បុរសម្នាក់​​​ជាប់​គុក​១៣ខែ ​ព្រោះ​​ការ​​​រំខាននិង​គំរាម​សមាជិក​សភា​​ជិត​២ឆ្នាំ​តាមទូរស័ព្ទ​

បុរស​អាមេរិក​ម្នាក់​ត្រូវ​បាន​កាត់ទោស​ឲ្យ​ជាប់​ពន្ធនាគារ​រយៈពេល១៣ខែ​ពី​បទ​រំខាននិង​គំរាម​កំហែងតាមរយៈការខលទូរស័ព្ទ​ទៅ​ការិយាល័យ​សមាជិក​សភាជាង១២០០០ដង។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី៤ខែកញ្ញានេះ។

លោក Ade Salim Lilly អាយុ៣៥ឆ្នាំ បាន​ដឹង​​កំហុសកាលពីខែឧសភាដោយបានសារភាពចំពោះមុខ​​តុលាការថាគាត់បានហៅទូរស័ព្ទនៅចន្លោះខែកុម្ភៈឆ្នាំ២០២២ ដល់ខែវិច្ឆិកាឆ្នាំ២០២៣។ ក្នុងនោះគាត់បានព្យាយាមទាក់ទងសមាជិកសភាចំនួន៥៤នាក់ទាំងនៅការិយាល័យស្រុកនិងនៅការិយាល័យនៅ​ទីក្រុង​វ៉ាស៊ីនតោនឌីស៊ីនិងបានគំរាមសម្លាប់បុគ្គលិកយ៉ាងហោចណាស់ម្នាក់។

Lilly បានសារភាពកំហុសកាលពីខែឧសភា ខណៈព្រះរាជអាជ្ញាបានកាត់ទោសរយៈពេល ១៨ ខែពីបទបង្កការគម្រាមគំហែងនិងបង្កការរំខាន ខណៈដែលមូលហេតុដែលការជម្រុញឲ្យ Lillyធ្វើបែបនេះ គឺមិនច្បាស់លាស់នោះទេ ប៉ុន្តែកាលពីកាលពីថ្ងៃអង្គារLillyនិយាយទៅកាន់តុលាការកំឡុងពេលកាត់ទោសថា «ចេតនារបស់ខ្ញុំតែងតែធ្វើអ្វីដែលល្អបំផុតសម្រាប់មនុស្សជំនាន់ក្រោយរបស់យើង»។

លោក Lilly ជាអ្នកស្រុក​តំបន់ Queens រដ្ឋ New York ត្រូវបានចាប់ខ្លួនក្នុងខែវិច្ឆិកាឆ្នាំ​២០២៣ បន្ទាប់ពីផ្លាស់ទៅ Puerto Rico។ ក្នុងរយៈពេលពីរថ្ងៃក្នុងខែកុម្ភៈឆ្នាំ២០២៣ Lilly បានទូរស័ព្ទទៅសមាជិកសភាម្នាក់ច្រើនជាង៥០០ ដង ដោយគាត់ខលទៅភាគច្រើនគឺជាបុគ្គលិកសភា ឬអ្នកហាត់ការ។ នៅក្នុងការហៅទូរសព្ទម្តង​នោះ​ គាត់បានគំរាមបុគ្គលិកម្នាក់ថា «ខ្ញុំនឹងសម្លាប់អ្នក ខ្ញុំនឹងទៅ​រក​អ្នក ខ្ញុំនឹងសម្លាប់អ្នកដោយគ្រាប់បែក ឮទេ?»។

គួរបញ្ចាក់ថា ស្របពេលជាមួយនឹងការកើនឡើង៤០០ភាគរយ នៃការគំរាមកំហែងប្រឆាំងនឹងសមាជិកសភាក្នុងរយៈពេលប្រាំមួយឆ្នាំកន្លងមកនេះ ចៅក្រមបានកត់សម្គាល់ពីការកើនឡើងនាពេលថ្មីៗនេះនៅក្នុងការវាយប្រហារដោយហិង្សាប្រឆាំងនឹងអ្នកនយោបាយ ដោយលើកឡើងពីការប៉ុនប៉ងធ្វើឃាតរបស់លោក Donald Trump និងការវាយប្រហារដោយ​ញញួរលើប្តីរបស់លោកស្រី Nancy Pelosi ផងដែរ៕

អត្ថបទ៖ ប៊ុន សុភាព