ព័ត៌មានអន្ដរជាតិ

អ៊ុយក្រែនបង្កើតរោងចក្រផលិតដ្រូននៅអង់គ្លេស ដោយសាររុស្ស៊ីវាយប្រហារខ្លាំងពេក

បានផុស

៣ ខែ មុន

នៅ

ថ្ងៃព្រហស្បតិ៍ ២៦ កុម្ភៈ ២០២៦

ដោយ

ឯកអគ្គរដ្ឋទូតអ៊ុយក្រែន លោក Valeriy Zaluzhnyi បាននិយាយនៅថ្ងៃពុធថា រោងចក្រផលិតយន្តហោះគ្មានមនុស្សបើក (Drone) ដំបូងគេរបស់អ៊ុយក្រែន បានចាប់ផ្តើមប្រតិបត្តិការរបស់ខ្លួននៅក្នុងប្រទេសអង់គ្លេស។ នេះបើយោងតាមការចេញផ្សាយរបសរ៉យទ័រថ្ងៃទី ២៥ខែមករាឆ្នាំ២០២៦ ។

លោក ហ្សេលេនស្គី និង លោក Keir Starmer ក្នុងរោងចក្រនៅអង់គ្លេស។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Zaluzhnyi អតីតមេបញ្ជាការកងកម្លាំងប្រដាប់អាវុធអ៊ុយក្រែននិយាយថា ក្រុមហ៊ុនផលិតយន្តហោះគ្មានមនុស្សបើក Ukrspecsystems បង្កើតឡើងក្នុងឆ្នាំ ២០១៤ បានបង្ហាញពីប្រសិទ្ធភាពនៃយន្តហោះគ្មានមនុស្សបើករបស់ខ្លួននៅជួរមុខ។

លោក Zaluzhnyi និយាយលើកម្មវិធី Telegram ថា៖«អ៊ុយក្រែនកំពុងប្រយុទ្ធប្រឆាំងនឹងសង្គ្រាមមួយ ចំពេលមានការវាយប្រហារដោយមីស៊ីលឥតឈប់ឈរ ការបំផ្លាញហេដ្ឋារចនាសម្ព័ន្ធ និងការគំរាមកំហែងដល់កន្លែងផលិត។ ដូច្នេះ ការចាប់ផ្តើមផលិតកម្មនៅចក្រភពអង់គ្លេសមានយុទ្ធសាស្ត្រល្អយ៉ាងជ្រាលជ្រៅ»។

លោកបន្តថា៖ «នេះមិនមែនជាការផ្លាស់ប្តូរចំណុចកណ្តាលទំនាញចេញពីអ៊ុយក្រែនទេ។ វាគឺជាការពង្រីកសមត្ថភាពរួមគ្នារបស់យើង និងការបង្កើតខ្សែការពារទីពីរដែលធានានូវភាពជាប់លាប់នៃការផលិត»។

គួរឱ្យដឹងថា ឧស្សាហកម្មការពារជាតិរបស់អ៊ុយក្រែនបានរីកចម្រើនយ៉ាងឆាប់រហ័ស អំឡុងពេល៤ឆ្នាំនៃសង្គ្រាមជាមួយរុស្ស៊ី។ សមត្ថភាពផលិតរបស់អ៊ុយក្រែន ត្រូវបានប៉ាន់ប្រមាណថាមានចំនួន ៥០ទៅ៥៥ប៊ីលានដុល្លារក្នុងឆ្នាំនេះ បំពេញតម្រូវការជាង៥០ភាគរយនៃវិស័យកងទ័ពអ៊ុយក្រែន។

លោក Zaluzhnyi និយាយថា មជ្ឈមណ្ឌលជំនាញវិស្វកម្មនឹងនៅតែមានក្នុងប្រទេសអ៊ុយក្រែន ខណៈដែលផលិតកម្មនឹងត្រូវបញ្ចូលទៅក្នុងឧស្សាហកម្មការពារជាតិរបស់ចក្រភពអង់គ្លេស។

គួរបញ្ជាក់ថា ក្រុមហ៊ុន Ukrspecsystems កំពុងធ្វើការនៅចក្រភពអង់គ្លេសជាផ្នែកមួយនៃសម្ព័ន្ធក្រុមហ៊ុន ១Force សហការជាមួយក្រុមហ៊ុន British Eagle Eye Innovations Ltd និង Digital Concepts Engineering Ltd របស់ចក្រភពអង់គ្លេស៕

ប្រែសម្រួល៖ ណឺ មិនា