ព័ត៌មានអន្ដរជាតិ

អ៊ីស្រាអែលអះអាងថាខ្លួនសម្លាប់លោក Nasrallahមេដឹកនាំហេសបូឡា

បានផុស

៩ ខែ មុន

នៅ

ថ្ងៃសៅរ៍ ២៨ កញ្ញា ២០២៤

ដោយ

មេដឹកនាំក្រុមសកម្មប្រយុទ្ធហេសបូឡាមានមូលដ្ឋាននៅប្រទេសលីបង់ លោក Sayyed Hassan Nasrallah ត្រូវបានរាយការណ៍ថា បានបាត់បង់ជីវិតនៅថ្ងៃសៅរ៍នេះក្នុងការវាយប្រហារចុងក្រោយតាមផ្លូវអាកាស បន្ទាបពីការវាយប្រហារទាំងយប់ទាំងថ្ងៃរយៈពេលប្រហែល១សប្តាហ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងទីភ្នាក់ងារព័ត៌មានរបស់បស្ចឹមប្រទេសជាច្រើន ក្រោយដំណឹងនៃការស្លាប់របស់មេដឹកនាំរបស់ហេសបូឡា អ៊ីស្រាអែលត្រូវបានដាក់ឱ្យស្ថិតក្នុងការប្រុងប្រយ័ត្នខ្ពស់សម្រាប់ជម្លោះកាន់តែរីករាលដាលធំឡើង។

យោធាអ៊ីស្រាអែលនៅថ្ងៃសៅរ៍នេះ បានអះអាងថា ខ្លួនបានសម្លាប់មេដឹកនាំក្រុមហេសបូឡា លោក Sayyed Hassan Nasrallah ក្នុងទីក្រុង Beirut ហើយថែមទាំងបាននិយាយថាខ្លួនសង្ឃឹមថា មរណៈភាពរបស់គាត់នឹងធ្វើឱ្យក្រុមផ្លាស់ប្តូរផ្លូវ។

ទីភ្នាក់ងារព័ត៌មានរ៉យទ័រ បានដកស្រង់សម្តី វរសេនីយ៍ទោ Nadav Shoshani របស់អ៊ីស្រាអែល បាននិយាយនៅក្នុងសន្និសីទសារព័ត៌មានមួយ បន្ទាប់ពីយោធាបាននិយាយថា ខ្លួនបានសម្លាប់ Nasrallah ថា៖«យើងសង្ឃឹមថា នេះនឹងផ្លាស់ប្តូរសកម្មភាពរបស់ហេសបូឡា»។

ប៉ុន្តែលោកបាននិយាយថា វានឹងនៅតែត្រូវការពេលវេលាច្រើនថែមទៀតដើម្បីបំផ្លាញសមត្ថភាពរបស់ក្រុមហេសបូឡាដែលគាំទ្រដោយអ៊ីរ៉ង់។

លោកបាននិយាយថា៖«យើងបានឃើញក្រុមហេសបូឡា អនុវត្តការវាយប្រហារមកលើពួកយើងអស់រយៈពេលមួយឆ្នាំ។ វាមានសុវត្ថិភាពក្នុងការសន្មត់ថាពួកគេនឹងបន្តធ្វើការវាយប្រហាររបស់ពួកគេប្រឆាំងនឹងយើង ឬព្យាយាមធ្វើវា»។

យោធាអ៊ីស្រាអែលបានបើកការវាយប្រហារខ្លាំងបំផុតលើក្រុមហេសបូឡាមានមូលដ្ឋាននៅប្រទេសលីបង់ ដែលគាំទ្រដោយប្រទេសអ៊ីរ៉ង់ ហើយ សន្យាបោសសម្អាតរហូតដល់ដល់ឫសគល់ ខណៈដែលនាយករដ្ឋមន្ត្រីអ៊ីស្រាអែលបានថ្លែងនៅអង្គការសហប្រជាជាតិថា ខ្លួនមានសិទ្ធិក្នុងការកម្ទេចក្រុមហេសបូឡា។

រហូតដល់ពេលនេះមនុសរាប់ម៉ឺននាក់បានរងផលប៉ះពាល់ដោយសារការវាយប្រហាររបស់អ៊ីស្រាអែល ហើយមនុស្សរាប់រយនាក់បានស្លាប់ដោយសារការបាញ់ប្រហាររបស់អ៊ីស្រាអែល៕

ដោយ រ៉ាន់ រើយ