ព័ត៌មានអន្ដរជាតិ

ដោយគ្មានវត្តមានអាមេរិក អង់គ្លេស កោះប្រជុំប្រទេស៣៥ ប៉ងបើកច្រក Hormuz

បានផុស

៣ ខែ មុន

នៅ

ថ្ងៃព្រហស្បតិ៍ ២ មេសា ២០២៦

ដោយ

អង់គ្លេសនឹងកោះប្រជុំតាមអ៊ីនធឺណិតនៅថ្ងៃព្រហស្បតិ៍នេះដែលមានប្រទេសចំនួន ៣៥ ចូលរួម ដោយមិនរាប់បញ្ចូលសហរដ្ឋអាមេរិក ដើម្បីស្វែងរកវិធីបើកច្រកសមុទ្រ Hormuz ឡើងវិញ ដែលជាផ្លូវដឹកជញ្ជូនដ៏សំខាន់សម្រាប់ប្រេង និងឧស្ម័ន ត្រូវបានបំផ្លាញដោយសង្គ្រាមមជ្ឈិមបូព៌ា។ នេះបើយោងតាមការចុះផ្សាយរបស់ theguardian នាថ្ងៃទី២ ខែមេសា។

**នាយករដ្ឋមន្ត្រីអង់គ្លេស លោក Keir Starmer (រូបភាព៖Reuters)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយករដ្ឋមន្ត្រីអង់គ្លេស លោក Keir Starmer បាននិយាយថា ដំណាក់កាលបន្ទាប់នៃការពិភាក្សានៅក្នុងកិច្ចខិតខំប្រឹងប្រែងរួមគ្នារបស់អង់គ្លេស និងបារាំង ដើម្បីធានាផ្លូវទឹកនេះនឹងត្រូវធ្វើឡើងនៅថ្ងៃព្រហស្បតិ៍ ដោយមានរដ្ឋមន្ត្រីការបរទេសលោកស្រី Yvette Cooper រួមជាមួយមេដឹកនាំអន្តរជាតិជាច្រើន។

លោក Starmer បាននិយាយកាលពីថ្ងៃពុធថា កិច្ចប្រជុំនេះនឹងប្រមូលផ្តុំប្រទេសចំនួន ៣៥ ដើម្បី វាយតម្លៃវិធានការការទូត និងនយោបាយដែលអាចអនុវត្តបានទាំងអស់ ដែលយើងអាចអនុវត្ត ដើម្បីស្តារសេរីភាពនៃការធ្វើនាវាចរណ៍ ធានាសុវត្ថិភាពរបស់កប៉ាល់ និងនាវិកដែលជាប់គាំង និងដើម្បីបន្តចលនាទំនិញសំខាន់ៗឡើងវិញ។

នាយករដ្ឋមន្ត្រីអង់គ្លេសបញ្ចាក់បន្ថែមទៀតថា បន្ទាប់ពីកិច្ចប្រជុំនោះ លោកក៏នឹងកោះប្រជុំអ្នករៀបចំផែនការយោធា ដើម្បីពិនិត្យមើលពីរបៀបដែលអាចរៀបចំសមត្ថភាព និងធ្វើឲ្យច្រកសមុទ្រនេះងាយស្រួលចូលដំណើរការបាន និងមានសុវត្ថិភាព បន្ទាប់ពីការប្រយុទ្ធគ្នាបានបញ្ឈប់។

យ៉ាងណាមិញ កិច្ចប្រជុំនេះនឹងកោះប្រជុំប្រទេសដែលបានចុះហត្ថលេខាលើសេចក្តីថ្លែងការណ៍រួមកាលពីខែមុន ក៏ដូចជាសម្ព័ន្ធមិត្តអឺរ៉ុបផ្សេងទៀត។ ប្រទេសជាច្រើនទៀតបានចូលរួមចាប់តាំងពីពេលនោះមក រួមមានចក្រភពអង់គ្លេស បារាំង អាល្លឺម៉ង់ អ៊ីតាលី និងហូឡង់ ក៏ដូចជាអូស្ត្រាលី ជប៉ុន កាណាដា កូរ៉េខាងត្បូង នូវែលសេឡង់ អេមីរ៉ាតអារ៉ាប់រួម និង នីហ្សេរីយ៉ា៕

អត្ថបទ៖ សាង ស្រីល័ក្ខ