វេណេហ្ស៊ុយអេឡាចាប់ខ្លួនជនជាតិអេស្ប៉ាញ អាមេរិក និងឆេក ពីបទ«បង្កឱ្យ​មាន​អស្ថិរភាព»

មន្ត្រីជាន់ខ្ពស់វេណេហ្ស៊ុអេឡាម្នាក់បាននិយាយកាលពីថ្ងៃសៅរ៍ថា ជនជាតិអេស្ប៉ាញព២នាក់ ពលរដ្ឋអាមេរិក៣នាក់ និងជន​ជាតិ​ឆេកម្នាក់ត្រូវបានចាប់ខ្លួននៅក្នុងប្រទេសវេណេហ្ស៊ុយអេឡា ពីបទសង្ស័យថាមានទំនាក់ទំនងទៅនឹងផែនការដែលបានចោទប្រកាន់ថាធ្វើឱ្យប្រទេសអាមេរិកខាងត្បូងមានអស្ថិរភាព​ ស្របពេលដែល​ប្រទេស​នេះ​​​ប្រឈម​បាតុកម្ម​ដ៏​ខ្លាំង​​ប្រឆាំង​លទ្ធផល​បោះឆ្នោត​កាល​ពីខែ​កក្កដា​។

ការប្រកាសនេះ​ទំនង​បង្ក​ឱ្យ​មាន​ភាពតានតឹងកាន់តែ​ខ្លាំងក្នុង​ចំណោម​ភាព​​តានតឹង​ដ៏ច្រើនដែល​កើត​មាន​រួច​ទៅហើយរបស់ប្រទេស​នៅ​​អាមេរិកខាងត្បូងនេះ​ជាមួយអេស្បាញ និងសហរដ្ឋអាមេរិក បន្ទាប់ពីការបោះឆ្នោតប្រធានាធិបតីវេណេហ្ស៊ុយអេឡាដែលមានជម្លោះក្នុងខែកក្កដា។

រដ្ឋមន្ត្រីមហាផ្ទៃវេណេហ្ស៊ុយអេឡា លោក Diosdado Cabello ក្នុងសន្និសីទសារព័ត៌មានមួយ បាននិយាយថា ជនជាតិអេស្ប៉ាញពីរនាក់ ត្រូវបានចោទប្រកាន់ថា មានទំនាក់ទំនងនឹងភ្នាក់ងារ​សម្ងាត់របស់ប្រទេសអេស្ប៉ាញ និងរៀបចំផែនការធ្វើឃាតអភិបាលក្រុង។

ប្រព័ន្ធផ្សព្វផ្សាយអេស្ប៉ាញបានរាយការណ៍ថារដ្ឋាភិបាលរបស់ប្រទេសអេស្ប៉ាញបានបដិសេធការអះអាងនេះ។

លោក Cabello ក៏បានចោទប្រកាន់ពលរដ្ឋអាមេរិកបីនាក់ និងជនជាតិឆេក ពីបទពាក់ព័ន្ធក្នុងអំពើភេរវកម្ម រួមទាំងផែនការធ្វើឃាតប្រធានាធិបតី Nicolas Maduro និងមន្ត្រីដទៃទៀត។

រ៉យទ័រ​បាន​រាយការណ៍​ថា ក្រសួងការបរទេសសហរដ្ឋអាមេរិកមិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់​ខ្លួន​ទេ៕​