មេដឹកនាំ ហេសបូឡា ផ្ញើលិខិតអបអរមេដឹកនាំថ្មី​ក្រុម​ហាម៉ាស ដោយ​​ប្តេជ្ញាតស៊ូរួមគ្នាប្រឆាំង អ៊ីស្រាអែល

នៅក្នុងលិខិត​អប​អរ​សាទរ​មួយច្បាប់ មេដឹកនាំក្រុមហេបូឡាដែល​មានមូលដ្ឋាន​នៅ​ប្រទេសលីបង់​ លោក Sheikh Naim Qassem បានផ្ញើ​ទៅ​​​​កាន់​​ មេដឹកនាំ​ក្រុម​ហាម៉ាស​ លោក Khalil al-Hayya ដែលទើបតែត្រូវបានជ្រើសរើសជាប្រធានការិយាល័យនយោបាយថ្មី ​​ដោយ​​បញ្ជាក់ជាថ្មីនូវការគាំទ្រយ៉ាងរឹងមាំ មិនងាករេ របស់ចលនាតស៊ូលីបង់មួយនេះ ចំពោះក្រុមហាម៉ាស និងបុព្វហេតុប៉ាឡេស្ទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន presstv, នៅក្នុងលិខិតនោះ លោក Sheikh Qassem បានសម្តែងការអបអរសាទរចំពោះលោក al-Hayya សម្រាប់ការតែងតាំងនេះ ដោយនិយាយថា ការជ្រើសរើសរូបលោកបានឆ្លុះបញ្ចាំងពី «ភាពរឹងមាំ ការប្តេជ្ញាចិត្ត និងឆន្ទៈក្នុងការរក្សា​ពន្លឺ​នៃការតស៊ូឲ្យនៅរស់រវើក» ទោះបីជាមានការគាបសង្កត់ពីសំណាក់អ៊ីស្រាអែល និងអាមេរិកក៏ដោយ។

នៅក្នុងលិខិតដដែលនោះ លោកបានថ្កោលទោសចំពោះឧក្រិដ្ឋកម្មរបស់អ៊ីស្រាអែលនៅក្នុងតំបន់ហ្គាហ្សា ដែលកំពុងត្រូវបានបិទខ្ទប់ និងបានបញ្ជាក់ជាថ្មីនូវការប្តេជ្ញាចិត្តរបស់ក្រុមហេបូឡា ចំពោះការតស៊ូ ដោយបង្ហាញការជឿជាក់យ៉ាងមុតមាំថា ជ័យជម្នះនឹងកើតមាននៅទីបញ្ចប់។

លោក Qassem ក៏បានកោតសរសើរចំពោះការដឹកនាំរបស់លោក al-Hayya ដោយលើកឡើងថា វានឹងបន្តនូវកេរដំណែលរបស់មេដឹកនាំក្រុមហាម៉ាសមុនៗដែលបានពលីជីវិត រួមមានស្ថាបនិក លោក Sheikh Ahmed Yassin អតីតប្រធានការិយាល័យនយោបាយ លោក Ismail Haniyeh និងលោក Yahya Sinwar។

មេដឹកនាំក្រុមហេសបូឡារូបនេះបានថ្លែងថា ចលនាតស៊ូលីបង់នឹងបន្តគាំទ្រក្រុមហាម៉ាសនៅក្នុងការតស៊ូដើម្បី «ដណ្តើមយកទឹកដី និងសិទ្ធិមកវិញ» ដែលជាការប្តេជ្ញាចិត្តមួយដែលលោកបានបញ្ជាក់ថា ជាឆន្ទៈរួមរបស់អគ្គលេខាធិការរងគ្រោះរបស់ហេបូឡា លោក Seyed Hassan Nasrallah និងមេដឹកនាំដទៃទៀតរបស់ចលនានេះដែលបានពលីជីវិតទៅ។

លោក Qassem ក៏បានរំឮកដល់កេរដំណែលរបស់ស្ថាបនិកបដិវត្តន៍ឥស្លាម លោក Imam Khomeini និងអតីតមេដឹកនាំកំពូលនៃបដិវត្តន៍ឥស្លាម លោក Ayatollah Seyyed Ali Khamenei ដែលបានពលីជីវិតនៅក្នុងការវាយប្រហារតាមអាកាសតម្រង់ដៅលើការិយាល័យរបស់លោកនៅកណ្តាលទីក្រុងតេហេរ៉ង់ កាលពីថ្ងៃដំបូងនៃការឈ្លានពានរបស់អាមេរិក និងអ៊ីស្រាអែលកាលពីចុងខែកុម្ភៈ។ លោកបានពិពណ៌នាថា ចក្ខុវិស័យរបស់ពួកលោកនៅតែបន្តបង្ហាញផ្លូវសម្រាប់ការតស៊ូដើម្បីទីក្រុងអាល់គុតស៍ (al-Quds/Jerusalem) និងប៉ាឡេស្ទីន។

សូមជម្រាបជូនថា ក្រុមហេបូឡា (លីបង់) និងក្រុមហាម៉ាស (ប៉ាឡេស្ទីន) គឺជាចលនាប្រដាប់អាវុធឥស្លាមដែលមានអ៊ីរ៉ង់ ជាបង្អែករួមគ្នា ក្នុងការប្រឆាំងនឹងអ៊ីស្រាអែល និងឥទ្ធិពលរបស់អាមេរិក។ បន្ទាប់ពីការបាត់បង់មេដឹកនាំចាស់ៗ លោក Qassem បានឡើងមកដឹកនាំក្រុមហេសបូឡា ចំណែកឯលោក Khalil al-Hayya ត្រូវបានជ្រើសរើសជាប្រធានការិយាល័យនយោបាយថ្មីរបស់ក្រុមហាម៉ាស ដែលជាហេតុនាំឲ្យមានការផ្ញើលិខិតអបអរសាទរ និងរឹតចំណងសាមគ្គីភាពនេះកាន់តែស្អិតរមួតជាងមុន៕

អត្ថបទ ៖ សាង ស្រីល័ក្ខ

លោក ត្រាំ ថា​ ប្រធានាធិបតីលីបង់​ នឹង​ក្លាយ​ជាមេដឹកនាំដ៏សំខាន់​ម្នាក់នៅមជ្ឈិមបូព៌ា