បៃដិន ​ប្រញាប់ផ្តល់ជំនួយរាប់ពាន់លានដុល្លារដល់អ៊ុយក្រែន មុន​ត្រាំ​ចូល​​ជំនួស​

ប្រធានាធិបតីសហរដ្ឋអាមេរិកលោក ចូ បៃដិន គ្រោងនឹងផ្តល់ជំនួយយោធារាប់ពាន់លានដុល្លារដល់អ៊ុយក្រែនទាំងប្រញាប់ប្រញាល់ មុនពេលដែលលោកចាកចេញពីតំណែងក្នុងខែមករា ដោយសង្ឃឹមថានឹងពង្រឹងរដ្ឋាភិបាលទីក្រុងកៀវ មុន​ពេលលោក ដូណាល់ ត្រាំ ត្រឡប់ទៅកាន់សេតវិមានវិញ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី០៧ខែវិច្ឆិកានេះ។

លោក ត្រាំ ដែលបានឈ្នះការបោះឆ្នោតកាលពីថ្ងៃអង្គារ បានរិះគន់ទំហំនៃការគាំទ្រផ្នែកយោធា និងហិរញ្ញវត្ថុរបស់សហរដ្ឋអាមេរិកដល់អ៊ុយក្រែន ហើយបានសន្យាថានឹងបញ្ចប់សង្រ្គាមជាមួយរុស្ស៊ីឱ្យបានឆាប់រហ័ស តែមិនបានប្រាប់លម្អិតពីរបៀបនោះទេ។

ជំហររបស់​ប្រធានាធិបតី លោក បៃដិន ចំពោះអ៊ុយក្រែនបានលើកឡើងពីការព្រួយបារម្ភអំពីអនាគតនៃការគាំទ្ររបស់ទីក្រុងវ៉ាស៊ីនតោនដល់សង្គ្រាមអ៊ុយក្រែនជាមួយរុស្ស៊ី នៅក្រោមសេតវិមានព្រឹទ្ធសភាដែលគ្រប់គ្រងដោយគណបក្សសាធារណរដ្ឋ។

មន្ត្រីរដ្ឋបាលជាន់ខ្ពស់ លោក បៃដិន បានប្រាប់ទីភ្នាក់ងារព័ត៌មាន Reuters ក្នុងលក្ខខណ្ឌមិនបញ្ចេញឈ្មោះក្នុងរបាយការណ៍មួយដែលបានចេញផ្សាយកាលពីថ្ងៃព្រហស្បតិ៍ថា «រដ្ឋបាលគ្រោងនឹងបន្ថែមជំនួយដើម្បីធ្វើឱ្យអ៊ុយក្រែនស្ថិតក្នុងទីតាំងដ៏រឹងមាំបំផុតដែលអាចធ្វើទៅបាន»។

ទោះយ៉ាងណាប្រធានាធិបតីអ៊ុយក្រែនលោក Volodymyr Zelenskyy ស្ថិតក្នុងចំណោមមេដឹកនាំពិភពលោកដំបូងគេដែលអបអរសាទរលោក ត្រាំហើយលោកក៏បាននិយាយទៅកាន់ប្រធានាធិបតីជាប់ឆ្នោតកាលពីថ្ងៃពុធផងដែរ។លោក Zelenskyy បានបង្ហោះលើប្រព័ន្ធផ្សព្វផ្សាយសង្គម Xថា «យើងបានយល់ព្រមរក្សាការសន្ទនាយ៉ាងជិតស្និទ្ធ និងជំរុញកិច្ចសហប្រតិបត្តិការរបស់យើង»។

សភាអាមេរិកបានអនុម័តជំនួយសម្រាប់អ៊ុយក្រែនក្នុងខែមេសា រួមទាំងការបែងចែកអាវុធ។ ក្នុងចំណោមការផ្ទេរអាវុធដែលបានអនុម័ត នៅសល់ ៤.៣ ពាន់លានដុល្លារ បន្ថែមពីលើការផ្ទេរប្រាក់ដែលមានតម្លៃ ២.៨ ពាន់លានដុល្លារដែលសមាជិកសភាបានអនុម័តក្នុងវិធានការចំណាយពីមុន និង ២ពាន់លានដុល្លារក្នុងការផ្តល់មូលនិធិសម្រាប់ការទិញអាវុធថ្មី។ សរុបមក ជំនួយយោធា ៩ពាន់លានដុល្លារនោះ នឹងក្លាយជាការជំរុញដ៏សំខាន់ដល់ការការពាររបស់អ៊ុយក្រែន។

យោងតាមទិន្នន័យចុងក្រោយរបស់ក្រសួងការបរទេសអាមេរិកបានឱ្យដឹងថា ចាប់តាំងពីការលុកលុយពេញលេញរបស់រុស្ស៊ីមកលើអ៊ុយក្រែនក្នុងឆ្នាំ ២០២២ សហរដ្ឋអាមេរិកបានផ្តល់ជំនួយផ្នែកយោធាច្រើនជាង ៦៤ ពាន់លានដុល្លារ ដល់អ៊ុយក្រែនរួចហើយ។

ចំណែកអ្នកវិភាគខ្លះនិយាយថា វាមិនប្រាកដថា ទីក្រុងវ៉ាស៊ីនតោននឹងគាំទ្រដល់ជំនួយអ៊ុយក្រែនទៀតទេ នៅពេលដែលគណបក្សសាធារណរដ្ឋគ្រប់គ្រងសេតវិមាន ។

មួយវិញទៀតក្នុងអំឡុងពេលនៃយុទ្ធនាការនេះ លោក ត្រាំ បានទទូចថាប្រធានាធិបតីរុស្ស៊ីលោក Vladimir Putin នឹងមិនដែលបានឈ្លានពានអ៊ុយក្រែននៅឆ្នាំ ២០២២ ប្រសិនបើលោកបានកាន់តំណែងដោយបន្ថែមថាគាត់ «អាចដោះស្រាយជម្លោះនេះបានក្នុងរយៈពេល ២៤ ម៉ោង» ។ លោក ត្រាំ ធ្លាប់​បាន​ស្នើ​ថា អ៊ុយក្រែន​អាច​នឹង​ត្រូវ​ប្រគល់​ទឹកដី​ទៅ​ឲ្យ​រុស្ស៊ី ដើម្បី​ឈាន​ដល់​កិច្ច​ព្រមព្រៀង​សន្តិភាព ជា​អ្វី​ដែល​អ៊ុយក្រែន​បាន​បដិសេធ ខណៈ​លោក បៃដិន មិន​ដែល​បាន​ស្នើ​ឡើយ៕

អត្ថបទ៖ ប៊ុន សុភាព