រុស្ស៊ី ថា ការព្រមានផ្ទុះសង្គ្រាមលោកលើកទី៣ របស់លោក ត្រាំ ពិតជាត្រឹមត្រូវណាស់

តាមការចុះផ្សាយរបស់ RT, អ្នកនាំពាក្យវិមានក្រឹមឡាំងលោក Dmitry Peskov និយាយថា ការព្រមានរបស់អតីតប្រធានាធិបតីអាមេរិក ដូណាល់ ត្រាំ អំពីសង្គ្រាមលោកលើកទី៣ បន្ទាប់ពីអ៊ុយក្រែន បើកការវាយលុកឆ្លងដែនចូលដីរុស្ស៊ី គឺពិតជាត្រឹមត្រូវណាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាមួយនៅឯសន្និសីទប្រចាំឆ្នាំរបស់សមាគមឆ្មាំជាតិនាទីក្រុង Detroit កាលពីដើមសប្តាហ៍ លោក ត្រាំ ព្រមានថា «អាមេរិក មិនដែលខិតជិតសង្គ្រាមលោកលើកទី៣ដូចពេលនេះទេ។ មើលរឿងដែលកើតនៅអ៊ុយក្រែនទៅ! ពួកគេវាយលុកចូលរុស្ស៊ី អ្នកនឹងជួបសង្គ្រាមលោកលើកទី៣ជាមិនខាន ហើយថែមទាំងជាសង្គ្រាមដ៏អាក្រក់ទៀតផង»។

លុះមកដល់ថ្ងៃពុធទី២៨ខែសីហា លោក Peskov ប្រាប់ទៅអ្នកសារព័ត៌មានថា «ប្រតិបត្តិការនៅ Kursk គឺជាសកម្មភាពដែលរុញភាពតានតឹងឲ្យឈានដល់បន្ទាត់ក្រហម។ ដូច្នេះ​​វាជារឿងត្រូវ​បារម្ភ ហើយ​​ក្នុង​ករណី​នេះ ការព្រមានរបស់លោក ត្រាំ គឺត្រឹមត្រូវណាស់»។

សូមជម្រាបថា នេះមិនមែនទើបលើកដំបូងឡើយដែលលោក ត្រាំ ព្រមានដូច្នេះ ពោលចាប់តាំងពីឆ្នាំមុនមក លោកតែងព្រមានថា គោលនយោបាយអ៊ុយក្រែនរបស់លោក ចូ បៃដិន កំពុងរុញអាមេរិកឲ្យធ្លាក់ចូលទៅក្នុងសង្រ្គាមលោកលើកទី៣ ប៉ុន្តែខ្លួនអាចដោះស្រាយជម្លោះបាន ត្រឹមក្នុងរយៈពេល២៤ម៉ោងប៉ុណ្ណោះ ប្រសិនបើជាប់ឆ្នោតជាប្រធានាធិបតីអាណត្តិថ្មីក្នុងខែវិច្ឆិកាខាងមុខ។

ដោយឡែក ក្នុងបទសម្ភាសន៍ជាមួយមហាសេដ្ឋីបច្ចេកវិទ្យា Elon Musk កាលពីដើមខែនេះ លោក ត្រាំ ថែមអះអាងថា តាមពិតទៅ ចូ បៃដិន អាចសម្រេចបានកិច្ចព្រមព្រៀងយ៉ាងងាយជាមួយរុស្ស៊ី មុនផ្ទុះជម្លោះឆ្នាំ២០២២ ប៉ុន្តែគាត់មិនធ្វើ៕

អត្ថបទ៖ សុខ សុវណ្ណ

ចុចអាន៖ អ៊ីតាលី ព្រមានថា លោកខាងលិច អាចបញ្ឆេះសង្គ្រាមលោកលើកទី៣