រកឃើញសពមហាសេដ្ឋីអង់គ្លេស ដែលជួបសោកនាដកម្ម លិចទូកទេសចរណ៍

សារព័ត៌មាន BBC ចុះផ្សាយនៅថ្ងៃព្រហស្បតិ៍ទី២២ខែសីហាឆ្នាំ២០២៤ថា សាកសពចំនួន៥នាក់ ត្រូវបានរកឃើញក្នុងសោកនាដកម្មលិចទូកមហាសេដ្ឋីអង់គ្លេស ដោយសាកសពទាំងនោះក៏មានទាំងលោក Mike Lynch និងកូនស្រីវ័យជំទង់របស់គាត់ឈ្មោះ Hannah ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូកទេសចរណ៍ Bayesian ផ្ទុកមនុស្ស២២នាក់ បានឈប់នៅក្បែរកំពង់ផែ Porticello នៃប្រទេសអ៊ីតាលី ពេលដែលព្យុះកំបុតត្បូងវាយប្រហារ។

ប្រធានទីភ្នាក់ងារការពារជនស៊ីវិលកោះ Sicily លោក Salvatore Cocina បញ្ជាក់ថា ការស្វែងរកអ្នកបាត់ខ្លួនផ្សេងទៀតត្រូវផ្អាកសិន ប៉ុន្តែនឹងបន្តវិញនៅថ្ងៃស្អែក។

ទូកដែលដឹកនាវិក១២នាក់ និងអ្នកដំណើរ១០នាក់មួយគ្រឿងនេះ បានលិចនៅព្រឹកព្រលឹមថ្ងៃចន្ទ ខណៈរហូតមកដល់ពេលនេះ មនុស្សចំនួន១៥នាក់ត្រូវបានជួយសង្គ្រោះ ក្នុងនោះរួមមានទាំងប្រពន្ធរបស់លោក Lynch ផងដែរ។

អ្នក​ជំនាញ​ខាង​ទូកកម្សាន្ត​អះអាង​ថា ទូក​ដែល​លិចនេះគឺស្ថិត​ក្នុង​ចំណោមទូកដែលមាន “សុវត្ថិភាព​បំផុត” លើពិភពលោក ហើយក្រុមអ្នកស៊ើបអង្កេត កំពុងធ្វើការលើរឿងនេះយ៉ាងយកចិត្តទុកដាក់ជាទីបំផុត។

សូមបញ្ជាក់ថា ឧប្បត្តិហេតុនេះបានកើតឡើងនៅពេលលោក Lynch វ័យ៥៩ឆ្នាំ កំពុងរីករាយនឹងដំណើរកម្សាន្ត ដើម្បីអបអរសាទរការឈ្នះក្តី លើសំណុំរឿងឆបោកទឹកប្រាក់១០.៨ពាន់លានដុល្លារ នៃការលក់ក្រុមហ៊ុន Autonomy របស់គាត់ទៅក្រុមហ៊ុនកំព្យូទ័រអាមេរិក Hewlett-Packard៕

អត្ថបទ៖ សុខ សុវណ្ណ

ចុចអាន៖ មហាសេដ្ឋីបច្ចេកវិទ្យាអង់គ្លេសបាត់​ខ្លួន​ក្នុងហេតុការណ៍​លិច​កប៉ាល់​​