ជំងឺ Mpox Clad 1 ដ៏គ្រោះថ្នាក់ ចាប់ផ្តើមរាលដាលចេញពីអាហ្វ្រិក

ប៉ុន្មានម៉ោងប៉ុណ្ណោះបន្ទាប់ពីអង្គការសុខភាពពិភពលោក (WHO) ប្រកាសអាសន្នជាសកលថា Mpox គឺជាជំងឺរាតត្បាតគួរឲ្យព្រួយបារម្ភ​ ស្រាប់តែប្រទេសស៊ុយអែត បានរកឃើញករណីទី១របស់ខ្លួន ហើយនេះគឺជាករណីឆ្លងលើកដំបូងនៃវីរុសជំនាន់ថ្មីដ៏គ្រោះថ្នាក់ (Clad 1) នៅខាងក្រៅទ្វីបអាហ្វ្រិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Mpox គឺជាមេរោគដែលមានឈ្មោះដើម Monkeypox ហើយវាត្រូវចែកចេញជា២ថ្នាក់ មួយគេហៅថា Clad 1 និងមួយទៀតគឺ Clade 2។ វីរុសថ្នាក់ Clade 2 គឺជាជំនាន់ចាស់ដែលរីករាលដាលតាំងតែពីឆ្នាំ២០២២មក ហើយមិនសូវធ្ងន់ធ្ងរទេ ប៉ុន្តែវីរុស Clad 1 នាពេលនេះ គឺជាមេរោគជំនាន់ថ្មីដែលធ្ងន់ធ្ងរ និងកាចសាហាវជាងមុន។

តាមការចុះផ្សាយរបស់ RT នៅថ្ងៃសុក្រទី១៦ខែសីហាឆ្នាំ២០២៤, ក្រសួងសុខាភិបាលស៊ុយអែត បានរកឃើញករណីលើកដំបូងនៃ Mpox Clad1 លើបុគ្គលដែលទើបវិលត្រឡប់មកពីទ្វីបអាហ្វ្រិក ហើយបច្ចុប្បន្ន កំពុងទទួលការព្យាបាលនៅទីក្រុង ស្តុកខុល។

ត្បិតតែមានក្តីបារម្ភថា អាចមានមនុស្សផ្សេងទៀតនៅស៊ុយអែត ឆ្លងជំងឺនេះរួចហើយក៏ដោយ ប៉ុន្តែក្រសួងអំពាវនាវឲ្យគ្រប់គ្នា កុំទាន់ព្រួយខ្លាំងពេកចំពោះរឿងនេះ។

វ៉ាក់សាំងក៏​មានទុកចាក់ឲ្យ​អ្នក​មាន​ហានិភ័យ​ខ្លាំង​បំផុតឬ​អ្នក​ដែល​មាន​ទំនាក់ទំនង​ជិត​ស្និទ្ធ​ជាមួយ​អ្នក​ឆ្លង​រោគដែរ ប៉ុន្តែ​ក្រុម​ជំនាញ​បារម្ភ​ថា បច្ចុប្បន្នវ៉ាក់សាំងមិនទាន់មានគ្រប់គ្រាន់សម្រាប់ចាក់លើមនុស្សគ្រប់គ្នានោះទេ។

ជំងឺនេះចេញរោគសញ្ញាដូចជំងឺគ្រុនផ្តាសាយ ដំបៅស្បែក និងអាចស្លាប់បាន។​ វាឆ្លងតាមរយៈទំនាក់ទំនងជិតស្និទ្ធ ដូចជារួមភេទ ប៉ះពាល់ស្បែកទល់ស្បែក និងការនិយាយឬដកដង្ហើមនៅជិតមនុស្សម្នាក់ទៀត។

មនុស្សយ៉ាងតិច៤៥០នាក់ បានស្លាប់ពេលជំងឺ Mpox ផ្ទុះឡើងដំបូងនៅសាធារណរដ្ឋប្រជាធិបតេយ្យកុងហ្គោ ហើយចាប់តាំងពីពេលនោះមក វាបានរីករាលដាលដល់តំបន់អាហ្វ្រិកកណ្តាល និងខាងកើត៕

អត្ថបទ៖ សុខ សុវណ្ណ

ចុចអាន៖ WHO ប្រកាសអាសន្នជាសកល ចំពោះជំងឺ Mpox