ព័ត៌មានអន្ដរជាតិ

នាយករដ្ឋមន្ត្រីស៊ុយអែត ផ្អាកកិច្ចប្រជុំកំពូលនៅកូរ៉េខាងត្បូង ក្រោយភាពវឹកវររឿងច្បាប់អាជ្ញាសឹក

បានផុស

១ year មុន

នៅ

ថ្ងៃពុធ ៤ ធ្នូ ២០២៤

ដោយ

Chheang

ដំណើរទស្សនកិច្ចរបស់នាយករដ្ឋមន្ត្រីស៊ុយអែត ទៅកាន់ប្រទេសកូរ៉េខាងត្បូង ត្រូវបានប្រកាសផ្អាក និងលើកពេលទៅថ្ងៃក្រោយវិញ បន្ទាប់ពីរដ្ឋាភិបាលក្រុងសេអ៊ូលកំពុងជួបប្រទះនឹងភាពចលាចល ពាក់ព័ន្ធនឹងច្បាប់អាជ្ញាសឹករបស់លោកប្រធានាធិបតី Yoon Suk Yeol។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរដ្ឋាភិបាលស៊ុយអែត បានឲ្យដឹងនៅថ្ងៃពុធនេះថា ដំបូងឡើយ លោក Ulf Kristersson ត្រូវធ្វើដំណើរទៅកូរ៉េខាងត្បូងនៅក្នុងសប្ដាហ៍នេះ ដើម្បីរៀបចំកិច្ចប្រជុំកំពូលមួយជាមួយលោក Yoon។ យ៉ាងណា គម្រោងជំនួបរវាងមេដឹកនាំទាំងពីរ នឹងត្រូវលើកពេលទៅថ្ងៃក្រោយវិញ។

នៅក្នុងសេចក្ដីថ្លែងការណ៍ ស៊ុយអែត បានរៀបរាប់ថា៖ «ដោយសារការវិវឌ្ឍនាពេលថ្មីៗនេះ យើងបានសម្រេចចិត្តពន្យារពេលដំណើរទស្សនកិច្ចនេះ។ យើងបានទាក់ទងជាមួយកូរ៉េខាងត្បូងនៅព្រឹកនេះ ហើយឥឡូវនេះនឹងធ្វើការជាមួយគ្នា ដើម្បីស្វែងរកពេលវេលាថ្មីសម្រាប់ដំណើរទស្សនកិច្ចនាពេលអនាគត»។

សូមបញ្ជាក់ថា កាលពីយប់ថ្ងៃអង្គារ លោក Yoon បានប្រកាសច្បាប់អាជ្ញាសឹកយ៉ាងបន្ទាន់មួយ ដោយអះអាងថា វិធានការនេះគឺចាំបាច់ខ្លាំងណាស់ ដើម្បីការពារប្រទេសពីកងកម្លាំងកុម្មុយនិស្តកូរ៉េខាងជើង និងដើម្បីកម្ចាត់ក្រុមប្រឆាំងរដ្ឋ។ វិធានការនេះ បានបង្កជាភាពវឹកវរពេញប្រទេសកូរ៉េខាងត្បូង ហើយក៏ជាលើកដំបូងដែរ គិតចាប់តាំងពីឆ្នាំ១៩៨០ ដែលរដ្ឋាភិបាលក្រុងសេអ៊ូលប្រកាសដាក់ច្បាប់អាជ្ញាសឹកបែបនេះ។

ទោះជាយ៉ាងនេះក្ដី ច្បាប់អាជ្ញាសឹកនេះ ត្រូវបានដកចេញវិញ ក្រោយពេលសមាជិកសភាបោះឆ្នោតប្រឆាំងនឹងលោក Yoon៕

ដោយ៖ ឈាង

ចុចអាន៖ គណបក្សប្រឆាំងកូរ៉េខាងត្បូង ដាក់ញត្តិប្តឹងដកតំណែងលោក យូន ជាផ្លូវការហើយ