លោក Zelensky បញ្ជាក់ប្រាប់គោលបំណងដែល រុស្ស៊ី បើកការវាយប្រហារ​ដំណាក់កាលថ្មីលើ អ៊ុយក្រែន

ប្រធានាធិបតីអ៊ុយក្រែនលោក Volodymyr Zelensky បានថ្លែងតាមរយៈវីដេអូមួយកាលពីថ្ងៃអាទិត្យថា ការវាយប្រហារឆ្លងព្រំដែនរបស់អ្នកចម្បាំងរុស្ស៊ីលើតំបន់ Kharkiv ភាគខាងកើតរបស់ប្រទេសអ៊ុយក្រែនគឺសំដៅធ្វើឲ្យកងកម្លាំងអ៊ុយក្រែនកាន់តែខើចទៅៗ ខណៈដែលការប្រយុទ្ធគ្នាដ៏ខ្លាំងក្លានៅតែបន្តពុះកញ្ជ្រោលក្នុងតំបន់ Donetsk ។ នេះបើយោងតាមការចេញផ្សាយដោយសារព័ត៌មាន Al Jazeera កាលពីថ្ងៃទី១២ ខែឧសភាកន្លងទៅ ។

លោក Zelensky បានលើកឡើងទៀតថា ប្រតិបត្តិការប្រយុទ្ធដ៏ខ្លាំងក្លាកំពុងឆេះរោលនៅសមរភូមិជួរមុខជាច្រើនក្នុងតំបន់ Donetsk បន្ថែមពីលើការបាញ់បោះដាក់គ្នាដែលក៏កំពុងបន្តនៅតំបន់ Kharkiv ហើយលោកប្រធានាធិបតីរូបនេះក៏​បាន​ទទួល​ស្គាល់​ដែរថា អ៊ុយក្រែនពិតជាលំបាកក្នុងការទប់ទល់ជាមួយអ្នកចម្បាំងរុស្ស៊ី ប៉ុន្តែប្ដេជ្ញាចិត្តនឹងបង្អាក់ការវាយប្រហារមួយនេះឲ្យខានតែបាន ។

ក្នុងការវាយលុកដំណាក់កាលថ្មីនៅទីក្រុង Kharkiv នេះដែរ កងកម្លាំងរុស្ស៊ីក៏បានវាយដណ្ដើមយកការតាំងទីលំនៅចំនួន ៤ បន្ថែមទៀតផងដែរ ខណៈអភិបាលនៃតំបន់ Kharkiv បានលើកឡើងកាលពីថ្ងៃអាទិត្យថា ការវាយប្រហាររបស់រុស្ស៊ីនៅភាគខាងជើងនៃតំបន់មួយនេះកំពុងបន្តយ៉ាងសស្រាក់សស្រាំ និងទាំងយប់ទាំងថ្ងៃ ហើយក្នុងអំឡុងពេល ២ ថ្ងៃកន្លងមកនេះ ប្រជាជនប្រហែល ៤,០០០ នាក់ត្រូវបានជម្លៀសចេញ ។

យោងតាមការចេញផ្សាយដោយទីភ្នាក់ងារព័ត៌មាន Reuters បានឲ្យដឹងថា ប្រតិបត្តិការវាយលុកដំណាក់កាលថ្មីរបស់រុស្ស៊ីទៅលើតំបន់ Kharkiv ភាគខាងកើតអ៊ុយក្រែនផ្ទុះឡើងកាលពីថ្ងៃសុក្រសប្ដាហ៍មុន ហើយកងកម្លាំងទីក្រុងមូស្គូប្រើទាំងរថពាសដែក ការទម្លាក់គ្រាប់បែកពីលើអាកាស និងការបាញ់ផ្លោងកាំភ្លើងធំផងដែរក្នុងប្រតិបត្តិសឹកមួយនេះ ។

រីឯក្រុមអ្នកវិភាគមើលឃើញថា ការបង្កើនប្រតិបត្តិការប្រយុទ្ធដំណាក់កាលថ្មីរបស់រុស្ស៊ីលើអ៊ុយក្រែនកើតមានឡើង ក្រោយពេលដែលលោកប្រធានាធិបតី វ្ល៉ាឌីមៀរ ពូទីន ស្បថចូលកាន់តំណែងជាផ្លូវការកាលពីថ្ងៃទី៧ ខែឧសភាកន្លងទៅ ជាពិសេសគេកត់សម្គាល់ពីសុន្ទរកថារបស់លោកពាក់ព័ន្ធនឹងប្រតិបត្តិការសឹកនៅអ៊ុយក្រែន ។

លោក ពូទីន បានលើកឡើងថា “លោកច្បាស់ក្នុងចិត្ត រុស្ស៊ីនឹងលើកទង់ជ័យក្នុងប្រតិបត្តិការយោធានៅអ៊ុយក្រែន ដោយសារតែភាពក្លាហាន និងវីរភាពរបស់អ្នកចម្បាំងរុស្ស៊ី ។ លក្ខខណ្ឌទាំងនេះហើយ ទើបគ្មានអ្វីត្រូវសង្ស័យនោះទេដែលកងកម្លាំងទីក្រុងមូស្គូយកជ័យជម្នះនៅលើសមរភូមិប្រយុទ្ធជាមួយអ៊ុយក្រែន” ។

គិតត្រឹមពេលនេះ ភ្លើងសង្គ្រាមរវាងរុស្ស៊ី និងអ៊ុយក្រែនបានចាយពេលជាង ២ ឆ្នាំហើយ បន្ទាប់ពីកងកម្លាំងរដ្ឋាភិបាលទីក្រុងមូស្គូលើកទ័ពចូលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ខណៈបច្ចុប្បន្នលោកប្រធានាធិបតី Volodymyr Zelensky នៅតែបន្តដើរសុំជំនួយ ក៏ដូចជាសព្វាវុធ និងកែនទាហានជាបន្តបន្ទាប់ពីសម្ព័ន្ធមិត្តសំខាន់ៗដូចជា អឺរ៉ុប និងអាមេរិកជាដើម ។

ទោះបីជាមិនមានព័ត៌មានច្បាស់លាស់អំពីចំនួនអ្នកស្លាប់ និងរបួសក៏ដោយ ប៉ុន្តែតាមការប៉ាន់ប្រមាណរបស់អង្គការសហប្រជាជាតិបានឲ្យដឹងថា ជនស៊ីវិលអ៊ុយក្រែនជាង ១០,០០០ នាក់ត្រូវបានសម្លាប់ ខណៈយោងតាមរបាយការណ៍របស់កាសែត New York Times វិញបានអះអាងថា រហូតមកដល់ពេលនេះទាំងទាហានអ៊ុយក្រែន និងរុស្ស៊ីសរុបចូលគ្នាគឺមានជាង ៥ លាននាក់បានស្លាប់បាត់បង់ជីវិត ៕

ដោយ ៖ សុខ ជីវ័ន្ត

ចុចអាន ៖ រុស្ស៊ី ផ្ទុះការវាយលុកដំណាក់កាលថ្មីលើ អ៊ុយក្រែន ប្រើទាំងរថពាសដែក ទម្លាក់គ្រាប់បែក និងបាញ់កាំភ្លើងធំ