ព័ត៌មានអន្ដរជាតិ

លោក ត្រាំ ប្រកាសមិនឈរឈ្មោះជាលើកទី៤ បើចាញ់ឆ្នោតខែវិច្ឆិកា

បានផុស

៦ ខែ មុន

នៅ

ថ្ងៃចន្ទ ២៣ កញ្ញា ២០២៤

ដោយ

Chheang

លោក ដូណាល់ ត្រាំ មកពីគណបក្សសាធារណរដ្ឋ បាននិយាយថា លោកនឹងមិនឈរឈ្មោះជាបេក្ខជនប្រធានាធិបតីអាមេរិកជាលើកទី៤ទៀតទេ បើលោកចាញ់ការបោះឆ្នោតនៅថ្ងៃទី៥ខែវិច្ឆិកា។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី២៣ខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលសួរថាតើលោកនឹងប្រកួតប្រជែងម្តងទៀតទេនៅ៤ឆ្នាំខាងមុខបើមិនទទួលបានជោគជ័យក្នុងអាណត្តិនេះ អតីតប្រធានាធិបតីវ័យ៧៨ឆ្នាំបានឆ្លើយថា៖ «ទេខ្ញុំមិនធ្វើទៀតទេ។ ខ្ញុំគិតថាវាគ្រប់គ្រាន់ហើយ។ ខ្ញុំមិនពិចារណាលើរឿងនេះទាល់តែសោះ។ ដោយក្ដីសង្ឃឹម យើងនឹងទទួលបានជោគជ័យ»។

លោក ត្រាំ កំពុងប្រឈមមុខនឹងការប្រកួតប្រជែងដ៏តឹងតែងមួយតទល់នឹងអនុប្រធានាធិបតីអាមេរិកមកពីគណបក្សប្រជាធិបតេយ្យគឺលោកស្រី កាម៉ាឡា ហារីស ជាមួយនឹងការស្ទង់មតិបង្ហាញពីលទ្ធផលប្រកៀកប្រកិតគ្នារវាងបេក្ខភាពទាំង២ ដែលពិបាកនឹងកំណត់អ្នកឈ្នះណាស់ក្នុងការប្រជែងតំណែងជាប្រធានាធិបតីនាខែវិច្ឆិកាខាងមុខ។

លោក ត្រាំ បានចាប់ផ្តើមឈរឈ្មោះសម្រាប់ការបោះឆ្នោតឡើងវិញជាលើកដំបូងក្នុងឆ្នាំ២០២០ បន្ទាប់ពីឈ្នះការបោះឆ្នោតនិងក្លាយជាប្រធានាធិបតីអាមេរិកទី៤៥ក្នុងឆ្នាំ២០១៧។ លោកបានលើកឡើងម្ដងហើយម្ដងទៀតថា ការចាញ់ឆ្នាំ២០២០របស់លោកពេលប្រជែងជាមួយលោក ចូ បៃដិន ដែលមកពីបក្សប្រជាធិបតេយ្យ គឺដោយសារតែការក្លែងបន្លំសន្លឹកឆ្នោត ហើយជាលទ្ធផលលោកបានប្រឈមមុខនឹងការចោទប្រកាន់ពីបទឧក្រិដ្ឋរបស់សហព័ន្ធ និងរដ្ឋ ជុំវិញកិច្ចខិតខំប្រឹងប្រែងដើម្បីលុបចោលលទ្ធផលបោះឆ្នោត។

លោក ត្រាំ បានច្រានចោលរាល់ការចោទប្រកាន់ ហើយថាវាជាការវាយប្រហារផ្នែកនយោបាយប្រឆាំងនឹងលោក។ មួយវិញទៀត លោកបានអះអាងថា បើលោកចាញ់ការបោះឆ្នោតឆ្នាំ២០២៤នេះ នោះប្រជាធិបតេយ្យនឹងលែងមានទៀតហើយនៅលើទឹកដីអាមេរិក៕

ដោយ៖ ឈាង