ព័ត៌មានអន្ដរជាតិ

ហាម៉ាស ថា ពួកគេមិនដកខ្លួនចេញពីកិច្ចចរចាបទឈប់បាញ់ទេ ទោះអ៊ីស្រាអែលវាយមិនបន្ធូរដៃ

បានផុស

៩ ខែ មុន

នៅ

ថ្ងៃចន្ទ ១៥ កក្កដា ២០២៤

ដោយ

Chheang

ក្រុមហាម៉ាស កាលពីថ្ងៃទី១៤ ខែកក្កដា បានបញ្ជាក់ជំហរជាថ្មីម្ដងទៀតថា ពួកគេមិនបានដកខ្លួនចេញពីកិច្ចចរចាបទឈប់បាញ់ជាមួយអ៊ីស្រាអែលនោះទេ ថ្វីដ្បិតមានការវាយប្រហារដ៏សាហាវរបស់អ៊ីស្រាអែលកាលពីចុងសប្តាហ៍ទៅលើតំបន់ហ្គាហ្សា ដើម្បីកម្ចាត់មេដឹកនាំរបស់ក្រុមម៉ាហាសម្នាក់គឺលោក Mohammed Deif ក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះមិនមានបំណងបញ្ឈប់កិច្ចចរចាបទឈប់បាញ់ ក្រុមហាម៉ាសបានចោទប្រកាន់អ៊ីស្រាអែល ថាបានព្យាយាមបង្អាក់កិច្ចខិតខំប្រឹងប្រែងបទឈប់បាញ់របស់ក្រុមអ្នកសម្របសម្រួលអារ៉ាប់ និងសហរដ្ឋអាមេរិក ដោយបង្កើនសកម្មភាពវាយប្រហាររបស់ខ្លួននៅតំបន់ហ្គាហ្សា។

ការវាយប្រហារកាលពីថ្ងៃសៅរ៍នៅក្នុងទីក្រុង Khan Younis នៃតំបន់ហ្គាហ្សា ដែលក្នុងនោះយ៉ាងហោចណាស់មានជនជាតិប៉ាឡេស្ទីនចំនួន ៩០នាក់ត្រូវបានសម្លាប់ បានធ្វើឲ្យកិច្ចចរចាបទឈប់បាញ់ស្ថិតនៅក្នុងភាពស្រពេចស្រពិល ខណៈកាលពីពេលថ្មីៗកន្លងទៅ មានសញ្ញាវិជ្ជមានល្អពាក់ព័ន្ធនឹងកិច្ចព្រមព្រៀងបទឈប់បាញ់ ដែលអាចឈានទៅដល់ការបញ្ឈប់ការវាយប្រហារ និងការដោះលែងចំណាប់ខ្មាំងដែលត្រូវបានចាប់ខ្លួននៅតំបន់ហ្គាហ្សា។

យោធាអ៊ីស្រាអែល បាននិយាយកាលពីថ្ងៃអាទិត្យថា ក្នុងការវាយប្រហារកាលពីថ្ងៃសៅរ៍ ខ្លួនបានសម្លាប់លោក Rafa Salama មេបញ្ជាការកងពលតូចក្រុង Khan Younis របស់ក្រុមហាម៉ាស ប៉ុន្តែអ៊ីស្រាអែលមិនបានបញ្ជាក់អំពីជោគវាសនារបស់លោក Deif នោះទេ។

សូមបញ្ជាក់ថា កាលពីដើមខែកក្កដា ក្រុមហាម៉ាស បានប្រកាសទទួលយកការចរចាសម្រេចឲ្យបាននូវដំណាក់កាលដំបូងនៃផែនការបទឈប់បាញ់៣ដំណាក់កាលរបស់អាមេរិក ដែលដំណាក់កាលទី១នេះមានរយៈពេល៦សប្ដាហ៍ ទាមទារឲ្យមានការឈប់បាញ់ទាំងស្រុង និងពេញលេញ ហើយក៏មានការដកកងកម្លាំងអ៊ីស្រាអែលចេញពីតំបន់ហ្គាហ្សា ព្រមទាំងដោះលែងចំណាប់ខ្មាំងមួយចំនួន ដូចជា ស្ត្រី មនុស្សចាស់ និងអ្នករងរបួស។

ប្រភពពីយោធាក្រុមហាម៉ាស បានឲ្យដឹងថា សំណើទទួលយកដំណាក់កាលដំបូងនេះ អាចឈានទៅរកកិច្ចព្រមព្រៀងក្របខណ្ឌ ប្រសិនបើភាគីអ៊ីស្រាអែលយល់ព្រមទទួលយក ហើយវានឹងបើកផ្លូវឲ្យមានការបញ្ចប់សង្គ្រាមទាំងស្រុង៕

ដោយ៖ ឈាង

Related Topics:សង្គ្រាមអ៊ីស្រាអែល-ប៉ាឡេស្ទីន