ព័ត៌មានអន្ដរជាតិ

អាមេរិក ព្រមានអ៊ីរ៉ង់ឲ្យបញ្ឈប់ផែនការសម្លាប់លោក ត្រាំ

បានផុស

២ ខែ មុន

នៅ

ថ្ងៃអង្គារ ១៥ តុលា ២០២៤

ដោយ

Chheang

សហរដ្ឋអាមេរិក បានប្រកាសថា រាល់ការប៉ុនប៉ង់សម្លាប់លោក ដូណាល់ ត្រាំ ដោយរដ្ឋាភិបាលអ៊ីរ៉ង់ នឹងត្រូវចាត់ទុកជាសកម្មភាពនៃសង្គ្រាម ហើយបានព្រមានក្រុងតេហេរ៉ង់ឲ្យបញ្ឈប់នូវរាល់ផែនការធ្វើឃាតទាំងអម្បាលម៉ានទៅលើអតីតប្រធានាធិបតីអាមេរិកតទៅទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី១៥ខែតុលា ប្រភពពីមន្ត្រីអាមេរិក បានឲ្យដឹងថា លោកប្រធានាធិបតី ចូ បៃដិន បានពិភាក្សាអំពីការគំរាមកំហែងជីវិតលើលោក ត្រាំ និងចាត់ឲ្យក្រុមរបស់លោកដោះស្រាយប្រឆាំងនឹងផែនការរបស់អ៊ីរ៉ង់លើសហរដ្ឋអាមេរិក។

នៅក្រោមបញ្ជាពីលោក បៃដិន មន្ត្រីជាន់ខ្ពស់អាមេរិកបានផ្ញើសារទៅកាន់ថ្នាក់ដឹកនាំរដ្ឋាភិបាលអ៊ីរ៉ង់ ដោយព្រមានទីក្រុងតេហេរ៉ង់ឲ្យបោះបង់ចោលគ្រោងការណ៍នានាប្រឆាំងលោក ត្រាំ និងអតីតមន្ត្រីអាមេរិក។ ក្នុងសារនោះទៀតសោត អាមេរិកប្រាប់អ៊ីរ៉់ង់ថា ការប៉ុនប៉ង់ណាមួយដែលធ្វើឡើងប៉ះពាល់ដល់ជីវិតលោក ត្រាំ នឹងត្រូវចាត់ទុកជាសកម្មភាពបង្កសង្គ្រាម។

សេតវិមាន បានប្រកាសថា សហរដ្ឋអាមេរិក បានឃ្លាំមើលយ៉ាងហ្មត់ចត់រាល់ការគំរាមកំហែងរបស់អ៊ីរ៉ង់ទៅលើលោក ត្រាំ ក្នុងរយៈពេលជាច្រើនឆ្នាំមកនេះ ហើយប្រាប់ថា អ៊ីរ៉ង់នឹងរងផលវិបាកខ្លាំងក្លាមិនខាន បើហ៊ានតែវាយប្រហារលើជនជាតិអាមេរិកណាម្នាក់។

អ៊ីរ៉ង់ ធ្លាប់បានបដិសេធការជ្រៀតជ្រែកនៅក្នុងកិច្ចការនយោបាយអាមេរិក ហើយថែមទៀតបកទៅវិញថា មានតែអាមេរិកនោះទេដែលលូកដៃរឿងផ្ទៃក្នុងរបស់ខ្លួនអស់ជាច្រើនទសវត្សរ៍មកហើយ រាប់ចាប់ពីព្រឹត្តិការណ៍រដ្ឋប្រហារឆ្នាំ១៩៥៣ រហូតដល់ការសម្លាប់មេបញ្ជាការអ៊ីរ៉ង់នៅក្នុងការវាយប្រហារដោយដ្រូនអាមេរិកកាលពីឆ្នាំ២០២០៕

ដោយ៖ ឈាង