មេរោគនៃជំងឺ mpox កំពុងបំប្លែងខ្លួនយ៉ាងលឿន គួរឲ្យបារម្ភ

ក្រុមអ្នកវិទ្យាសាស្ត្រអន្តរជាតិនិយាយថា មេរោគបង្កជំងឺ mpox កំពុងបំប្លែងខ្លួនលឿនជាងការរំពឹងទុកនិងគួរឲ្យបារម្ភ ហើយជំងឺនេះរីករាលដាលខ្លាំងនៅក្នុងតំបន់ដែលអ្នកជំនាញខ្វះថវិកា និងឧបករណ៍ដើម្បីតាមដាន។ ដូច្នេះហើយ វាពិបាកណាស់ដើម្បីដឹងច្បាស់អំពីភាពធ្ងន់ធ្ងរ និងរបៀបនៃការចម្លង ព្រមទាំងធ្វើឲ្យការឆ្លើយតបជួបបញ្ហាស្មុគស្មាញទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីរុសប្រភេទថ្មី Clade Ib បានក្លាយជាក្តីបារម្ភអន្តរជាតិ បន្ទាប់ពីអង្គការសុខភាពពិភពលោក (WHO) ប្រកាសអាសន្នសុខភាពថ្មីជាសកល។ មេរោគនេះគឺជាពូជបំប្លែងពី clade I ដែលដំបូងឡើយវាបានរីករាលដាលចេញពីសត្វ ហើយឆ្លងរាលដាលនៅប្រទេសកុងហ្គោ អាស់រយៈពេលជាច្រើនទសវត្សរ៍មកហើយ។

កុងហ្គោ មានករណីសង្ស័យ Clade I និង Clade Ib ជាង ១៨ ០០០ករណីរួចមកហើយ ក្នុងនោះមានមនុស្សស្លាប់ចំនួន៦១៥នាក់នៅឆ្នាំនេះ។ ក្រោយមក មេរោគ Clade Ib ប្រភេទគ្រោះថ្នាក់ ក៏រាលដាលចេញក្រៅទ្វីបអាហ្វ្រិក ឆ្លងដល់ប្រទេសស៊ុយអែតនិងថៃ។

អ្នកជំនាញជំងឺឆ្លងនៅមន្ទីរពេទ្យ Niger Delta University ក្នុងប្រទេសនីហ្សេរីយ៉ា វេជ្ជបណ្ឌិត Dimie Ogoina ដែលជាប្រធានគណៈកម្មាធិការគ្រាអាសន្ន mpox របស់ WHO បាននិយាយថា ៥ឆ្នាំមុន លោកបានធ្វើតេស្តឃើញពូជ clade IIb ហើយរកឃើញថា វាបានបំប្លែងខ្លួន ជាមួយសមត្ថភាពគ្រប់គ្រាន់ដើម្បីចម្លងមកមនុស្ស រហូតដល់ការផ្ទុះជំងឺរាតត្បាតក្នុងឆ្នាំ២០២២តែម្តង។ ក្រោយមកទៀត Clade Ib ក៏កំពុងដើរលើផ្លូវដូចគ្នានេះដែរ។

តាមពិតទៅ Mpox ដែលគេស្គាល់ពីមុនថា Monkeypox គឺជាបញ្ហាសុខភាពសាធារណៈនៅតំបន់ខ្លះនៃទ្វីបអាហ្រ្វិកតាំងតែពីឆ្នាំ១៩៧០មកម្ល៉េះ ប៉ុន្តែអន្តរជាតិទើបចាប់អារម្មណ៍ខ្លាំងក្នុងឆ្នាំ២០២២ប៉ុណ្ណោះ។

សម្រាប់រោគសញ្ញា, ជំងឺ mpox បណ្តាលឲ្យកើតកន្ទួលលើស្បែកឈានដល់ពងបែក ឬដំបៅនៅគ្រប់ទីកន្លែងលើរាងកាយ រួមទាំងប្រដាប់ភេទផងដែរ។ រោគសញ្ញាផ្សេងទៀតមានដូចជាគ្រុនក្តៅ ឈឺក្បាល ឈឺខ្នង ឈឺសាច់ដុំ ឈឺសន្លាក់ ឡើងកូនកណ្តុរ ញ័រញាក់ និងអស់កម្លាំង៕

អត្ថបទ៖ សុខ សុវណ្ណ

ចុចអាន៖ ៣ប្រទេស ប្រកាសបរិច្ចាគវ៉ាក់សាំង mpox រាប់ម៉ឺនដូស ឲ្យអាហ្វ្រិក