មិនទាន់ឡើងកាន់អំណាចផង អ្នកស្នងតំណែងមេក្រុមហេសបូឡា ត្រូវអ៊ីស្រាអែល សម្លាប់បាត់ទៅហើយ 

មិនទាន់ទាំងបានឡើងកាន់តំណែងផង ស្រាប់តែបេក្ខភាពដែលនឹងចូលធ្វើជាមេក្រុមហេសបូឡាជំនួសលោក Hassan Nasrallah ត្រូវអ៊ីស្រាអែល អះអាងថា បានបាត់បង់ជីវិតក្នុងការវាយប្រហាររបស់ខ្លួនបាត់ទៅហើយ។ នេះបើតាមការចុះផ្សាយរបស់ BBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ីស្រាអែល បានបញ្ជាក់ពីការស្លាប់លោក Hashem Safieddine ដែលត្រូវគេមើលឃើញថា នឹងឡើងស្នងតំណែងលោក Nasrallah ជាមេក្រុមហេសបូឡា ក្នុងរយៈពេលដ៏ខ្លីខាងមុខ ក្រោយពេលអ្នកដឹកនាំមុន ក៏ត្រូវស្លាប់ក្រោមដៃកងទ័ពរបស់លោក Netanyahu ដូចគ្នា។

តាមពិតទៅអ៊ីស្រាអែល បានសម្លាប់លោក Safieddine ជាងកន្លះខែមកហើយ ប៉ុន្តែទើបតែប្រកាសជាផ្លូវការកាលពីថ្ងៃអង្គារទី២២ខែតុលាឆ្នាំ២០២៤ប៉ុណ្ណោះ។ ក្នុងសេចក្តីប្រកាសនោះ អ៊ីស្រាអែល បញ្ជាក់ថា បុរសអាយុ៦០ឆ្នាំរូបនេះ បានស្លាប់ក្នុងវាយប្រហារកាលពីថ្ងៃទី៤ខែតុលានៅតំបន់ Dahieh ជាយក្រុងបេរូត ដែលជាបន្ទាយដ៏រឹងមាំរបស់ក្រុមហេសបូឡា។

ក្នុងសេចក្តីថ្លែងការណ៍មួយ កងកម្លាំងការពារអ៊ីស្រាអែល ឬ IDF ប្រកាសថា «ឥឡូវនេះ យើងអាចបញ្ជាក់បានហើយថា ក្នុងការវាយប្រហារប្រហែលបីសប្តាហ៍មុន លោក Hashem Safieddine ប្រធានក្រុមប្រឹក្សាប្រតិបត្តិក្រុមហេសបូឡា និងលោក Ali Hussein Hazima ដែលជាប្រធាននាយកដ្ឋានស៊ើបការណ៍សម្ងាត់របស់ចលនាប្រដាប់អាវុធលីបង់មួយនេះ ត្រូវបានសម្លាប់រួមជាមួយមេបញ្ជាការក្រុមហេសបូឡាផ្សេងទៀត»។

ត្បិតមានការអំពាវនាវឲ្យបន្ថយដៃក៏ដោយ ប៉ុន្តែអ៊ីស្រាអែលមិនស្តាប់ឡើយ ហើយនៅតែបន្តប្រតិបត្តិការសងសឹកកម្ចាត់ក្រុមហេសបូឡានៅប្រទេសលីបង់ ក្រោយក្រុមហាម៉ាស បើកការវាយលុកឆ្លងព្រំដែនយ៉ាងភ្ញាក់ផ្អើលនៅតំបន់ហ្គាហ្សាកាលពីឆ្នាំ។

គិតត្រឹមពេលនេះ មានប្រជាជនលីបង់ចំនួន ២ ៤៦៤នាក់ហើយ បានបាត់បង់ជីវិតនិងជិត ១២ ០០០នាក់រងរបួស។ចំណែក អ៊ីស្រាអែល បញ្ជាក់ថា ខ្លួនបានសម្លាប់យុទ្ធជនក្រុមហេសបូឡាជាង ១ ៥០០នាក់ ខណៈទាហាន IDF ៤៣នាក់ ក៏បាត់បង់ជីវិតផងដែរ៕

អត្ថបទ៖ សុខ សុវណ្ណ

ចុចអាន៖ ហេសបូឡា ប្រកាស​ថា ​សង្គ្រាម​ជាមួយ​អ៊ីស្រាអែលឈាន​ដល់​ដំណាក់កាល​ថ្មី ក្រោយ​ការ​ស្លាប់លោក Sinwar