សិង្ហបុរី ត្រៀមបើកយុទ្ធនាការចាក់វ៉ាក់សាំង mpox

តាមការចុះផ្សាយរបស់ Straits Times, ប្រទេសសិង្ហបុរី ប្រកាសថា ខ្លួននឹងបើកយុទ្ធនាការចាក់វ៉ាក់សាំងជំងឺ mpox ប៉ុន្តែជំហានដំបូងត្រូវចាក់ដល់បុគ្គលិកសុខាភិបាលសិន ព្រោះពួកគេជាក្រុមដែលមានហានិភ័យឆ្លងជំងឺនេះខ្ពស់បំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទសារព័ត៌មាននៅថ្ងៃពុធទី៤ខែកញ្ញាឆ្នាំ២០២៤, រដ្ឋមន្ត្រីក្រសួងសុខាភិបាលសិង្ហបុរីលោក Ong Ye Kung គូសបញ្ជាក់ថា យុទ្ធនាការនេះគឺដើម្បីធានាថា យើងបានផ្តល់ការការពារចាំបាច់ទៅដល់អ្នកដែលត្រូវការ។

ទោះបីជាយ៉ាងណាក៏ដោយ តាមការអះអាងរបស់លោក Ong Ye Kung, បច្ចុប្បន្ននេះ មិនទាន់មានតម្រូវការឲ្យប្រជាជនពាក់ម៉ាសឡើយ ប៉ុន្តែយើងនឹងតាមដានជាបន្តថាតើ mpox រាលដាលខ្លាំងក្នុងកម្រិតណា។

ចំពោះវ៉ាក់សាំងដែលសិង្ហបុរីនឹងបើកយុទ្ធនាការចាក់ គឺជាប្រភេទ JYNNEOS ដែលប្រទេសនេះធ្លាប់ប្រើដើម្បីប្រឆាំងនឹងជំងឺ អុតស្វាយ។ ក្រៅពីចាក់វ៉ាក់សាំង សិង្ហបុរី ក៏នឹងដាក់ចេញវិធានការនានាផងដែរ ដូចជាធ្វើចត្តាឡីស័ក២១ថ្ងៃ ចំពោះអ្នកមានទំនាក់ទំនងជាមួយអ្នកជំងឺ mpox ជាដើម។

សូមបញ្ជាក់ថា រហូតមកទល់ពេលនេះ សិង្ហបុរី មិនទាន់រកឃើញការឆ្លងជំងឺ mpox ពូជ Clade 1 ដ៏គ្រោះថ្នាក់នៅឡើយទេ ពោលគឺករណីទាំង១៤ដែលប្រទេសនេះរកឃើញ គឺសុទ្ធសឹងជាពូជ Clade 2 ប្រភេទស្រាល។

គួររម្លឹកឡើងវិញ កាលពីថ្ងៃទី១៤ខែសីហាឆ្នាំ២០២៤ អង្គការសុខភាពពិភពលោក បានប្រកាសថា ជំងឺ mpox គឺជាភាពអាសន្នសុខភាពពិភពលោក និងអំពាវនាវឲ្យប្រទេសនានា ចាត់វិធានការដោះស្រាយជាបន្ទាន់។

ជាង១០ប្រទេសនៅទ្វីបអាហ្រ្វិក បានរាយការណ៍ពីការផ្ទុះជំងឺនេះ ប៉ុន្តែអ្វីដែលគួរកត់សម្គាល់គឺថា គ្រាន់តែសាធារណរដ្ឋប្រជាធិបតេយ្យកុងហ្គោ មានករណីឆ្លងជាង៩០%ទៅហើយ៕

អត្ថបទ៖ សុខ សុវណ្ណ

ចុចអាន៖ ប្រទេសមួយទៀតនៅអាស៊ី រកឃើញការឆ្លងជំងឺ mpox ករណីដំបូងក្នុងឆ្នាំនេះ