាប់សង្គ្រាមជាមួយយើងហើយ។

រម្លឹកទៅខែមីនា លេខាធិការក្រុមប្រឹក្សាសន្តិសុខរុស្ស៊ីលោក Nikolay Patrushev ក៏និយាយដែរថា សមយុទ្ធ Steadfast Defender 2024 របស់ណាតូ កំពុងបង្កើនភាពតានតឹង និងរុញស្ថានការណ៍ពិភពលោកឲ្យអស្ថិរភាព ហើយលោកបានចាត់ទុកប្លុកនេះថាជា ឧបករណ៍ដ៏សំខាន់ដែលសហរដ្ឋអាមេរិកកំពុងប្រើ ដើម្បីដាក់សម្ពាធនិងឥទ្ធិពលលើប្រទេសដទៃទៀត។

ស្របពេលជាមួយគ្នានោះ លោក​សង្កត់​ធ្ងន់​ថា ណាតូ បានចូល​មក​ផ្ទាល់​ដល់​ព្រំដែន​ភាគ​ខាង​លិច​របស់​រុស្ស៊ីទៅហើយ និងថែមទាំង​កំពុង​រៀបចំ​សម្រាប់​ជម្លោះ​នា​ពេល​អនាគត ទៀតផង។

សូមបញ្ជាក់ថា តាមពិតទៅ Steadfast Defender បានចាប់ផ្តើមឡើងតាំងតែពីចុងខែមករាមកម្ល៉េះ ប៉ុន្តែសមយុទ្ធដំណើររហូតដល់ខែឧសភានេះ ទើបចប់។

សមយុទ្ធនេះ មានការចូលរួមពីសំណាក់ទាហានប្រហែល ៩០ ០០០នាក់មកពីប្រទេសជាសមាជិកណាតូទាំង៣២ និងយានប្រយុទ្ធប្រហែល ១ ១០០គ្រឿង៕

អត្ថបទ៖ សុខ សុវណ្ណ

ចុចអាន៖ រុស្ស៊ី ថា សមយុទ្ធណាតូ គឺជាការហាត់សមសម្រាប់ជម្លោះយោធា ជាមួយទីក្រុងមូស្គូ យ៉ាងច្បាស់ក្រឡែត