ព័ត៌មានអន្ដរជាតិ

ស្លាប់១២នាក់ និងជម្លៀសខ្លួនរាប់ម៉ឺននាក់ ព្រោះទឹកជំនន់នៅថៃ និងម៉ាឡេស៊ី

បានផុស

១ year មុន

នៅ

ថ្ងៃអាទិត្យ ១ ធ្នូ ២០២៤

ដោយ

Chheang

គ្រោះទឹកជំនន់ដ៏ធំនៅក្នុងប្រទេសម៉ាឡេស៊ី និងប្រទេសថៃ បានសម្លាប់មនុស្សយ៉ាងហោចណាស់ ១២នាក់។ នេះបើយោងតាមការចុះផ្សាយរបស់សារព័ត៌មាន BBC នៅថ្ងៃទី១ខែធ្នូឆ្នាំ២០២៤។

មនុស្សជាង ១២២ ០០០នាក់ ត្រូវបានបង្ខំឲ្យចាកចេញពីផ្ទះសម្បែងរបស់ពួកគេនៅភាគខាងជើងប្រទេសម៉ាឡេស៊ី ខណៈដែលនៅភាគខាងត្បូងប្រទេសថៃ ប្រហែលមនុស្ស ១៣ ០០០នាក់ផ្សេងទៀតក៏ត្រូវបានផ្លាស់ទីលំនៅផងដែរ។

មានការភ័យខ្លាចថាចំនួនអ្នកស្លាប់ និងអ្នកត្រូវជម្លៀសខ្លួនអាចកើនឡើង ដោយសារភ្លៀងធ្លាក់ខ្លាំង និងការព្រមានអំពីព្យុះនៅតែមាន។

មន្ត្រីគ្រោះមហន្តរាយ បាននិយាយថា ទឹកជំនន់បានប៉ះពាល់ដល់ពលរដ្ឋជិត ៥៣៤ ០០០គ្រួសារនៅភាគខាងត្បូងប្រទេសថៃ ហើយមន្ទីរពេទ្យចំនួន២ត្រូវបិទ ដើម្បីការពារទឹកជំនន់ពីការបំផ្លាញសម្ភារៈបរិក្ខារពេទ្យ។

ខេត្តចំនួន៦ បានប្រកាសគ្រោះមហន្តរាយដោយសារទឹកជំនន់។

រដ្ឋាភិបាលថៃ បានកំណត់ថវិកាចំនួន ៥០លានបាត ស្មើនឹង ១,៧លានដុល្លារ ក្នុងការជួយសង្គ្រោះទឹកជំនន់សម្រាប់ខេត្តនីមួយៗ ដោយនាយករដ្ឋមន្ត្រីលោកស្រី Paetongtarn Shinawatra បាននិយាយថា គោលដៅគឺ «ស្តារឲ្យមានសភាពធម្មតាឡើងវិញឲ្យបានលឿនតាមដែលអាចធ្វើទៅបាន»។

ចំណែកនៅឯម៉ាឡេស៊ី ទឹកជំនន់ភាគច្រើនកើតឡើងក្នុងរដ្ឋ Kelantan ភាគឦសាន ដែលជាប់ព្រំដែនថៃ។

នៅទីនោះ ទីភ្នាក់ងារគ្រប់គ្រងគ្រោះមហន្តរាយជាតិ និយាយថា អ្នកជម្លៀសខ្លួន មានចំនួន ៦៣% នៃចំនួនពលរដ្ឋសរុប។

រដ្ឋចំនួន៨ ផ្សេងទៀតនៅក្នុងប្រទេសម៉ាឡេស៊ីក៏រងផលប៉ះពាល់ផងដែរ។

សូមបញ្ជាក់ថា ក្នុងឆ្នាំ២០២១ ម៉ាឡេស៊ីបានប្រឈមមុខនឹងទឹកជំនន់ដ៏អាក្រក់របស់ខ្លួនក្នុងរយៈពេលជាច្រើនទសវត្សរ៍ ដែលបានសម្លាប់មនុស្សយ៉ាងហោចណាស់ ១៤នាក់។

ដោយឡែកនៅឆ្នាំ២០១១ ទឹកជំនន់ដែលរីករាលដាលពាសពេញប្រទេសថៃ បានសម្លាប់មនុស្សយ៉ាងហោចណាស់ ៥០០នាក់ និងបំផ្លាញផ្ទះរាប់លានខ្នង៕

ដោយ៖ ឈាង