ព័ត៌មានអន្ដរជាតិ

ធនាគារពិភពលោកថា ប្រជាជន អ៊ុយក្រែន ១.៨ លាននាក់ធ្លាក់ក្នុងភាពក្រីក្រ អំឡុងសង្គ្រាមជាមួយ រុស្ស៊ី

បានផុស

២ years មុន

នៅ

ថ្ងៃសុក្រ ៣១ ឧសភា ២០២៤

ដោយ

យោងតាមរបាយការណ៍របស់ធនាគារពិភពលោកបានឲ្យដឹងថា ចំនួនប្រជាជនអ៊ុយក្រែនដែលរស់នៅក្នុងភាពក្រីក្របានកើនឡើងចំនួន ១.៨ លាននាក់ ចាប់តាំងពីឆ្នាំ ២០២០ និងកើនឡើងដល់ប្រហែល ២៩ ភាគរយនៃចំនួនប្រជាជនសរុប ខណៈសង្គ្រាមលុកលុយរបស់រុស្ស៊ីនៅតែបន្តបំផ្លាញសេដ្ឋកិច្ចរបស់ប្រទេស ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី៣១ ខែឧសភានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក Arup Banerji នាយករបស់ធនាគារពិភពលោកប្រចាំតំបន់អឺរ៉ុបខាងកើតបានឲ្យដឹងថា ស្ថានភាពនឹងកាន់តែអាក្រក់ទៅៗ ប្រសិនបើអ៊ុយក្រែនមិនបានទទួលការគាំទ្រថវិកាបរទេសយ៉ាងច្រើន ជាពិសេសពីសហរដ្ឋអាមេរិកដើម្បីផ្តល់ប្រាក់សោធននិវត្តន៍ និងប្រាក់បៀវត្សរ៍សម្រាប់គ្រូបង្រៀន វេជ្ជបណ្ឌិត និងផ្សេងៗទៀតដែលសមស្របនឹងការចំណាយសង្គមទាំងនេះទេ នោះនឹងមានប្រជាជន ៣ លាននាក់ទៀតស្ថិតនៅក្នុងភាពក្រីក្រ ។

របាយការណ៍របស់ធនាគារពិភពលោកបានឲ្យដឹងទៀតថា ប្រជាជនអ៊ុយក្រែនប្រហែល ៩ លាននាក់កំពុងរស់នៅក្នុងភាពក្រីក្រកាលពីឆ្នាំមុន ។ ប្រជាជនសរុបរបស់ប្រទេសនេះត្រូវបានគេប៉ាន់ស្មានថា មានប្រហែល ៣២ លាននាក់ ។ ការកើនឡើងនៃភាពក្រីក្រត្រូវបានជំរុញដោយការថយចុះការងារ ដោយមានមនុស្សច្រើនជាង ១ ភាគ ៥ នៃអ្នកពេញវ័យដែលកំពុងធ្វើការ មុនសង្គ្រាម បានបាត់បង់ការងារធ្វើ ។

យ៉ាងណាថ្មីៗនេះការអនុម័តថវិកាថ្មីរបស់សហរដ្ឋអាមេរិកដល់អ៊ុយក្រែន បន្ទាប់ពីការពន្យារពេលជាច្រើនខែគឺជាព័ត៌មានដ៏ល្អដែលនឹងជួយធានានូវលទ្ធភាពបន្តរបស់អ៊ុយក្រែនក្នុងការរក្សាការបង់ប្រាក់ខែ ប្រាក់សោធននិវត្តន៍ និងជំនួយសង្គម ។ ការអនុម័តនេះបានធ្វើឲ្យ ៩៧ ភាគរយនៃប្រាក់សោធននិវត្តន៍សម្រាប់មនុស្សចាស់ និងការផ្ទេរជំនួយសង្គមចំនួន ៨៥ ភាគរយត្រូវបានបង់ទាន់ពេលវេលា ដែលជាកត្តាសំខាន់ក្នុងការទប់ស្កាត់ការធ្លាក់ចូលទៅក្នុងភាពក្រីក្រកាន់តែច្រើន ។

គួរបញ្ជាក់ថា តាមបើយោងលោក Banerji បញ្ហាប្រឈមដ៏ធំបំផុតរបស់អ៊ុយក្រែន គឺការរក្សាសន្តិសុខ និងបញ្ចប់សង្រ្គាម ព្រោះមិនមានភាពរីកចម្រើនផ្នែកសេដ្ឋកិច្ច ឬកំណើនសេដ្ឋកិច្ចដោយគ្មានសន្តិសុខរូបវន្តនោះទេ ទោះបីជាយ៉ាងណាមន្ត្រីអ៊ុយក្រែនបានធ្វើការងារយ៉ាងល្អក្នុងការដំណើរការសេដ្ឋកិច្ច បើទោះបីជាមានសង្គ្រាមក៏ដោយ ៕