ពូទីន អនុម័តច្បាប់ថ្មី លុបចោលបំណុលអ្នកដែលចុះឈ្មោះ ចូលបម្រើកងទ័ព

កាលពីថ្ងៃអាទិត្យទី២៤ខែវិច្ឆិកាឆ្នាំ២០២៤ ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានអនុម័តច្បាប់ថ្មីមួយ ដោយលុបចោលបំណុលចំពោះអ្នកទាំងឡាយណា ដែលចុះឈ្មោះចូលបម្រើក្នុងជួរកងទ័ព ហើយច្បាប់នេះ ក៏អនុវត្តចំពោះភរិយាយុទ្ធជនទាំងនោះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ច្បាប់ថ្មីនេះ នឹងអនុវត្តចំពោះអ្នកដែលចុះឈ្មោះចូលធ្វើទ័ពជាមួយកិច្ចសន្យា១ឆ្នាំឬច្រើនជាងនេះ ហើយវានឹងលុបចោលបំណុលអ្នកដែលជំពាក់គេក្រោម ៩៦ ០០០ដុល្លារអាមេរិក។ 

ច្បាប់ថ្មីនេះ ត្រូវគេមើលឃើញថា រុស្ស៊ីកំពុងព្យាយាមជំរុញនិងលើកទឹកចិត្តឲ្យមនុស្ស ចុះឈ្មោះចូលបម្រើកងទ័ពកាន់តែច្រើន ចំពេលសង្គ្រាមជាមួយអ៊ុយក្រែន បានឈានដល់ដំណាក់កាលថ្មីកាន់តែក្តៅគគុក ខណៈមានសេចក្តីរាយការណ៍អំពីតួលេខទាហានរុស្ស៊ី ស្លាប់ច្រើននៅសមរភូមិ នារយៈពេលប៉ុន្មានខែមកនេះ។

តួយ៉ាងបើតាមការចុះផ្សាយរបស់ Business Insider, ប្រមុខអង្គការណាតូ លោក ម៉ាក រូត បានលើកឡើងកាលពីចុងខែតុលាថា ចាប់តាំងពីទីក្រុងមូស្គូបើកការវាយលុកពេញទំហឹងក្នុងខែកុម្ភៈឆ្នាំ២០២២មក កងកម្លាំងរុស្ស៊ីបានស្លាប់ឬរងរបួសជាង ៦០០ ០០០នាក់ហើយ។

ដោយឡែក ក្នុងការបង្ហោះសារលើបណ្តាញសង្គម X កាលពីថ្ងៃសៅរ៍, ក្រសួងការពារជាតិអ៊ុយក្រែន បានចែករំលែកតួលេខពីអគ្គសេនាធិការនៃកងកម្លាំងប្រដាប់អាវុធអ៊ុយក្រែន ដែលអះអាងថា តាំងពីសង្គ្រាមផ្ទុះឡើង រុស្ស៊ីបាត់បង់ទាហានរហូតដល់ទៅជាង ៧២៩ ០០០នាក់ឯណោះ៕

អត្ថបទ៖ សុខ សុវណ្ណ

ចុចអាន៖ រុស្ស៊ី ចាប់បានអតីតទ័ពអង់គ្លេស ដែលស៊ីឈ្នួលប្រយុទ្ធឲ្យអ៊ុយក្រែន