ស្លាប់​២​ករណី​ហើយ ដោយសារដាច់សរសៃឈាមខួរក្បាល ព្រោះ​រលក​កម្ដៅ​ខ្លាំង​នៅ​ប្រទេសស៊ីប

យោងតាមក្រសួងសុខាភិបាលប្រទេសស៊ីប បានឲ្យដឹងថាមនុស្សវ័យចំណាស់ទីពីរម្នាក់បានស្លាប់ដោយសារជំងឺដាច់សរសៃឈាមខួរក្បាល បន្ទាប់ពីរលកកម្តៅខ្លាំងវាយប្រហាររយៈពេលមួយសប្តាហ៍ ដែលបានធ្វើឱ្យប្រទេសកោះមេឌីទែរ៉ាណេភាគខាងកើតនេះមានសីតុណ្ហភាពខ្ពស់បំផុតក្នុងខែមិថុនា។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៧ ខែ មិថុនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យអង្គការសេវាសុខភាពរដ្ឋបានឲ្យដឹងថា ស្ត្រីអាយុ ៨៤ ឆ្នាំម្នាក់បានស្លាប់មួយថ្ងៃបន្ទាប់ពីការចូលសម្រាក​ព្យាបាលនៅមន្ទីរពេទ្យកាលពីថ្ងៃសុក្រ។ នៅមានអ្នកជំងឺ​ចាស់​បី​នាក់​ទៀត​កំពុងស្ថិតនៅក្នុងសភាព​ធ្ងន់ធ្ងរ។ប្រទេសក៏កំពុងមានចំនួនប្រជាជនចូលមន្ទីរពេទ្យបានកើនឡើង ខណៈសីតុណ្ហភាពនៅលើកោះបានកើនឡើងពេញមួយសប្តាហ៍លើសពី ៤០ អង្សាសេ។

ស្របពេលជាមួយគ្នានេះ សីតុណ្ហភាពកើនឡើង និងខ្យល់បក់ខ្លាំងក៏បានបង្អាក់កិច្ចខិតខំប្រឹងប្រែងពន្លត់អគ្គីភ័យ រួមទាំងនៅតំបន់ភ្នំមួយភាគនិរតីនៃរដ្ឋធានី Nicosia ជាតំបន់ព្រៃឈើជាង ៣,២ គីឡូម៉ែត្រការ៉េ ត្រូវបានឆេះ។ កាលពីសប្តាហ៍មុន អ្នកស្រុកចំនួន ៤៩ នាក់នៅក្នុងសហគមន៍ចំនួនពីរនៅស្រុក Paphos ភាគខាងលិចនៃកោះនេះក៏ត្រូវបានជម្លៀសទៅកាន់សណ្ឋាគារ ដោយសារភ្លើងឆេះព្រៃផងដែរ ខណៈដែលយន្តហោះមកពីប្រទេសក្រិក និងហ្ស៊កដានីបានចូលរួមក្នុងកិច្ចខិតខំប្រឹងប្រែងពន្លត់អគ្គីភ័យនេះ។

គួរបញ្ជាក់ថា ​មួយរយៈចុងក្រោយនេះ សីតុណ្ហភាពនៅទូទាំងពិភពលោកមានការកើនឡើងគួរឲ្យកត់សម្គាល់​ ក្រៅពីប្រទេសស៊ីបក៏មានប្រទេសដូចជាប្រទេសឥណ្ឌា​ បង់ក្លាដែស ក្រិក ​និង សហរដ្ឋអាមេរិកនៅតំបន់មួយចំនួន ដែលកំពុងប្រឈមនឹងរលកកម្ដៅខ្លាំងវាយលុកបណ្ដាលឲ្យមានមនុស្សស្លាប់ដោយសារជំងឺដាច់សរសៃរឈាមខួរក្បាល និងបង្កើនហានិភ័យភ្លើងឆេះព្រៃផងដែរ៕

អត្ថបទ៖ ប៊ុន សុភាព