បេឡារុសថា ខ្លួនមានអាវុធនុយក្លេអ៊ែររាប់សិបដើមរបស់រុស្ស៊ី​

ប្រធានាធិបតីផ្តាច់ការនៃប្រទេសបេឡារុស លោក Alexander Lukashenko បានឲ្យដឹងថា ប្រទេសរបស់លោកមាន​អាវុធនុយក្លេអ៊ែរជាច្រើនរបស់រុស្ស៊ី​ ហើយនឹងរៀបចំកន្លែងសម្រាប់ដាក់ពង្រាយតាមផែនការនៃមីស៊ីលផ្លោងល្បឿនលឿនជាងសំឡេងថ្មីបំផុតរបស់ទីក្រុងមូស្គូ។ ​​យោង​​ទីភ្នាក់ងារព័ត៌មាន​ AP នៅថ្ងៃទី១១ខែធ្នូនេះ។

ការកត់សម្គាល់របស់លោក បានធ្វើឡើង បន្ទាប់ពីលោក និងប្រធានាធិបតីវ្ល៉ាឌីមៀ ពូទីន បានចុះហត្ថលេខាលើសន្ធិសញ្ញា​មួយកាលពីសប្តាហ៍មុន ដែលផ្តល់ការធានាសន្តិសុខដល់បេឡារុស ដែលជាសម្ព័ន្ធមិត្តជិតស្និទ្ធបំផុតរបស់ទីក្រុងមូស្គូ រួមទាំងការប្រើប្រាស់អាវុធនុយក្លេអ៊ែររបស់រុស្ស៊ី ដើម្បីជួយទប់ទល់ការឈ្លានពានណាមួយ​​ពី​ខាងក្រៅ​​។

កតិកាសញ្ញានេះធ្វើឡើង​បន្ទាប់ពីមានការកែប្រែឡើងវិញរបស់ទីក្រុងមូ​ស្គូអំពីគោលលទ្ធិនុយក្លេអ៊ែររបស់ខ្លួន ដែលជាលើកដំបូងបានដាក់ប្រទេសបេឡារុសឱ្យស្ថិតនៅសម្ព័ន្ធមិត្តនុយក្លេអ៊ែររុស្ស៊ី ចំពេលមានភាពតានតឹងជាមួយលោកខាងលិចជុំវិញជម្លោះនៅអ៊ុយក្រែន។

លោក Lukashenko បាននិយាយថា៖​«ខ្ញុំបានព្រមានសត្រូវរបស់ខ្ញុំទាំងអស់ ប្រសិនបើអ្នកឈានជើងទៅព្រំដែន ចម្លើយនឹងកើតឡើងភ្លាមៗ»។

លោក Lukashenko ដែលបានគ្រប់គ្រងប្រទេសបេឡារុសដោយប្រើដៃដែកអស់រយៈពេលជាង ៣០ ឆ្នាំហើយបានពឹងផ្អែកលើការឧបត្ថម្ភធននិងការគាំទ្ររបស់វិមានក្រឹមឡាំងបានអនុញ្ញាតឱ្យរុស្ស៊ីប្រើប្រាស់ទឹកដីរបស់ប្រទេសរបស់គាត់ដើម្បីបញ្ជូនកងទ័ពចូលទៅក្នុងប្រទេសជិតខាងអ៊ុយក្រែននៅឆ្នាំ ២០២២ និងធ្វើជាម្ចាស់ផ្ទះនៃអាវុធនុយក្លេអ៊ែរយុទ្ធសាស្ត្រមួយចំនួន។

ពាក់ព័ន្ធបញ្ហានេះរុស្ស៊ី​មិន​បាន​បង្ហាញ​ថា​មាន​ចំនួន​ប៉ុន្មាន​ទេ ប៉ុន្តែ​លោក Lukashenko បាន​និយាយ​កាលពី​ថ្ងៃ​អង្គារ​ថា ប្រទេស​របស់​លោក​បច្ចុប្បន្ន​មាន​មីស៊ីល​រាប់សិបដើមហើយ។

គួរបញ្ជាក់ថា ការដាក់ពង្រាយអាវុធនុយក្លេអ៊ែរយុទ្ធសាស្ត្រទៅកាន់ប្រទេសបេឡារុសដែលមានព្រំដែន​ប្រវែង​ ១០៨៤ គីឡូម៉ែត្រ ជាមួយអ៊ុយក្រែននឹងអនុញ្ញាតឱ្យយន្តហោះ និងមីស៊ីលរុស្ស៊ីទៅដល់គោលដៅដែលមានសក្តានុពលនៅទីនោះកាន់តែងាយស្រួល និងឆាប់រហ័ស ប្រសិនបើទីក្រុងម៉ូស្គូសម្រេចចិត្តប្រើប្រាស់វា។ វា​ក៏​ពង្រីក​សមត្ថភាព​របស់​រុស្ស៊ី​ក្នុង​ការ​កំណត់​គោលដៅ​សម្ព័ន្ធមិត្ត​ណាតូ​មួយ​ចំនួន​នៅ​អឺរ៉ុប​ខាង​កើត និង​កណ្តាលផងដែរ៕

អត្ថបទ៖ ប៊ុន សុភាព