ត្រាំ ប្រកាសមិនយកប្រាក់ខែប្រធានាធិបតី នៅអាណត្តិថ្មីនេះ

លោក ដូណាល់ ត្រាំ បានប្រកាសមិនយកប្រាក់ខែប្រធានាធិបតីសម្រាប់អាណត្តិថ្មីនេះឡើយ ដោយអះអាងថា ការធ្វើបែបនេះគឺជារឿងដ៏ល្អបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រកាសបែបនេះ ក្នុងកិច្ចសម្ភាសជាមួយពិធីការិនី Kristen Welker របស់ទូរទស្សន៍ NBC News កាលពីដើមសប្តាហ៍ និងត្រូវបានយកមកចុះផ្សាយដោយសារព័ត៌មាន VN Express នៅថ្ងៃព្រហស្បតិ៍ទី១២ខែធ្នូឆ្នាំ២០២៤។

ក្នុងកិច្ចសម្ភាសនោះ លោក ត្រាំ និយាយថា «ខ្ញុំមិនយកប្រាក់ខែទេ ហើយក៏មិនយកអ្វីទាំងអស់ ដូចនេះខ្ញុំបានបោះចោលលុយច្រើនណាស់។ គ្មានប្រធានាធិបតីរូបណាធ្វើអ៊ីចឹងទេ។ ប្រហែលជា Theodore Roosevelt, John F. Kennedy ឬ George Washington ធ្លាប់មិនយកប្រាក់ខែដែរក៏មិនដឹង ប៉ុន្តែខ្ញុំមិនច្បាស់អំពីរឿងនេះឡើយ»។

លោក ត្រាំ នឹងទទួលបានប្រាក់ខែ ៣៣ ៣៣៣ដុល្លារ សរុបមួយឆ្នាំបាន ៤០០ ០០០ដុល្លារ ពោលគឺដូចប្រធានាធិបតីមុនៗដែរ តាមការកំណត់ដោយច្បាប់សហព័ន្ធ។

ក្រៅពីប្រាក់ខែគោល លោកត្រាំ ក៏នឹងទទួលបានប្រាក់បន្ថែមសម្រាប់ការចំណាយ ៥០ ០០០ដុល្លារដោយមិនចាំបាច់បង់ពន្ធ, ប្រាក់សម្រាប់ដំណើរទេសចរណ៍ ១០០ ០០០ដុល្លារ និងកញ្ចប់សម្រាប់ការកម្សាន្ត ១៩ ០០០ដុល្លារ។

ក្នុងអំឡុងយុទ្ធនាការឃោសនាបោះឆ្នោតឆ្នាំ២០១៦ លោកត្រាំសន្យាថា នឹងបរិច្ចាគប្រាក់ខែរបស់គាត់ទាំងអស់ប្រសិនបើក្លាយជាប្រធានាធិបតី។ ក្រោយមក គេជឿថា គាត់បានបរិច្ចាគប្រាក់ខែគិតចាប់ពីឆ្នាំ២០១៧ដល់២០២១ សរុបជាទឹកប្រាក់ ១.៤លានដុល្លារ ទៅឲ្យទីភ្នាក់ងាររដ្ឋាភិបាលផ្សេងៗ ដូចជាក្រសួងកិច្ចការអតីតយុទ្ធជន និងទីភ្នាក់ងារឧទ្យានជាតិជាដើម៕

អត្ថបទ៖ សុខ សុវណ្ណ

ចុចអាន៖ តើលោក ត្រាំ បានប្រាក់ខែប៉ុន្មាន ពេលឡើងកាន់តំណែងប្រធានាធិបតីអាមេរិក?