កូរ៉េខាងត្បូង ដាក់បម្រាមធ្វើដំណើរចេញក្រៅប្រទេសលើលោក Yoon

នៅថ្ងៃចន្ទទី៩ខែធ្នូឆ្នាំ២០២៤ ក្រសួងយុត្តិធម៌កូរ៉េខាងត្បូង បានដាក់បម្រាមធ្វើដំណើរចេញក្រៅប្រទេសលើលោកប្រធានាធិបតី Yoon Suk Yeol ជាផ្លូវការហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បម្រាមនេះកើតឡើងស្របពេលប៉ូលិសក៏បើកការស៊ើបអង្កេតបទបំបះបំបោរលើមេដឹកនាំវ័យ៦៣ឆ្នាំរូបនេះផងដែរ ជុំវិញការប្រកាសច្បាប់អាជ្ញាសឹកយ៉ាងតក់ក្រហល់ កាលពីរាត្រីថ្ងៃអង្គារទី៣ខែធ្នូ ដែលរុញប្រទេសកូរ៉េខាងត្បូង ឲ្យធ្លាក់ចូលទៅក្នុងភាពវឹកវរ ត្បិតច្បាប់នេះមានរយៈពេលខ្លីក៏ដោយ។

មុននេះមួយថ្ងៃ អតីតរដ្ឋមន្ត្រីការពារជាតិកូរ៉េខាងត្បូង Kim Yong-hyun ក៏ត្រូវប៉ូលិសចាប់ខ្លួនផងដែរ ជុំវិញតួនាទីរបស់គាត់ក្នុងការប្រកាសច្បាប់អាជ្ញាសឹកពីសំណាក់លោក Yoon។

ជម្លោះនយោបាយ កំពុងរួបរឹត​ប្រទេសកូរ៉េខាងត្បូង ក្រោយការប្រកាសច្បាប់នេះ ខណៈគណបក្សប្រឆាំង បានចោទប្រកាន់លោក Yoon ពីបទក្បត់ជាតិ រីឯប្រជាជនយ៉ាងច្រើន បាននាំគ្នាចេញធ្វើបាតុកម្មទាមទារឲ្យលោកចុះចេញពីតំណែង។

ក្រោយការប្រកាសច្បាប់នោះមិនបានប៉ុន្មានផង គណបក្សប្រឆាំងបានដាក់ញត្តិប្តឹងដកតំណែងលោក Yoon ប៉ុន្តែគ្រប់យ៉ាងត្រូវបរាជ័យ។ សភា​កូរ៉េខាងត្បូង​ មិនអាចបោះឆ្នោតអាចដកតំណែងលោក Yoon បានទេ ហើយក៏​មិនអាច​​​បង្កើត​ក្រុមប្រឹក្សា​ស៊ើប​អង្កេត​​លើ​​​ភរិយា​ប្រធានាធិបតីបានដែរ។

ការ​បរាជ័យ​ទាំងពីរ​ករណី​នេះ គឺដោយសារ​​សមាជិកសភា​គណបក្ស​កាន់​អំណាច​របស់​លោក Yoon ដែល​មាន​១០៨​សំឡេង ​មិនបាន​បោះឆ្នោត​គំាទ្រលើសេចក្តីស្នើច្បាប់​​របស់​គណបក្ស​ប្រជាធិបតេយ្យ​ដែល​មាន​សមាជិក​១៩២​សំឡេង និងត្រូវ​ការ​តែ​​៨​សំឡេង​ទៀតប៉ុណ្ណោះ​ដើម្បី​បង្រ្គប់​កូរ៉ុម​២ភាគ៣​ ដើម្បី​ដក​ហូត​អំណាច​ប្រធានាធិបតី។​

ទោះបីជាយ៉ាងណាក៏ដោយ លោក Han Dong-Hoon ដែលជាមេដឹកនាំគណបក្សកាន់អំណាច បានប្រកាសថា ត្បិតតែលោកប្រធានាធីបតី Yoon រួចផុតពីបណ្តឹងដកតំណែងក៏ពិតមែន ប៉ុន្តែលោក Yoon នឹងចុះចេញពីអំណាច ហើយនឹងលែងពាក់ព័ន្ធជាមួយកិច្ចការរដ្ឋអ្វីទៀតហើយ៕

អត្ថបទ៖ សុខ សុវណ្ណ

ចុចអាន៖ គណបក្សកាន់អំណាចកូរ៉េខាងត្បូង ថា លោក Yoon នឹងលាលែងតំណែង