ព័ត៌មានអន្ដរជាតិ

កូរ៉េខាងត្បូងចាប់ផ្ដើមបំពងសំឡេងឃោសនាឆ្លងព្រំដែនជាថ្មី ឆ្លើយតបចំពោះការបាញ់បង្ហោះប៉េងប៉ោងយោងសំរាមរបស់កូរ៉េខាងជើង

បានផុស

២ ខែ មុន

នៅ

ថ្ងៃសុក្រ ១៩ កក្កដា ២០២៤

ដោយ

កូរ៉េខាងត្បូងបានចាប់ផ្តើមបំពងសំឡេងឃោសនាសំដៅទៅកាន់ប្រទេសកូរ៉េខាងជើងឡើងវិញ ដើម្បីសងសឹកនឹងការបង្ហោះប៉េងប៉ោងយោងសំរាមចុងក្រោយរបស់កូរ៉េខាងជើង ដែលជាការបន្តនៃយុទ្ធសាស្ត្របែបសង្គ្រាមត្រជាក់ទៅវិញទៅមករវាងប្រទេសទាំងពីរ។ នេះបើយោងតាមការចេញផ្សាយរបស់ទីភ្នាក់ព័ត៌មាន AP នៅថ្ងៃទី ១៩ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គសេនាធិការចម្រុះរបស់កូរ៉េខាងត្បូងបានឲ្យដឹងថា កូរ៉េខាងត្បូងបានប្រើប្រាស់ឧបករណ៍បំពងសំឡេង ដើម្បីបន្លឺសំឡេងខ្លាំងៗប្រឆាំងនឹងទីក្រុងព្យុងយ៉ាងនៅតាមព្រំដែនឡើងវិញកាលពីល្ងាចថ្ងៃព្រហស្បតិ៍ និងព្រឹកថ្ងៃសុក្រ។ ការបំពងសំឡេងជាថ្មីនេះ គឺជាប្រតិកម្មទៅនឹងប្រទេសកូរ៉េខាងជើងដែលបានបង្ហោះប៉េងប៉ោងយោងសម្រាមចូលទឹកដឹកូរ៉េខាងត្បូងកាលពីរសៀលថ្ងៃព្រហស្បតិ៍ ខណៈការបង្ហោះប៉េងប៉ោងបែបនេះកើតឡើង៧លើកក្នុងរយៈពេលប៉ុន្មានខែថ្មីៗនេះ។

កូរ៉េខាងត្បូងចាក់ផ្សាយសំឡេងដំបូងមានរយៈពេលប្រហែល៤០ថ្ងៃ ខណៈខ្លឹមសារនៃការផ្សាយមិនត្រូវបានគេដឹងភ្លាមៗនោះទេ ប៉ុន្តែការចាក់ផ្សាយពីមុនកាលថ្ងៃទី៩ ខែមិថុនា រួមមានបទចម្រៀង K-pop ការព្យាករណ៍អាកាសធាតុ និងព័ត៌មានអំពី Samsung ដែលជាក្រុមហ៊ុនធំបំផុតរបស់កូរ៉េខាងត្បូង ក៏ដូចជាការរិះគន់ពីកម្មវិធីមីស៊ីលរបស់កូរ៉េខាងជើង ។

ការផ្សាយរបស់កូរ៉េខាងត្បូងអាចបង្កឱ្យមានការឆ្លើយតបដ៏ខឹងសម្បារពីកូរ៉េខាងជើង ខណៈប្រទេសនេះមានភាពរសើបខ្លាំងចំពោះការប៉ុនប៉ងពីខាងក្រៅណាមួយដើម្បីបំផ្លាញប្រព័ន្ធនយោបាយរបស់ខ្លួន។ កាលពីឆ្នាំ ២០១៥ នៅពេលដែលកូរ៉េខាងត្បូងចាប់ផ្តើមការផ្សាយសំឡេងខ្លាំងជាលើកដំបូងក្នុងរយៈពេល១១ឆ្នាំមិនធ្លាប់មាន កូរ៉េខាងជើងបានបាញ់កាំភ្លើងធំឆ្លងកាត់ព្រំដែនដែលជំរុញឱ្យកូរ៉េខាងត្បូងបាញ់តបតវិញ៕