ព័ត៌មានអន្ដរជាតិ

កូរ៉េខាងត្បូង បង្កើតក្រសួងថ្មី ដោះស្រាយបញ្ហាអត្រាកំណើតទាប

បានផុស

២ years មុន

នៅ

ថ្ងៃសុក្រ ១០ ឧសភា ២០២៤

ដោយ

Chheang

ក្រុងសេអ៊ូល នឹងបង្កើតឲ្យមានក្រសួងថ្មីមួយបន្ថែមទៀត ដើម្បីដោះស្រាយបញ្ហាការធ្លាក់ចុះនៃអត្រាកំណើតក្នុងប្រទេស ដែលកំពុងស្ថិតនៅក្នុងស្ថានភាពប្រកាសអាសន្នថ្នាក់ជាតិ។ នេះបើយោងតាមសេចក្ដីប្រកាសរបស់លោក Yoon Suk Yeol ប្រធានាធិបតីកូរ៉េខាងត្បូង កាលពីថ្ងៃទី៩ ខែឧសភា។

លោក Yoon Suk-yeol ប្រធានាធិបតីកូរ៉េខាងត្បូង (រូបភាព៖ REUTERS)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្រាកំណើតនៅកូរ៉េខាងត្បូង បានធ្លាក់ចុះយ៉ាងគំហុកនៅក្នុងឆ្នាំ២០២៣ ដោយសារតែក្ដីបារម្ភរបស់មនុស្សស្រីភាគច្រើនពាក់ព័ន្ធនឹងអាជីព និងបញ្ហាហិរញ្ញវត្ថុក្នុងការចិញ្ចឹមកូន ដែលកត្តានេះបានក្លាយជានិន្នាការប៉ះពាល់ដល់ប្រជាសាស្ត្រជាតិជាសកល។

លោក Yoon Suk Yeol បានឲ្យដឹងថា ក្រសួងថ្មីនឹងមានឈ្មោះថា “ក្រសួងផែនការប្រឆាំងនឹងអត្រាកំណើតទាប”។ លោកប្រធានាធិបតី បានបន្ថែមថា “យើងនឹងប្រមូលយកគ្រប់សមត្ថភាពជាតិ ដើម្បីដោះស្រាយបញ្ហាអត្រាកំណើតទាប ដែលអាចចាត់ទុកថាជា ភាពអាសន្នថ្នាក់ជាតិ”។

វិបត្តិប្រជាសាស្ត្រនេះ ផ្ដើមចេញពីកត្តាជាច្រើន ប៉ុន្តែកត្តាចម្បងៗដែលរកឃើញមានចំនួន២ គឺពាក់ព័ន្ធនឹងបញ្ហាលុយកាក់ និងការប៉ះពាល់ដល់គុណភាពជីវិតក្នុងភាពជាដៃគូ។ នៅក្នុងឆ្នាំ២០២៣ អត្រាកំណើតនៅក្នុងប្រទេសកូរ៉េខាងត្បូង បានធ្លាក់ចុះមកត្រឹម “០,៧២នាក់នៃចំនួនទារកក្នុងចំណោមមនុស្សស្រីម្នាក់” នៅពេញមួយជីវិតរបស់ពួកគេ។ នេះគឺជាអត្រាធ្លាក់ចុះមិនធ្លាប់មានពីមុនមកនៅក្នុងប្រទេស។

គួរបញ្ជាក់ថា ក្រោមគោលការណ៍របស់រដ្ឋាភិបាលកូរ៉េខាងត្បូង ប្ដីប្រពន្ធដែលមានកូនម្នាក់ នឹងទទួលបាននូវការឧបត្ថម្ភហិរញ្ញវត្ថុចន្លោះពី ២៥ ០០០ដុល្លារ រហូតដល់ជាង ៣៦ ០០០ដុល្លារ រាប់ចាប់ពីកំណើតកូនរហូតដល់ពួកគេមានអាយុ៧ឆ្នាំ។ គោលការណ៍នេះ ក៏មានការចូលរួមពីបណ្ដាក្រុមហ៊ុនឯកជនមួយចំនួនក្នុងប្រទេសកូរ៉េខាងត្បូងផងដែរ ដោយបុគ្គលិកម្នាក់អាចទទួលបានប្រាក់ឧបត្ថម្ភជាង ៧ម៉ឺនដុល្លារ នៅពេលមានគភ៌៕

ដោយ៖ ឈាង

Related Topics:ប្រទេសកូរ៉េខាងត្បូង