ស្រីលង្កា៖ឪពុក​និង​កូន​​រងពិន័យ​២០ម៉ឺនដុល្លារ​ពី​បទ​រត់ពន្ធ​មេអំបៅ​​​

ជនជាតិអ៊ីតាលីពីរនាក់ឪពុក​និងកូនប្រុសត្រូវបានពិន័យជាប្រាក់ចំនួន៦០លានរូពីស្រីលង្កា ស្មើនឹង២០ម៉ឺនដុល្លារអាមេរិក ជុំវិញការព្យាយាមរត់ពន្ធសត្វល្អិតរាប់រយប្រភេទ រួមទាំងមេអំបៅចំនួន៩២ប្រភេទ ចេញពីឧទ្យានប្រទេសស្រីលង្កា។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី១៣ខែកញ្ញានេះ។

មន្ត្រី​ឧទ្យានជាតិ Yala បានចាប់ខ្លួនលោក Luigi Ferrari អាយុ៦៨ឆ្នាំនិងកូនប្រុសអាយុ ២៨ឆ្នាំរបស់គាត់ Mattia កាលពីថ្ងៃទី៨ខែឧសភាឆ្នាំនេះ បន្ទាប់ពីប៉ូលិសរកឃើញក្រឡដែលមានសត្វល្អិត។ ការស៊ើបអង្កេតបង្ហាញថា បុរសទាំងនោះ បានល្បួងសត្វល្អិតដោយសារធាតុទាក់ទាញសត្វ ហើយគ្រោងនឹងប្រើប្រាស់ថង់ក្រមួនដើម្បីការពារពួកវាដោយប្រើសារធាតុគីមី។ ពួកគេត្រូវបានកាត់ទោសកាលពីដើមខែកញ្ញាពីបទប្រមូល កាន់កាប់ និងដឹកជញ្ជូនសត្វល្អិតដោយខុសច្បាប់ ហើយត្រូវបានពិន័យជាប្រាក់ច្រើនបំផុតមិនធ្លាប់មានសម្រាប់ឧក្រិដ្ឋកម្មសត្វព្រៃនៅក្នុងប្រទេស។

យោងតាមមន្ត្រីអនុរក្សឧទ្យានបានឲ្យដឹងថានៅថ្ងៃកើតហេតុមានរថយន្តគួរឱ្យសង្ស័យ បានចតនៅតាមបណ្តោយផ្លូវ ហើយបុរសទាំងពីរនាក់បានចូលទៅក្នុងព្រៃដោយមានសំណាញ់ចាប់សត្វល្អិត។ មន្ត្រី​អនុរក្ស​បាន​កំណត់​ទីតាំង​រថយន្ត​នោះ ហើយ​បាន​រក​ឃើញ​ក្រឡ​រាប់រយ​ដែល​មាន​ផ្ទុក​សត្វល្អិត ខណៈសត្វល្អិតទាំងអស់បានងាប់នៅពេលដែលរកឃើញពួកវា ដោយសារបុរសទាំងពីរដាក់សារធាតុគីមីនៅក្នុងដប​ ហើយមានសត្វជាងបីរយដែលបានរកឃើញ។

ដំបូងឡើយ បុរសទាំងពីរត្រូវបានទះកំផ្លៀងនិងរងការចោទប្រកាន់ចំនួន ៨១០ ប៉ុន្តែក្រោយមកត្រូវបានកាត់បន្ថយមកត្រឹម ៣០៤។ លើសពីនេះពួកគេអាចប្រឈមមុខនឹងការជាប់ពន្ធនាគាររយៈពេលពីរឆ្នាំ ប្រសិនបើពួកគេមិនបានបង់ប្រាក់ពិន័យត្រឹមថ្ងៃទី២៤ខែកញ្ញា។

បើយោងតាមសេចក្តីរាយការណ៍ព័ត៌មានរបស់ប្រទេសអ៊ីតាលីបាននិយាយថា បុរសទាំងនោះបានទៅវិស្សមកាលនៅប្រទេសស្រីលង្កានៅពេលនោះ ហើយត្រូវបានឃុំខ្លួននៅក្នុងប្រទេសស្រីលង្កាចាប់តាំងពីឧបទ្ទវហេតុនេះ។ របាយការណ៍បាននិយាយថា Luigi Ferrari ដែលជាឪពុកជាគ្រូពេទ្យវះកាត់ឆ្អឹងដែលមានជំនាញក្នុងការព្យាបាលរបួសជើង និងកជើង និងត្រូវបានមិត្តភក្តិរបស់គាត់ពិពណ៌នាថាគាត់ជាអ្នកចូលចិត្តសត្វល្អិត។

ជាមួយគ្នានេះមិត្តភ័ក្តិ និងសហការីរបស់គាត់នៅក្នុងប្រទេសអ៊ីតាលីបានអង្វរសុំឱ្យមានការយោគយល់ជំនួសគាត់។ លើសពីនេះសារព័ត៌មានអ៊ីតាលី Corriere della Sera បានរាយការណ៍ថា អ្នកខ្លះបានលើកឡើងថា មេអំបៅដែលរកឃើញនៅក្នុងកម្មសិទ្ធិរបស់គាត់មិនមែនសម្រាប់ពាណិជ្ជកម្មទេ។ ទោះយ៉ាងណាអ្នកជំនាញផ្នែកច្បាប់បរិស្ថានបាននិយាយថា ការផាកពិន័យចំនួន ២០ម៉ឺនដុល្លារនេះ គឺជាការព្រមានដល់ឧក្រិដ្ឋជន ក៏ដូចជាគំរូដ៏ល្អមួយ។

គួរបញ្ជាក់ថាឧទ្យានជាតិ Yala ដែលមានទីតាំងនៅភាគអាគ្នេយ៍នៃប្រទេស គឺជាសួនសត្វព្រៃដ៏ពេញនិយមបំផុតមួយរបស់ប្រទេសស្រីលង្កា ដែលជាកន្លែងប្រមូលផ្តុំយ៉ាងច្រើននៃពពួកខ្លារខិន ដំរី និងក្របី ជាមួយនឹងសត្វដទៃទៀត៕

អត្ថបទ៖ ប៊ុន សុភាព