ប្រទេសមួយទៀតនៅអាស៊ី រកឃើញការឆ្លងជំងឺ mpox ករណីដំបូងក្នុងឆ្នាំនេះ

តាមសេចក្តីរាយការណ៍របស់ CGTN នៅថ្ងៃអង្គារទី៣ខែកញ្ញាឆ្នាំ២០២៤ ពេលនេះមានប្រទេសនៅទ្វីបអាស៊ីមួយទៀតហើយ ដែលរកឃើញជំងឺ mpox ករណីដំបូងក្នុងឆ្នាំនេះ នោះគឺប្រទេស ហ្ស៊កដានី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងសុខាភិបាលហ្ស៊កដានី ប្រកាសថា ករណីនេះកើតលើបុរសអាយុ៣៣ឆ្នាំ ដែលចេញរោគសញ្ញាដំបូងគឺឡើងកន្ទួលលើស្បែក ប៉ុន្តែគាត់មិនធ្ងន់ធ្ងរឡើយ។

ក្រោយមក គាត់ត្រូវដាក់ឲ្យធ្វើចត្តាឡីស័កនៅមន្ទីរពេទ្យ Al Basheer ក្នុងទីក្រុង Amman ហើយអាជ្ញាធរបានចាត់វិធានការជាបន្តបន្ទាប់ ពិសេសទាក់ទងទៅអ្នកដែលប៉ះពាល់ជាមួយបុរសរូបនេះ។

ត្បិតតែនេះគឺជាករណីដំបូងក្នុងឆ្នាំ២០២៤ក៏ពិតមែន ប៉ុន្តែកាលពីឆ្នាំ២០២២ ប្រទេសហ្ស៊កដានី ក៏រកឃើញមនុស្សម្នាក់ផងដែរ ដែលឆ្លងជំងឺ mpox ឬមានឈ្មោះដើមថា monkeypox។

សូមបញ្ជាក់ជាថ្មី កាលពីថ្ងៃទី១៤ខែសីហាឆ្នាំ២០២៤ អង្គការសុខភាពពិភពលោក បានប្រកាសថា ជំងឺ mpox គឺជាភាពអាសន្នសុខភាពពិភពលោក និងអំពាវនាវឲ្យប្រទេសនានា ចាត់វិធានការដោះស្រាយជាបន្ទាន់។

ជាង១០ប្រទេសនៅទ្វីបអាហ្រ្វិក បានរាយការណ៍ពីការផ្ទុះជំងឺនេះ ប៉ុន្តែអ្វីដែលគួរកត់សម្គាល់គឺថា គ្រាន់តែសាធារណរដ្ឋប្រជាធិបតេយ្យកុងហ្គោ មានករណីឆ្លងជាង៩០%ទៅហើយ។

Mpox ឆ្លងតាមរយៈទំនាក់ទំនងជិតស្និទ្ធ ហើយរោគសញ្ញាមានដូចជាកើតកន្ទួលលើស្បែកឈានដល់ពងបែក ឬដំបៅនៅគ្រប់ទីកន្លែងលើរាងកាយ រួមទាំងប្រដាប់ភេទផងដែ គ្រុនក្តៅ ឈឺក្បាល ឈឺខ្នង ឈឺសាច់ដុំ ឈឺសន្លាក់ ឡើងកូនកណ្តុរ ញ័រញាក់ និងអស់កម្លាំង៕

អត្ថបទ៖ សុខ សុវណ្ណ

ចុចអាន៖ ប្រទេសនៅអាស៊ីអាគ្នេយ៍ រកឃើញករណីឆ្លងជំងឺ mpox បន្ថែមទៀត