ព័ត៌មានអន្ដរជាតិ

អ៊ីស្រាអែល វាយប្រហារទីតាំងក្រុមហេសបូឡាជាច្រើនកន្លែងនៅលីបង់

បានផុស

២ years មុន

នៅ

ថ្ងៃព្រហស្បតិ៍ ១៩ កញ្ញា ២០២៤

ដោយ

Chheang

យន្តហោះចម្បាំង និងមីស៊ីលរបស់អ៊ីស្រាអែល បានវាយប្រហារគោលដៅជាច្រើននៅភាគខាងត្បូងប្រទេសលីបង់ទាំងយប់ ចំពេលមានភាពតានតឹងកំពុងកើនឡើងបន្ទាប់ពីហេតុការណ៍បំផ្ទុះឧបករណ៍ទាក់ទងរបស់ក្រុមហេសបូឡាក្នុងសប្តាហ៍នេះ ដែលបណ្ដាលឲ្យមានមនុស្សស្លាប់និងរបួសជិត៣០០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាអ៊ីស្រាអែល បាននិយាយនៅថ្ងៃព្រហស្បតិ៍នេះថា ការវាយប្រហារតាមអាកាសធ្វើឡើងនៅលើគោលដៅរបស់ក្រុមហេសបូឡានៅតំបន់ Chihine, Tayibe, Blida, Meiss El Jabal, Aitaroun និង Kfarkela ភាគខាងត្បូងប្រទេសលីបង់ ក៏ដូចជាឃ្លាំងផ្ទុកអាវុធរបស់ក្រុមហេសបូឡានៅក្នុងតំបន់ Khiam។

មីស៊ីលប្រហែល១០គ្រាប់ ត្រូវបានបាញ់ចេញពីភ្នំ Hermon នៃតំបន់ Golan Heights ដែលកាន់កាប់ដោយអ៊ីស្រាអែល ហើយជាកន្លែងដែលអ៊ីស្រាអែលបង្កើតទីតាំងឃ្លាំមើល ចារកម្ម និងដំឡើងខែលការពារដែនអាកាស។

ការវាយប្រហារនេះ ធ្វើឡើងបន្ទាប់ពីក្រុមហេសបូឡាកាលពីថ្ងៃពុធបានបាញ់មីស៊ីលប្រហែល២០គ្រាប់ចូលប្រទេសអ៊ីស្រាអែល តែភាគច្រើននៃមីស៊ីលទាំងនោះត្រូវបានស្ទាក់ចាប់បានដោយខែលការពារអាកាស ហើយមិនបណ្ដាលឲ្យនរណាម្នាក់រងរបួសនោះទេ។

ជម្លោះរវាងអ៊ីស្រាអែល និងក្រុមហេសបូឡាដែលមានមូលដ្ឋាននៅលីបង់ បានកើតឡើងមួយថ្ងៃបន្ទាប់ពីមានការវាយប្រហារថ្ងៃទី៧ខែតុលារបស់ក្រុមហាម៉ាសទៅលើអ៊ីស្រាអែល។ ទាំងហេសបូឡា និងហាម៉ាស សុទ្ធតែជាក្រុមសកម្មប្រយុទ្ធដែលមានការគាំទ្រដោយអ៊ីរ៉ង់ដូចគ្នា។ ការបាញ់បោះគ្នាកើតឡើងស្ទើរជារៀងរាល់ថ្ងៃរវាងអ៊ីស្រាអែល និងហេសបូឡា តែភាគីទាំងសងខាងបានព្យាយាមទប់ស្កាត់ជម្លោះនេះមិនឲ្យឈានដល់សង្គ្រាមទ្រង់ទ្រាយធំនោះឡើយ។

ក្រៅតែពីរងការប្រហារពីអ៊ីស្រាអែល ប្រទេសលីបង់ក៏កើតមានឧប្បត្តិហេតុបំផ្ទុះឧបករណ៍ទាក់ទងរបស់ក្រុមហេសបូឡាផងដែរ។ ការបំផ្ទុះបានកើតឡើងចំនួន២លើក ហើយបណ្ដាលឲ្យមនុស្សស្លាប់ជាង៣០នាក់ និងរបួសប្រហែល៣០០០នាក់។ ត្បិតតែ គ្មាននរណាម្នាក់អះអាងទទួលខុសត្រូវក៏ពិតមែន ប៉ុន្តែលីបង់ និងក្រុមហេសបូឡា បានចង្អុលចំមុខទៅអ៊ីស្រាអែល។ យ៉ាងណា អ៊ីស្រាអែលមិនទាន់និយាយអ្វីទាំងអស់ពាក់ព័ន្ធនឹងរឿងនេះ៕

ដោយ៖ ឈាង

ចុចអាន៖ ការវាយប្រហារបំផ្ទុះឧបករណ៍ទាក់ទងរលកទី២ ស្លាប់និងរបួសមនុស្សជាង៤០០នាក់ទៀត នៅលីបង់